पीतोरांय लेखलों बीहरों कागलों
1
सालामाअ गोठ
1 आपुअ पोरमेहेर आने वाचावनारा ईसु ख्रीस्तुअ हाचा कामुअ लीदे, आमांअ होच कींमती वीसवास मीलवुअला लोकुंह! ईसु ख्रीस्तुअ सेवोक आने तीयाअ खास चेलो आंय सीमोन पीतोर तुमनेंह मांअ सालाम दीहुं।
2 तुमां पोरमेहेराअ आने आपुअ मालीख ईसुअ जो ओनुभोव केअताह, तीयाकींअ पोरमेहेर तुमाहांपेअ वादारे ने वादारे मेरबानी केअ, आने तुमनेंह वादारे ने वादारे सुख-सांती दे! 3 सोताअ खुब उजवोळाअ आने हाराम-हारा गुण मीलवांअ सोताअ होरगाअ ताकोताकींअ आपनेंह हादनारा ख्रीस्तुअ आपुंह ओनुभोव केअतेंह। तीयाअ लीदे, तीयांय आपनेंह खेरों भोकती-भावुअ जीवोन जीवांअ जोंबी जोरुल हाय, तों बादों पुरों पाळ्योंह। 4 आने एंहकींअ कीईन, ईसु ख्रीस्तुंह आपनेंह देदला वोचोनु पोरमाणे, तीयांय आपनेंह कींमती ने खुब मोडा आसीरवाद देदाह, ईयाअ खातुर का, ईयु दुन्यामेर्याअ लोकाहांम रेनारी, नास केअनारी ईयु खाराब मोर्जींअ काबामनेअ वाचायन आपुंह पोरमेहेराअ सोबाव मीलवी सेकजी। 5 ख्रीस्तुपेअ वीसवास राखता रेनारा तुमां, ईयाज कारोणाअ लीदे, तीया वीसवासाअरी सोताअ चाल-चोलगोत्या एकदोम चोख्या आने हार्या राखांअ, 6 आने आरी-आरी पोरमेहेराअ मोर्जी जांयन खोटाय केरांअ सोळी दांअ, ने आरी-आरी सोताल काबाम राखांअ, आने आरी-आरी दुखाहांअ वोखत बी धीरोज राखांअ, आने आरी-आरी खेरों भोकती-भावुअ जीवोन जीवांअ, 7 आने आरी-आरी बादा वीसवास्यांहपेअ माया राखांअ, आने आरी-आरी बीहरा बादा लोकाहांपेअ माया राखांअ बादी रीते कोसीस केरा। 8 तुमां एंहकींअ कीअहा आने एंहकींअ वादारे ने वादारे केअताज रीहा ता, तुमांअ जीवोनाहांम आपुअ मालीख ईसु ख्रीस्तुअ जो ओनुभोव तुमां केअताह, तीयाकींअ तुमां खोरेखोर पोरमेहेराअ खातुर खुब हारें कामें केअनारें बोंणाह। 9 पेन जीया वीसवास्याअ जीवोनाम ए बाबोत्या नांह, तों, जेंहकींअ आंदलों मांहुंअ काय बी हीअ नांह सेकतों तेंहकींअ, आत्मीक बाबोतीहींन जांई नांह सेकतों, आने पाहलीअ वोस्ताहांनुंज हीअ सेकनारा मांहांअ होच, तों दुन्यामेरीअ वोस्ताहांपेअ मोन राखेह, आने तीयाअ जुना पापाहांअ मोल ख्रीस्तुंह तुवी टाक्योह ते बाबोत तों वीहराय गीयोंह। 10 तीयाअ लीदे, मांअ पावु-बोंअयुहुं, पोरमेहेरांय सोताअ राज्याम आवांअ तुमनेंह पोसोंद कीईन हादयेंह तीयाअ कायोम खातरी राखांअ तुमां आजी वादारे कोसीस केरा। काहाका, एंहकींअ कीअहा तांहांअ, तुमां वीसवासामनेअ कीदीह बी पोळी नांय जाहा। 11 आने एंहकींअ कीईन, पोरमेहेर तुमनेंह आपुअ मालीख आने वाचावनारा ईसु ख्रीस्तुअ कायोम टीकनारा राज्याम जांअ पुरो होक दीअ। 12 तीयाअ लीदे, ए बादया गोठ्या तुमां पेअलांअनेअ जांअतेंहज, आने जो हाचो बोद तुमनेंह मील्योह तीयापेअ तुमांअ वीसवास पाको हाय। तेबी आंय ए गोठ्या तुमनेंह कायोमुज ईत केरावतो रेहें। 13 आंय जीवुं तांव लोगुंअ ईयु बाबोतीहींअ तुमनेंह ईत केरावता रांअ, आने तीयाकींअ तुमनेंह आत्मीक रीते जागवांअ मांन बोराबोर लागेह। 14 काहाका, आपुअ मालीख ईसु ख्रीस्तुंह मांन चोख्खों आखलों तीयाअ पोरमाणे, आंय माहरीज मोय जानारो हाय। 15 तीयाअ लीदे, आंय मोय जाहें हातींअ बी ए बाबोत्या तुमां कायोम ईत कीअ सेका तीयाअ खातुर तुमनेंह काय बी सोगवोळ कीअ दांअ आंय मांन बोंणे तोतीअ कोसीस केअहें।
ख्रीस्तुअ मोडाय नोजरा-नोजुर देखली तीया बाबोताम
16 काहाका, आपुअ मालीख ईसु ख्रीस्त खुब ताकोत लीईन आवनारो हाय ते गोठ तुमनेंह जाहेर केरांअ खातुर हुच्यारी वापरीन उबजावी काडली गांअयुंहपेअ आमां आदार नांह राख्यो। पेन खोरेखोर बोंणला बोनावुंहपेअ आमां आदार राखलो। ख्रीस्तुअ मोडायुल आमां आमांअ डोंआं नोजरेज देखली। 17 मोंजे का, पोरमेहेराअ उजवोळ ख्रीस्तुपेअ पोळता पोरमेहेर बाहकांय तीया बाबोताम, “ओ मांअ मेरालो पोयरो हाय; आंय ईयापेअ खुब राजी हाय” एंहकींअ आखीन तीयाल मान आने मोडाय देदली तांहांअ, आमां तींहींज आथा। 18 आमां तीयाअरी पोवीतोर डोगाअपेअ आथा तांहांअ, आमां होरगामेनेअ आललो तो आवाज उनाअला।
19 आने तीयाअ लीदे, पोरमेहेराअ गोठ जाहेर केअनारांय आखली गोठीम आमनेंह आजी वादारे खातरी हाय। तेंहकींअ तुमां बी, मालीख ईसु ख्रीस्त फाचो आवीअ, ने जेंहकींअ उजाल्यो तारो उजालाअरी चोमकेह तेंहकींअ, तुमनेंह पुरो आत्मीक उजवोळ दांअ ख्रीस्तुअ उजवोळ तुमांअ मोनाहांम पोळीअ तांव लोगुंअ, तुमांअ पुरों धीयान तीयु गोठीपेअ राखा। ते गोठ आंदाराम उजवोळ देनारा दीवाअ होच हाय। 20 बीहरा बादाहांअ केअता, पेअलांअ ईं ईत केरा: पोवीतोर आत्माअ मोदोतु वोगुर केल्लों बी मांहुंअ पोवीतोर लेखाणाहांम देदल्या भोवीसवाणी ंअ खुलासो नांय कीअ सेके। 21 काहाका, केल्ली बी भोवीसवाणी , मांहांअ मोर्जी पोरमाणे नांह जाहेर वीयी। पेन ते गोठ आखनारा सेवोक, पोरमेहेरापेनेअ आलली ते गोठ पोवीतोर आत्माअ काबाम रीईन गोग्या।