3
मालीख ईसु फाचो आवीअ तीयाअ वोचोन
1 मांअ मेराला दोस्दारुहुं, ईं तुमाहांपेअ मांअ बीहरों कागलों हाय। ए बाबोत्या तुमनेंह ईत केरावीन तुमांअ मोनाहांम चोख्खो वीचार जागवांअ मांयुं ईं बेनुं कागलें लेख्येंह। 2 जुना जोमानाम पोरमेहेराअ गोठ जाहेर केअनारा पोवीतोर आदमीहीं जे गोठ्या जाहेर केअल्या ते, आने मालीखांय ने वाचावनारांह जो हुकोम तुमनेंह तीयांय मोकलुअला तुमांअ सेवोकुंअ मारफोते देदाह ते, तुमां ईत केरा। 3 आने पेअलांम-पेअलांअ तुमां ईं ईत केरा का, सेल्ला दीहाहांम सोताअ खाराब मोर्जींअ पोरमाणे जीवनारा लोक तुमांअहीं आवीअ। ते ख्रीस्त फाचो आवनारो हाय तीया बाबोताम तुमांअ मोस्कुरी कीअ, 4 आने तुमनेंह फुचीअ का, “तीयांय फाचो आवांअ वोचोन देदलोंकने? तीयाअ काय वीयों? आपुअ आगलेंअ डायें मोय गीयें। तीयाहांअ जोमानामनेअ आमी आपुअ जोमानाम, पोरमेहेरांय दुन्या बोंणावली तांहांअ जेंहडों आथों, तेंहडोंज बादों हाय। काय बी बोदलाअयों नांह।” 5 ते लोक जांय-जोवीन ए हाच्या बाबोत्या वीहराय जातह का, खुब वोखत पेअलांअ पोरमेहेरांय हुकोम कीईन जुग आने तोरती बोंणावी आने तीयांय पांअयांमेनेअ तोरतील जुदी पाळी आने तीयुअ बादी वेल पांय रे एंहडों गोठव्यों। 6 हातींअ तीयांय पांअयांकींअज, मोंजे का, रेलाअ पांअयांकींअज जुनी दुन्यामेरीअ वोस्ताहांअ नास केअलो। 7 पेन पोरमेहेराल नांह मानतें तेंहडा खाराब मांहांहांअ नीयाय कीईन तीयाहांअ नास केरांअ दीह लोगुंअ आमीरीअ जुगाल ने तोरतील आगीकींअ बाली टाकांअ खातुर पोरमेहेरांय सोताअ तीयाज हुकोमुकींअ राखी थोव्याह।
8 पेन मांअ मेराला दोस्दारुहुं, ए बाबोत वीहराय मां जातें का, पोरमेहेराअ नोजराम एक दीहाअ ने हाजार वोरसांअ काय फेर नांह। ते बेनुं तीयाअ खातुर हारकेंज हाय। 9 खुब मांहेंअ वीचारतेंह का, मालीखांय फाचो आवांअ वोचोन देदोंह तों पुरों केरांअ तो वाअ लागवेह। पेन होकीकोतुम तेंहडों नांह। मालीख फाचो आवांअ वाअ नांह लागवुअतो। उलटों, तो तुमाहांपेअ धीरोज राखेह। काहाका, केडाअ बी नास नांय वेअ पेन बादें मांहेंअ सोताअ पापाहांअ खातुर दुखी वीईन ते सोळी दे, एंहडी तीयाअ मोर्जी हाय। 10 पेन मालीख फाचो आवीअ तो दीह, बांड आवे तेंहकींअ एककायुंअज आवी जाय। तीदीह खुब मोडो आवाज वीअ। तो आवाज वेअताज जुग ओलुप वीअ जाय ने जुगुंहमेर्याअ वोस्तु बी बोलीन नास वीअ जाय। आने तोरती ने तीयुपेअ जोंबी काय हाय तों बादों बोली जाय।
11 ईयु बादी वोस्ताहांअ नास एंहकींअ कीईन वेअनारो हाय तीयाअ लीदे, तुमांअ केंहडा बोंणांअ जोजे? तुमांअ जीवोन पोवीतोर वेरांअ जोजे आने पोरमेहेराअ मोर्जी पोरमाणे तुमांअ जीवांअ जोजे। 12 पोरमेहेर दुन्याअ नीयाय कीअ तीया दीहाअ तुमां वाट जोवतेंह, आने तो दीह माहरी आवे तीयाअ खातुर बोंणे तोतीअ मेहनोत केअतेंह। तीदीह जुग बोलीन नास वीअ जाय, जुगामेर्याअ वोस्तु बी नास वीअ जाय। तीदीह जुगामेर्याअ वोस्तु आगीकींअ बोलीन नास वीअ जाय। 13 पेन पोरमेहेरांय आपनेंह देदला वोचोनु पोरमाणे नोवी जुग आने नोवी तोरती आवे तीयाअ आपुंह वाट जोवतेंह। तीयु नोवी दुन्याम हाचें मांहेंअज रीअ। 14 मांअ मेराला दोस्दारुहुं, तुमां तीया दीहाअ वाट जोवतेंह तीयाअ लीदे, पोरमेहेराअ नोजराम चोख्खें आने काय बी डागु वोगुराअ, आने तीयाअरी सांतीवालो सोबोंद राखांअ खातुर बोंणे तोतीअ मेहनोत केरा। 15 आने बादें मांहेंअ वाचाय जाय तीयाअ खातुर आपुअ मालीख बादा मांहांहांअ खातुर धीरोज राखेह तों तुमां मानी ला। आपुअ मेराला पावुह पावुलुंह बी पोरमेहेरांय तीयाल देदला गीयानुकींअ तुमनेंह एंहकींअज लेख्योंह।
16 तीयाअ बादा कागलांहम ईयु बाबोताम तीयांय एंहकींअज लेख्योंह। तीयाअ कागलांहम थोळ्याक गोठ्या होमजांअ ओगर्या हाय, आने जे लोक ख्रीस्ती बोद नांह हीकया आने वीसवासाम काचा हाय ते लोक, जेंहकींअ ते बीहरा पोवीतोर लेखाणाहांअ उलटो ओर्थो केअताह, तेंहकींअ पावुलाअ कागलांअ बी उलटो ओर्थो केअताह। तीयाअ लीदे, नीयायाअ दीह तीयाहांअ नास वीअ।
17 पेन मांअ मेराला दोस्दारुहुं, तुमां पेअलांअनेअ ए गोठ जांअतेंह तीयाअ लीदे, खाराब लोकाहांअ खोटी वाटे जायन तुमां वीसवासामनेअ पोळी नांय जा तीयाअ कलजी राखा। 18 पेन तुमां आपुअ मालीख आने वाचावनारा ईसु ख्रीस्तुअ मेरबानीअ ओनुभोव वादारे ने वादारे केरा, आने तीयाल वादारे ने वादारे ओअखा!
बादें मांहेंअ तीयाल आमी ने कायोम मोडाय आने मान देतें रे! आमेन!