3
बायाहांअ आने आदमींअ एक-बीहराअ आर्योअ वेहवार
1 तेंहकींअज कीईन ख्रीस्ती बायुहुं, तुमां तुमांअ कोअवालाहांअ आदीनुम रा, ईयाअ खातुर का, जो तीयाहांमेर्याअ थोळाक आदमी हारी गोठीपेअ वीसवास नांय राखता वीअ ता, तीयाहांअरी तीयु गोठीअ बाबोताम वाद-वीवाद केअया वोगुर तुमां सोताअ हारी चाल-चोलगोतींहकींअ तीयाहांन तीयु गोठीपेर्याअ वीसवासाम लावी सेका। 2 काहाका, ते तुमांअ चाल-चोलगोत्या कोत्याअ चोख्या आने मानुवाल्या हाय तों हीअ, आने सोताअ मेतेज हारी गोठीपेअ वीसवास राखीअ। 3 बीहराहांन देखाअनार्या वोस्ताहांकींअ, मोंजे का, वेणींहकींअ, का होनाअ दागीनांहकींअ, का हारा-हारा पोतळांहकींअ तुमां सोताल सोबाल्या मां केअत्या। 4 पेन उलटों, तुमांअ सोबा केडाल बी नांय देखाअनारा तुमांअ मोनाहांअ सोबा वेरांअ जोजे, मोंजे का, कायोम टीकनारा तुमांअ गोरीबळा सोबावुकींअ, आने कायोम टीकनारी सांतीकींअ वेरांअ जोजे। तेंहडीज सोबा पोरमेहेराअ नोजराम खुब कींमती हाय। 5 काहाका, जुना जोमानाम पोवीतोर बाया, जे पोरमेहेरापेअ आस्या राखतल्या ते, सोताअ कोअवालाहांअ आदीनुम रीईन सोताल सोबाल्या केअत्ल्या। 6 सारा तीयुहुंमेरीअज एक बाय आथी। तीयुंय तीयुअ कोअवाला आबराहामाअ आखलों मानलों। ते तीयाल, “ओ मांअ धोणी” एंहकींअज आखत्ली। जो तुमां हारें कामें केअत्या वीअ ने केडाअ बी बीख नांय राखत्या वीअ ता, तुमां आमी आत्मीक रीते साराअ पोयर्या हाय। 7 तेंहकींअज कीईन आदमीहीं, तुमांअ कोअवाल्या तुमांअ केअता नोबल्या हाय तों धीयानाम राखीन तीयुहुंन मान देजा। आने तीयुहुंअरी सांतीअ रीते रेजा। काहाका, तुमांअ होच तीयुहुंन बी पोरमेहेर भेटु तोरीके नोवों जीवोन देहे। तुमां एंहकींअ कीईन तीयुहुंअरी वोरताह ता, तुमांअ ओरुजुल ओळचोंण नांय आवे।
ख्रीस्तुअ दुख आने ख्रीस्ती मांहांअ दुख
8 तुमनेंह बादाहांन जे सेल्ली बाबोत आंय आखांअ मागुंह ते ए हाय का, तुमां एक-बीहराअरी होप कीईन रा। आने ख्रीस्ती पावु-बोंअयुंअ तोरीके, एक-बीहरापेअ माया राखा, दाया राखा, आने एक-बीहराअरी गोरीबळा सोबाव राखा। 9 तुमांअ खोटों केअनारांअ तुमां बी खोटों कीईन बोदलो मां वलतें, आने तुमनेंह हाराप देनाराहांन तुमां बी हाराप दीईन बोदलो मां वालतें। पेन उलटों, तीयाहांन आसीरवाद दीईनुंज बोदलो वाला। काहाका, पोरमेहेरांय तुमनेंह सोताअ लोक बोंणांअ हादयें तांहांअ तीयांय तुमनेंह जों केरांअ आखलों तों ईं हाय का, तुमां बीहराहांन आसीरवाद दा। 10 ईत केरा, पोवीतोर लेखाणाहांम लेखलों हाय का, “जोंबी मांहुंअ लांबी जीनगी जीवांअ मागेह, आने सोताअ जीनगीम हारा दीह हेरांअ मागेह, तीयाअ खोटों नांय गोगांअ जोजे ने झुटों गोगांअ सोळी दांअ जोजे। 11 आने तों खोटों केरांअ सोळी दीईन हारोंज केअ, आने बीहराहांअरी एक होप कीईन जीवांअ कोसीस केअ। 12 काहाका, मालीख हाचा मांहांहांपेअ नोजुर राखेह आने तीयाहांअ ओरुज उनायन जोवाब देहे। पेन तो खोटों काम केअनारांअ वीरुद केअहे।” 13 जो तुमां बीहराहांअ हारों केरांअ खुब मोर्जी राखतें वीअ ता, तुमांअ खोटों केअनारों केडों? 14 पेन जों खेरों हाय तों कीईन बी जो तुमनेंह दुखें वेठांअ पोळे ता, तुमां पोरमेहेराअ नोजराम खुब सुखी हाय। तुमनेंह दुख पाळनारांहन मां बीतें, आने तीयाहांअ पारवाअ मां केअतें। 15 पेन तुमांअ मोनाहांम ख्रीस्तुल पोवीतोर माना, ने तो तुमांअ मालीख हाय एंहकींअ होमजीन तीयाल मान दा। “ख्रीस्तुपेअ तुमां वीसवास काहा केअयो?” एंहकींअ जो केडों तुमनेंह फुचे ता, तीयाल तीया बाबोताम बादों होमजावांअ तुमां कायोम तीयार रा। 16 पेन गोरीबळा सोबावुकींअ आने तीयाल मान दीईन तों तीयाल होमजावा। खेरा-खोटाअ जाण केअनारा तुमांअ माजर्याअ आत्माल चोख्खो राखा, ईयाअ खातुर का, बीहरें मांहेंअ तुमांअ नींदा केअ तांहांअ, ख्रीस्तुपेअ वीसवास केअनारांअ तोरीके तुमांअ हारी चाल-चोलगोतींअ बाबोताम खोटों गोगनारें नाजवाय जाय। 17 काहाका, तुमां दुखें वेठा एंहडी जो पोरमेहेराअ मोर्जी वीअ ता, खाराब कामें कीईन तीयाअ लीदे दुखें वेठा तीयाअ केअता हारें कामें कीईन तीयाअ लीदे दुखें वेठा, तों वादारे हारों हाय। 18 ईत केरा का, तुमनेंह पोरमेहेराअहीं लीअ जांअ खातुर ख्रीस्त सोते तुमांअ बोदले मोअयो। तो तुमांअ पापाहांअ खातुर एकुज वोखत मोअयो। तों खेरों मांहुंअ आथों का जों खाराब मांहांहांअ खातुर मोअयों। लोकाहीं तीयाल सोरीलाअ रीते माय टाक्यो। पेन पोरमेहेरांय तीयाअ आत्माल जीवतो राख्यो। 19 आने जींहीं मोअला मांहांहांअ आत्माहांन पोरमेहेरांय राख्याह, तींहीं आत्माम जायन तीयांय तीयाहांन बोद देदो। 20 ते आत्मा, जुना जोमानाम नुह जाहाज बोंणावत्लो तांहांअ जीया मांहांहां पोरमेहेराअ आखलों नांह मान्यों आने जे सोताअ पापाहांअ खातुर दुखी वीईन ते सोळी दे एंहकींअ पोरमेहेर धीरोज राखीन वाट जोवत्लो, तीया मांहांहांअ आत्मा आथा। आने तीयाहांअ होच बीहरा जीया लोकाहीं पोरमेहेराअ आखलों नांह मान्यों, तीया लोकाहांअ बी ते आत्मा आथा। जें थोळेंकुज मांहेंअ जाहाजाम आथें तें आंठ मांहेंअ ओतेंअज रेलाअ पांअयांमेनेअ वाचाय गेहलें। 21 तों रेलाअ पांय बापतीस्माअ पांअयांअ नीसाणी हाय। ईं बापतीस्मा आमी तुमनेंह, पोरमेहेरांय ईसु ख्रीस्तुल मोअलामेनेअ जीवतो केअयो तीयाकींअ तुमांअ पापाहांअ सीक्सामेनेअ वाचावेह। जों बापतीस्मा आपुअ सोरीलाहांअ मोल तुवेह तों खेरों बापतीस्मा नांह, पेन खेरा-खोटाअ जाण केअनारा आपुअ माजर्याअ चोख्खा आत्माकींअ पोरमेहेराल आपुंह देदलें वोचोनेंज खेरों बापतीस्मा हाय, एंहकींअ आंय मानुंह। 22 मोअलामेनेअ फाचो जीवतो वीईन ईसु ख्रीस्त होरगाम गीयोह। आने तींहीं तो, बादा दुतांयपेअ आने होरगाअ बादा ओमोलदारांयपेअ राज केअतो पोरमेहेराअ हुदी वेल बोठोह।