योहानाअ पेअलोंअ कागलों
ईया कागलाअ बाबोताम बेन गोठ्या
योहानाअ पेअलोंअ कागलों लेखांअ बेन कारोणें हाय: पेअलोंअ कारोण, कागलों वाचनारें पोरमेहेराअरी आने तीयाअ पोयरा ईसु ख्रीस्तुअरी सोबोंद राखी रे तीयाअ खातुर तीयाहांन उफ दांअ; बीहरों कारोण, तो सोबोंद तोळी टाकनारा झुटा सीक्सोणुअ पोरमाणे नांय चालांअ तीयाहांन चेतवांअ।
ईया झुटा सीक्सोणुअ आदार एंहडा वीसवासुपेअ आथो का, ईयु देखाअनारी दुन्याअरी सोबोंद राखीनुंज बादों खाराब पेदा वेअहे, आने तीयाअ लीदे, पोरमेहेराअ पोयरो ईसु होकीकोतुम मांहुंअ बोंणी सेकेज नांय। ते झुटों हीकवुअनारा एंहकींअ आखावत्ला का, पापाहांअ सीक्सामेनेअ वाचाय जावुलोंअ तों ता, ईयु दुन्यामेर्याअ जीवोनाअ चींतामनेअ सुटकारो मीलवुलोंअ तोंज हाय। आने ते एंहकींअ बी हीकवुअत्ला का, नीतीअ रीते वोरतुअजी का खाराब रीते वोरतुअजी, एक-बीहरापेअ माया राखजी का नांय राखजी तीयाअ, पापाहांअ सीक्सामेनेअ वाचायुलोंअ तीयाअरी काय लागतों-वीअगुअतों नांह।
एंहडा खोटा सीक्सोणुअ वीरुदुम योहान ईया कागलाम चोख्खी रीते आखेह का, ईसु ख्रीस्त होकीकोतुम मांहुंअ बोंणलों। आने योहान खास आखेह का, जें ईसुल मानतेंह आने पोरमेहेरापेअ माया राखतेंह, तीयाहांअ एक-बीहरापेअ बी माया राखांअ जोजे।
ईया कागलामेरीअ बाबोतीहींअ रुपरेखा
आगली गोठ १:१-४
उजवोळ आने आंदारों १:५-२:२९
पोरमेहेराअ पोयरें ने सेतानाअ पोयरें ३:१-२४
खेरों ने झुटों ४:१-६
माया राखनाराअ फोरोज ४:७-२१
वीसवासुकींअ मीलनारी आत्मीक जीत ५:१-२१