4
बोदलाअल्या जीनग्या
1 ख्रीस्तुंह सोतेज सोरीलाअ रीते दुखें वेठयें। तीयाअ लीदे, तुमां बी तेंहकींअ कीईन दुखें वेठांअ मोन राखा, आने तीयाकींअ सोताल आत्मीक रीते मोजबुत केरा। काहाका, सोरीलाम तुमां दुखें वेठा तांहांअ, तुमां पापी मोर्जीअ काबामनेअ सुटें वीअ जातेंह। 2 आने तेंहकींअ कीईन तुमां ईयु तोरतीपेरीअ बाकी रेहली तुमांअ जीनगी, मांहांहांअ मोर्जींअ पोरमाणे नांय, पेन पोरमेहेराअ मोर्जी पोरमाणे जीवाह। 3 खेरा पोरमेहेराल नांय ओअखुअनारें मांहेंअ जें खाराब कामें केरांअ मोर्जी राखतेंह, तीया कामुंहम तुमां पेअलांअ गोमावलो सोमोय होद वीअ गीयो। पेअलांअ तुमां सीनालों केअत्लें, बीहरें खोटें कामें केरांअ मोर्जी राखत्लें, बीहराहांअरी नाचीन सीनालों केअत्लें, आने पोरमेहेराअ नोजराम नोफरोत केरांअ लायोक हाय एंहडी मुरतींअ पुंजा केअत्लें; एंहडा कामुंहम तुमां सोताअ जीवोनें खोरची टाकलें। 4 पेन आमी तुमां तीया मांहांहांअरी मीलीन तेंहडें खाराब कामें नांह केअतें तीयाअ लीदे तीयाहांन नोवाय लागेह। आने तें तुमांअ नींदा केअतेंह। 5 पेन तीयाहांन तीयाहांअ कामाहांअ हीसाब, जीवता ने मोअला लोकाहांअ नीयाय केरांअ तीयार हाय तीया पोरमेहेराल दांअ पोळीअ। 6 तीयाअ लीदे, मोअला लोकाहांन बी, ते दुन्याम जीवत्ला तांहांअ पोरमेहेराअ सेवोकुहुं हारी गोठ जाहेर केअली। (आने तेहेअनेअ ते ख्रीस्ती बी बोंणला), ईयाअ खातुर का, बीहरा बादा लोकाहांअ होच, तीयाहां बी मोताअ साज्या वेठी तेबी, जेंहकींअ पोरमेहेर जीवेह तेंहकींअ, ते बी सोताअ आत्मीक हायाताम जीवे। 7 ईयु दुन्याअ नास वेरांअ सोमोय पाही आलोह, तीयाअ लीदे चेतीन रा, ने सोताल काबाम राखा, ईयाअ खातुर का, तुमां पोरमेहेराल ओरुज कीअ सेका। 8 खास कीईन, तुमां एक-बीहरापेअ पुरा मोनाकींअ माया राखा। काहाका, जोंबी वीसवासी बीहराहांपेअ खेरी रीते माया राखेह, तों तीयाहां तीयाअ वीरुद केअलों खोटों माफ केरांअ बी तीयार रेहे। 9 आने बोळ-बोळ केअया वोगुर, एक-बीहराल गोवारें राखा। 10 पोरमेहेरांय तुमनेंह जाती-जातीअ वोरदानें देदेंह। तें वोरदानें सोताल हारें कारभारी गोंईन बीहराहांअ फायदाअ खातुर वापरुअजा। 11 जीयाल आत्मीक बोद दांअ वोरदान मील्योंह, तों पोरमेहेरापेनेअ आवनारो बोद दे, आने जीयाल बीहराहांअ सेवा-चाकरी केरांअ वोरदान मील्योंह, तों पोरमेहेरांय तीयाल देदली ताकोतु पोरमाणे बीहराहांअ सेवा केअ, ईयाअ खातुर का, जोंबी काम तुमां केरा, तीयाकींअ ईसु ख्रीस्तुअ मारफोते पोरमेहेराल मोडाय मीले। मोडाय ने आदीकार कायोम तीयाअज रीअ! आमेन!
दुखुंहम खुस रा!
12 मांअ मेराला दोस्दारुहुं, जें आकरें दुखें तुमांअ वीसवासुल पारखांअ खातुर तुमाहांपेअ पोळतेंह, तें दुखें “आमाहांपेअ नांय पोळांअ जोजे तेबी काहा पोळ्यें?” एंहकींअ वीचारीन तुमनेंह नोवाय नांय लागांअ जोजे। 13 पेन तीयाअ बोदले खुस रा। काहाका, जेंहकींअ ख्रीस्तुंह दुखें वेठयें, तेंहकींअज तुमां बी दुखें वेठतेंह। एंहकींअ कीईन खुस रा ता, जांहांअ ईसु तीयाअ मोडायाअ री फाचो आवीअ तांहांअ तुमां वादारे खुस वीअहा। 14 तुमां ख्रीस्तुअ चेला बोंण्याह तीयाअ लीदे बीहरा लोक तुमांअ नींदा केअता वीअ ता, तुमां पोरमेहेराअ नोजराम खुब सुखी हाय। काहाका, पोरमेहेराअ खुब उजवोळावालो पोवीतोर आत्मा तुमांअ माज रेहे। 15 तुमनेंह दुखें वेठांअ पोळतों वीअ ता, तों खुनाअ लीदे, बीहरा खाराब कामुअ लीदे, चोरीअ लीदे, का बीहराहांअ कामाम खोटी रीते माथों मारांअ लीदे नांय वेरांअ जोजे। 16 पेन ख्रीस्ती बोंण्येंह तीयाअ लीदे तुमनेंह जो दुख वेठांअ पोळे ता, तीयाअ लीदे नाजवाअतें मां। पेन उलटों, तुमनेंह ख्रीस्ती आखतेंह तीयाअ लीदे पोरमेहेराअ आभार माना। 17 पोरमेहेर बादा लोकाहांअ नीयाय केरांअ हाय तो दीह पाही आलोह। आने पोरमेहेर पेअलांअ सोताअ लोकाहांअ, मोंजे का, आपुअ नीयाय कीअ। जो तो आपुअ नीयाय पेअलोअ कीअ ता, ईयाअ ओर्थो ओ हाय का, जें मांहेंअ पोरमेहेरापेनेअ आवनारी हारी गोठ नांह मानतें, तीयाहांन तो आकरी सीक्सा दीअ। 18 पोवीतोर लेखाणाहांम लेखलों हाय का, “पापाहांअ सीक्सामेनेअ वाचायांअ हाचा मांहांअ खातुर बी ओगरों हाय। तीयाअ लीदे, जें गुनालें आने पापी हाय, तें तींहमेंनेअ वाचायज नांय सेके।” 19 तीयाअ लीदे, जें पोरमेहेराअ मोर्जी पोरमाणे दुखें वेठतेंह, तें हारें कामें केरांअ चालु राखे आने सोताल पोरमेहेराल होपे, ईयाअ खातुर का, जो सोताअ वोचोन पुरों केअनारो आने तीयाहांन बोंणावनारो हाय तीयापेअ तें पुरो भोरुचो राखे।