पीतोरांय लेखलों पेअलोंअ कागलों
1
सालामाअ गोठ
1 रोम राज्याअ पोंतु, गालातीया, कापादोकीया, आसीया आने बीथीनीया वीस्तारुंहम वेरगाय जायन पोरदेसींअ तोरीके रेनारा पोरमेहेरांय पोसोंद केअला लोकुंह! ईसु ख्रीस्ताअ खास चेलो आंय पीतोर तुमनेंह मांअ सालाम देता ईं कागलों लेखुंह। 2 तुमां ईसु ख्रीस्तुअ हुकोमा पोरमाणे वोरता, आने तीयाअ रोगुतुकींअ तुमांअ पाप तुवाय जाय, तीयाअ खातुर, पोरमेहेर बाहकांय सोताअ ईरादा पोरमाणे तुमनेंह पोसोंद केअयाह। आने पोवीतोर आत्मांय तुमनेंह चोख्खा केअयाह।
पोरमेहेर तुमाहांपेअ पुरी रीते मेरबानी केअ, आने तुमनेंह पुरी रीते सुख-सांती दे!
कायोमाअ जीनगीअ आस्या
3 आपुंह आपुअ मालीख ईसु ख्रीस्तुअ पोरमेहेर आने बाहकाअ गुणगान केअजी! तीयांय ईसु ख्रीस्तुल मोअलामेनेअ फाचो जीवतो केअयो, आने तीयाकींअ तीयांय सोताअ मोडी मेरबानीअ लीदे, आपनेंह नोवों जोन्मो देदोंह, आने आपनेंह एंहडी आस्या मीलीह का, आपुंह कायोमाअ खातुर जीवुंह। 4 पोरमेहेरांय सोताअ लोकाहांन वारसा तोरीके दांअ जे खुब आसीरवाद राखी थोव्याह, ते मीलवांअ आपुंह वाट जोवतेंह। तीयांय ते आसीरवाद तुमांअ खातुर होरगाम हाचवी राख्याह। तींहीं ते आसीरवाद नास नांय वेअ एंहडा, डाग नांय लागे एंहडा, आने झाका नांय पोळे एंहडा हाय। 5 आने ते आसीरवाद तुमांअ खातुर हाय। तुमांअ पापाहांअ सीक्सामेनेअ पोरमेहेर तुमनेंह वाचावांअ हाय तीयाअ सेल्ला सोमोयाम तुमां पुरी रीते ओनुभोव केरा तीयाअ खातुर, पोरमेहेरांय तुमनेंह सोताअ ताकोताकींअ बादी जातीअ आफोतुमनेअ हाचवी राख्येंह।
6 जे जाती-जातीअ कोसोटया तुमांअ जीवोनाहांम आवत्याह तीयुहुंअ लीदे आमी थोळाक वोखत तुमांअ दुखी वेरांअ पोळेह तेबी खुस वेरा। काहाका, पोरमेहेर तुमनेंह खुबुज आसीरवाद दांअ हाय। 7 ए कोसोटया तुमांअ जीवोनाम आवांअ कारोण ईं हाय का, तुमांअ वीसवास हाचो हाय का झुटो, तों ते साबीत केअ। नास वीअ सेके एंहडा होनाल बी होनार्यो आगीकींअ पारखेह। तेंहकींअज कीईन, होना केअता वादारे कींमोतुवाला तुमांअ वीसवासुल बी पोरमेहेर कोसोटींहकींअ पारखेह। जो तुमां कोसोटींअ वोखत बी तुमांअ वीसवास नांय सोळा ता, ईसु ख्रीस्त फाचो आवे तांहांअ पोरमेहेर तुमांअ गुणगान कीअ। आने तुमनेंह मान दीईन तुमांअ मोडाय कीअ। 8 तुमां ईसुल नांह देख्यो तेबी, तुमां तीयापेअ माया राखतेंह। आने आमी बी तीयाल तुमां नांह हेअतें तेबी, तीयापेअ वीसवास राखतेंह, आने आखी बी नांय सेकाय ओतेंअ खुस वेअतेंह। 9 काहाका, ईसु ख्रीस्तुपेर्याअ तुमांअ वीसवासाअ लीदे पोरमेहेर तुमनेंह तुमांअ पापाहांअ सीक्सामेनेअ वाचावेह। 10 पोरमेहेराअ गोठ जाहेर केअनारा जुना जोमानाअ सेवोकुहुं बी, पोरमेहेर लोकाहांन तीयाहांअ पापाहांअ सीक्सामेनेअ वाचावेह तीया बाबोताम कालजी राखीन होदणी ने तापास केअली, आने पोरमेहेर तुमनेंह तुमांअ पापाहांअ सीक्सामेनेअ वाचावांअ आथो तीया बाबोताम तीयाहां भोवीसवाणी बी केअली। 11 ख्रीस्तुअ आत्मा पोरमेहेराअ गोठ जाहेर केअनारांअ माज रीईन तीयाहांन एंहकींअ भोवीसवाणी केरावत्लो का, ख्रीस्तुअ दुखें वेठांअ पोळीअ, आने तो मोय, आने हातींअ तो खुब मान मीलवीअ। पेन ईं बादों केंहडीवेल बोंणीअ ने केंहकींअ बोंणीअ तों होदांअ ते सेवोक कोसीस केअत्ला। 12 आने पोरमेहेरांय तीयाहांन होमजावलों का, जीयु गोठीहींअ बाबोताम ते भोवीसवाणी केअत्ला, ते तीयाहांअ फायदाअ खातुर नांय आथ्या, पेन तुमांअ फायदाअ खातुर आथ्या। आने तुमनेंह ख्रीस्तुअ बाबोताअ हारी गोठ जाहेर केअनारा चेलाहां, पोरमेहेरांय होरगामेनेअ मोकलुअला पोवीतोर आत्माअ मोदोताकींअ, तुमनेंह आमी ईयु गोठीहींअ बाबोताम आख्योंह। होरगाअ दुत बी ए बादया गोठ्या जांणांअ खुब मोर्जी राखताह।
पोवीतोर रीते जीवा!
13 तीयाअ लीदे, तुमांअ मोने तीयार राखा आने चेतीन रा। आने ईसु ख्रीस्त पोरगोट वीअ तांहांअ पोरमेहेर मेरबानी कीईन तुमनेंह दीअ ते हार्या वोस्तु मीलवांअ पुरी आस्या राखा। 14 पोरमेहेराअ हुकोमा पोरमाणे चाला, आने खेरा पोरमेहेराल तुमां ओअख्यो तीयाअ पेअलांअ तुमांअ जीवोनाहांम जे खाराब मोरज्या आथ्या, तीयुहुंअ पोरमाणे मां जीवतें। 15 पेन उलटों, तुमनेंह सोताअ राज्याम हादनारो पोरमेहेर जेंहकींअ पोवीतोर हाय तेंहकींअ, तुमां बी तुमांअ बादी चाल-चोलगोतींहम पोवीतोर बोंणा। 16 काहाका, ईयु बाबोताम पोवीतोर लेखाणाहांम एंहकींअ लेखलों हाय का, “पोरमेहेर आखेह का, ‘आंय पोवीतोर हाय, तीयाअ लीदे तुमां बी पोवीतोर बोंणा।’”
17 दोरेक मांहांय जों केअयोंह, तीयाअ पोरमाणे भेदभाव राख्या वोगुर बादा लोकाहांअ नीयाय केअनारा पोरमेहेराल ओरुज केअतीअ वोखत, तुमां तीयाल बाहको आखतेंह। तीयाअ लीदे, तुमां ईयु तोरतीपेअ पोरदेसींअ तोरीके जीवतेंह तांहांअ, तीयाअ बीख राखा आने तीयाल मान दा। 18 तुमांअ जुना जीवोनाअ रीत रीवाजा ंहमनेअ मोंजे का, तुमांअ आगलाअ डायांहपनेअ तुमनेंह मीलला नोककामा रीत-रीवाजा ंहमनेअ तुमनेंह सोळवांअ पोरमेहेरांय केंहडी कींमोत चुकवीह, तों तुमां ईत केरा। तुमनेंह सोळवांअ खातुर पोरमेहेरांय, कींमोत गोमावी देनारा चांदी का होना जेंहडी वोस्ताहांकींअ तुमांअ कींमोत नांह चुकवी। 19 पेन तीयांय, खामी वोगुराअ का डागु वोगुराअ घेटाअ होच जो ख्रीस्त पुरी रीते पोवीतोर आथो, तीयाअ खुब कींमती रोगुतुकींअ ते कींमोत चुकवीह आने तुमनेंह सोळव्येंह। 20 पोरमेहेरांय दुन्या बोंणावली तीयाअ पेअलांअज, तीयांय तुमनेंह वाचावांअ खातुर ख्रीस्तुल पोसोंद केअलो। पेन तो ख्रीस्त तुमांअ फायदाअ खातुर ईया सेल्ला दीहाहांम तोरतीपेअ पोरगोट वीयो। 21 आने जीया पोरमेहेरांय तीयाल मोअलामेनेअ फाचो जीवतो कीईन मोडाय देदी, तीया पोरमेहेरापेअ तीयाअ मारफोते तुमां वीसवास राखतेंह, आने एंहकींअ कीईन तुमांअ वीसवास आने आस्या तीयापेअ रेहे।
वीसवास्यांअ एक-बीहराअरी वेहवार
22 तुमां पोरमेहेराअ बाबोताअ हाची गोठीअ हुकोम पाल्योह, आने तीयाकींअ तुमां सोताल चोख्खें केअयेंह, आने बीहरा वीसवास्यांहपेअ हाची माया बी राखी सेकतेंह। तीयाअ लीदे, पुरा मोनाकींअ एक-बीहरापेअ हाची माया राखजा। 23 तुमनेंह नोवों जोन्मो देनारें ता, मोय जानारें याहकी-बाहको नांह, पेन तों देनारो ता, कीदीह बी नांह मोअनारो पोरमेहेर हाय। तीयांय कायोम रेनारी सोताअ गोठीकींअ तुमनेंह नोवों जोन्मो देदोंह। 24 पोरमेहेराअ गोठीअ बाबोताम पोवीतोर लेखाणाहांम लेखलों हाय का, “बादें मांहेंअ चाराअ होच हाय। आने तीयाहांअ बादी सोबा फुलांअ होच हाय। चारो हुकाय जाहे आने फुलें गोरी पोळतेंह। तेंहकींअ मांहेंअ ने तीयाहांअ सोबाअ बी नास वेअहे। 25 पेन मालीखाअ गोठ ता कायोमुज रेहे।” मालीखाअ खास चेलाहां जे हारी गोठ तुमनेंह जाहेर केअली ते एज हाय।