2
जीवतो ढोगळो आने पोवीतोर लोक
1 तीयाअ लीदे, बादी जातीअ खोटाय केरांअ सोळी दा! खास कीईन, ठोगांअ, ढोंग केरांअ, आदराय राखांअ, ने बीहरा वीसवासींअ बाबोताम खोटों गोगांअ सोळी दा। 2 जेंहकींअ नोवों जोन्मुअलों पोयरों तीयाअ याहकीअ दुद खांअ मोर्जी राखेह, तेंहकींअ तुमां बी पोरमेहेराअ गोठी रुपी चोख्खों आत्मीक दुद खांअ मोर्जी राखा, ईयाअ खातुर का, तुमां आत्मीक जीवोनाम आगलांअ वादा आने पोरमेहेर तुमनेंह तुमांअ पापाहांअ सीक्सामेनेअ वाचावे। 3 काहाका, जेंहकींअ पोवीतोर लेखाणाहांम लेखलों हाय तेंहकींअ, मालीख कोतोअ मायालु हाय तीयाअ तुमां ओनुभोव केअयोह। 4 जो लोकाहीं नोककामो गोंईन धीक्कारला जीवता ढोगळा होच हाय, पेन पोरमेहेरांय कींमती गोंईन जीयाल पोसोंद केअयोह, तीया मालीख ईसुअहीं तुमां आवा। 5 आने पोरमेहेर जों आत्मीक मोंदीर बांदेह, तों बोंणावनारा जीवता ढोगळाहांअ होच तुमां बी चोणाअतें जातेंह। आने तीया मोंदीराअ भागुंअ तोरीके तुमां ईसु ख्रीस्तुअ मारफोते पोरमेहेराल पोसोंद पोळे तेंहडा आत्मीक भोग चोळवुअनारा पोवीतोर पुंजारा वीअहा। 6 पोवीतोर लेखाणाहांम एंहडो लेख्योंह का, “मांयुं एकाल पोसोंद केअयोह, का जो खुब कींमोतुवाला ढोगळाअ होच हाय, आने आंय तीयाल, आत्मीक मोंदीराल मोजबुत राखनारा ढोगळा तोरीके सीयोनुम थोवुंह। जोंबी मांहुंअ तीयापेअ वीसवास राखीअ, तीयाअ कीदीह बी ओपमान नांय वीअ।” 7 तीयापेअ वीसवास राखनारा तुमांअ खातुर ओ ढोगळो खुब कींमती हाय। पेन तीयापेअ वीसवास नांह राखनारांअ खातुर ता तो पोवीतोर लेखाणाहांम लेख्या पोरमाणे बोंणीअ। मोंजे का, “बोंगलो बांदनाराहां नोक्कामो गोंअलो तोज ढोगळो, बोंगलाल मोजबुत राखनारो ढोगळो बोंण्योह।” 8 आने बीहरा लेखाणाहांम तीया बाबोताम लेखलों हाय का, “मांहेंअ तीया ढोगळाअरी ठोकायन पोळी जाय।” तें हारी गोठीअ हुकोम नांह मानतें तीयाअ लीदे तें पोळी जातेंह। आने तें एंहकींअ कीईन पोळी जाय तेंहडोंज पोरमेहेरांय बी नोक्की केअलों। 9 पेन तुमां ता, पोरमेहेरांय सोताअ वेरांअ खातुर पोसोंद केअला लोक, आने पोरमेहेर राजाअ सेवा केअनारा पुंजारा, ने पोरमेहेरांय सोताअ बोंणावांअ खातुर दुन्यामनेअ ओलोग केअला लोक, आने पोरमेहेराअ सोताअज लोक हाय। तीयांय तुमनेंह आत्मीक आंदारामनेअ नींगी आवांअ ईयाअ खातुर हादयेंह का, तुमां पोरमेहेराअ हाचायुअ उजवोळ मीलवा। तीयांय जें मोडें कामें केअयेंह तीया बाबोताम तुमां बीहरा लोकाहांन आखा तीयाअ लीदे, तीयांय तुमनेंह पोसोंद केअयेंह। 10 पेअलांअ ता, तुमां पोरमेहेराअ लोक नांय आथा, पेन आमी तुमां तीयाअ लोक हाय। पेअलांअ पोरमेहेरांय तुमाहांपेअ दाया नांह केअयी, पेन आमी तीयांय तुमाहांपेअ दाया केअयीह। 11 मांअ मेरालाहां, तुमनेंह “थोळाक सोमोयाअ खातुरुज ईयु दुन्याम रेनारें आने पारकें” एंहकींअ होमजीन आंय तुमनेंह कालावाला कीअहुं का, तुमांअ पापी मोर्जींअ पोरमाणे चानांअ सोळी दा! 12 ख्रीस्तुपेअ वीसवास नांह राखनारांअ आगलांअ तुमांअ चाल-चोलगोत्या हार्या राखा, ईयाअ खातुर का, तें तुमनेंह खाराब कामें केअनारें गोंईन तुमांअ वीरुद खोटों गोगे तांहांअ तुमांअ हारें कामें देखीन तीयाहांन मानांअ पोळे का तुमां ता हारें हाय। तीयाअ लीदे, पोरमेहेर लोकाहांअ नीयाय कीअ तीदीह तें मांहेंअ तुमांअ लीदे पोरमेहेराअ गुणगान कीअ। 13 मालीखाअ खातुर तुमां, मांहांहां नीमला बादा ओमोलदाराहांअ आदीनुम रेजा: राजाअ आदीनुम रेजा, का जो बादा मांहांहांअ मोडांम-मोडो आदीकारुवालो हाय। 14 तेंहकींअज राजपालुंअ आदीनुम बी रेजा! तीयाल ता राजांय, खाराब कामें केअनाराहांन साज्या दांअ आने हारें कामें केअनाराहांन साबासी दांअ खातुर नीम्योह। 15 ओकली वोगुराअ मांहेंअ जांअया वोगुर केअतेंह ते गोठ्या तुमांअ हारा कामाहांकींअ बोंद पाळा एंहडी पोरमेहेराअ मोर्जी हाय। 16 तुमां पापाअ गुलामीमेनेअ सुटी गेहला लोक तोरीके जीवोन जीवा। पेन ईयु सुटुकींअ तुमनेंह खोटों केरांअ होक मील्योह एंहकींअ तुमां मां धारता आने पोरमेहेराअ सेवा केअनारा तोरीके जीवोन जीवा। 17 बादाहांन मान दा। बीहरा वीसवासी लोकाहांपेअ माया राखा। पोरमेहेराअ बीख राखा, आने राजाल मान दा। 18 चाकोराहां, तुमांअ सेटाहांअ आदीनुम रेजा आने तीयाहांन पुरी रीते मान दा। मायालु ने हारा सेटांयन ओतोंअज नांय, पेन तुमांअरी कोळोक रीते वोरतुअनारा सेटांयन बी मान दा। 19 काहाका, पोरमेहेर तुमनेंह हेअनारो हाय तों जांयन, जो तुमां काय बी खोटों नांय केअयों वीअ तेबी वोगुर गुने तुमां दुखें वेठा ता, पोरमेहेर तुमनेंह तीयाअ खातुर आसीरवाद दीअ। 20 जो तुमां खोटों केअतेंह आने तीयाअ लीदे मार खातेंह ता, तीयाअ खातुर पोरमेहेर तुमनेंह आसीरवाद नांय दे। पेन जो तुमां हारों कीईन बी धीरोज राखीन मार खातें वीअ ता, तीयाअ लीदे पोरमेहेर तुमनेंह आसीरवाद दीअ। 21 खोरेखोर ता, एंहडें दुखें वेठांअज पोरमेहेरांय तुमनेंह हादयेंह। काहाका, ख्रीस्तुंह सोतेज तुमांअ खातुर दुखें वेठयेंह, आने तो तुमांअ नोमुनो हाय। तीयाअ लीदे, जेंहकींअ तीयांय धीरोज राखीन दुखें वेठयें, तेंहकींअ तुमां बी धीरोज राखीन दुखें वेठा। 22 तीयांय काय बी पाप नांह केअयो, आने तो कीदीह बी झुटों नांह गोग्यो। 23 आने तीयाअ दुसमोनुहुं तीयाअ नींदा केअयी तांहांअ, तीयाहांअ होंबी नींदा नांह केअयी। आने तीयाहां तीयाल दुखें पाळ्यें तांहांअ, तीयाहांन बी दुखें पाळांअ तीयांय धोमकी नांह देदी। पेन तीयांय हाची रीते नीयाय केअनारा पोरमेहेराल नीयायाअ खातुर सोताअ मुस्कुली होपी देदी। 24 आपुंह पाप नांय केअजी आने हाची रीते जीवजी तीयाअ खातुर, ख्रीस्तुंह आपुअ पापाहांअ सीक्सा सोतेज वेठी लेदी आने तो कुरुसापेअ मोअयो। तीयाअ दुखुंहकींअ तुमां हारें वीअ गीयेंह। 25 पेअलांअ तुमां टाकाय गेहला घेटाहांअ होच आथें। पेन आमी पोरमेहेर तुमनेंह हाचा भारवाळाअहीं आने तुमांअ आत्माहांन हाचवुअनाराअहीं, मोंजे का, ख्रीस्तुअहीं फाचो लालोह।