पीतोरांय लेखलों पेअलोंअ कागलों
ईया कागलाअ बाबोताम बेन गोठ्या
पीतोरांय ईं कागलों “हानोअ आसीया” नांवांअ वीस्ताराअ उत्तोरुअ वेल्याअ भागाम वेरगाय गेहला ख्रीस्ती लोकाहांपेअ लेख्यों। ईया ख्रीस्तींहन तो ईया कागलाम “पोरमेहेरांय पोसोंद केअला लोक” एंहकींअ आखेह। ईं कागलों लेखांअ खास कारोण ईं आथों का, एंहें-तेंहें वेरगाय गेहला ख्रीस्ती लोकाहांपेअ खुब सोतावोण्या ने दुखें आवी पोळलें एंहडा सोमोये तीयाहांन उफ मीले। पीतोर ईं कागलों वाचनारांहन ईसु ख्रीस्तुअ हारी गोठीअ बाबोताम आने तीयाअ मोत, तीयाअ फाचा जीवता उठांअ, तीयाअ फाचा आवांअ बाबोताम तीयांय जों वोचोन देदोंह तीया बाबोताम ईत केरावेह। हातींअ पीतोर तीयाकींअ जे मोडी आस्या मीलेह तीया बाबोताम ईत केरावेह, आने तीयाकींअ तीयाहांन तो उफ देहे। ईयु आस्याल धीयानाम राखीन ते सोताअ दुखें वेठी ले एंहडी तो तीयाहांन सालाह देहे। तो आखेह का, तें दुखें ता, तीयाहांअ वीसवास खेरो हाय का नांह तों पारखांअ खातुरुज हाय एंहकींअ मानुलोंअ, आने ईसु ख्रीस्त फाचो आवीअ तीदीह तो तीयाहांन, तें दुखें तीयाहां वेठयें तीयाअ, मोडो बोदलो दीअ एंहडी खातरी राखुलोंअ।
दुखाहांअ वोखत तीया वाचनारांहन उफ देता-देता, पीतोर तीयाहांन कालावाला केअहे का, ते ख्रीस्तुअ लोकाहांन सोबे तेंहकींअ जीवे।
ईया कागलामेरीअ बाबोतीहींअ रुपरेखा
आगली गोठ १:१-२
पोरमेहेर लोकाहांन तीयाहांअ पापाहांअ सीक्सामेनेअ केंहकींअ वाचावेह १:३-१२
पोवीतोर रीते जीवांअ हीकामोण १:१३-२:१०
दुख ने सोतावोणीअ वोखत ख्रीस्तींअ जोवाबदार्या २:११-४:१९
ख्रीस्ती गोरीबळो सोबाव आने सेवा ५:१-११
सेल्या गोठ्या ५:१२-१४