5
मोंडोळुंअ वोळीलुंहन सालाह
1 आमी आंय, जो सोते बी वोळील हाय, तुमांअ मोंडोळुंअ वोळीलुंहन कालावाला कीअहुं। ख्रीस्तुंह जें दुखें वेठलें तें मांयुं देख्येंह आने तो फाचो आवीअ तांहांअ मांन बी तीयाअ मोडाय मीलीअ। 2 भारवाळ सोताअ घेटाहांन वाटे-वाटे चालवेह, हाचवेह, आने खावावेह। तेंहकींअ तुमां बी, पोरमेहेरांय तुमांअ देखरेखुम होपला मोंडोळुंअ लोकाहांन आत्मीक रीते चालवा, हाचवा आने खावावा। आने तों तुमां सोताअ फोरोज हाय एंहकींअ गोंईन नांय, पेन उलटों, जेंहकींअ पोरमेहेर मोर्जी राखेह तेंहकींअ, राजी वीईन केरा, आने पोयसाहांअ लोब राखीन नांय, पेन सेवा केरांअ खेरी मोर्जी राखीन केरा। 3 पोरमेहेरांय तुमनेंह होपला लोकाहांअरी सेटाहांअ तोरीके मां वोरतुअता। पेन उलटों, तीयाहांन जेंहडों जीवोन जीवांअ हीकवुअताह तेंहडोंज जीवोन तुमां सोते बी जीवा। 4 तुमां एंहकींअ कीअहा ता, जेंहकींअ रोंमोताअ होरीफायुम जीतनारांहन जीतुअ आर पोवावताह, तेंहकींअ आपुअ बादा वोळीलुंअ उपरी ईसु ख्रीस्त फाचो आवीअ तांहांअ, तो तुमनेंह खुब उजवोळावालों आने कायोम रेनारों ईनाम दीअ।
5 तेंहकींअज कीईन मोंडोळाअ जुवान्याहां, तुमां मोंडोळाअ मोडा लोकाहांअ आदीनुम रा। आने मोंडोळाअ बादा लोकुंह! तुमां गोरीबळा सोबावुकींअ एक-बीहराअ सेवा केरा। काहाका, पोवीतोर लेखाणाहांम लेखलों हाय का, “पोरमेहेर ओभीमान राखनारांअ वीरुद केअहे। पेन तो गोरीबळांहपेअ मेरबानी केअहे।” 6 तीयाअ लीदे, गोरीबळें बोंणीन खुब ताकोतावाला पोरमेहेराल नोंवजा। तांहांअ तो तीयाअ नोक्की केअला सोमोये तुमनेंह मान दीअ। 7 पोरमेहेर तुमांअ चींता राखेह। तीयाअ लीदे, तुमां तुमांअ बादी जातीअ चींता तीयापेअ सोळी दा। 8 सोताल काबाम राखा ने चेतीन रा। काहाका, जेंहकींअ ओळखाअलो सींह वाग, जोंबी मीले तीयाल खाय जांअ होदतो फीरेह, तेंहकींअ तुमांअ दुसमोन सेतान, सोताल काबाम नांय राखनारों जों मीले तीयाल नास केरांअ होदतो फीरेह। 9 तुमां वीसवासाम पाका रीईन तीयाअ हुंबुर वेअजा। ईत राखा का, आखी दुन्याम रेनारा बीहरा ख्रीस्ती वीसवास्यांहन बी ईयुज जातीअ दुखें वेठांअ पोळतेंह। 10 तुमां थोळाक वोखत दुखें वेठाह हातींअ, तुमाहांपेअ खुब मेरबानी केअनारो आने ख्रीस्तुपेर्याअ तुमांअ वीसवासाअ लीदे कायोम तुमनेंह होरगाम तीयाअ उजवोळावाला जागे रांअ हादनारो पोरमेहेर तुमनेंह सुख दीअ आने तुमांअ वीसवास मोजबुत कीअ। 11 ताकोत, राज आने आदीकार कायोम तीयाअज रे! आमेन!
सेल्ली सालाह
12 ईं हानोंअ कागलों मांयुं सीलवानुपेअ लेखाव्योंह। तीयाल आंय ईमानदार ख्रीस्ती पावुह मानुंह। आने आंय कालावाला कीईन तुमनेंह साक्सी दीहुं का, ईं कागलों मांयुं तुमांहपेरीअ पोरमेहेराअ खेरी मेरबानीअ बाबोताम लेखाव्योंह। आने तीयु मेरबानीपेअज भोरुचो राखतें रा। 13 आने तुमांअ होच पोरमेहेरांय पोसोंद केअला ईयु राजधानीमेर्याअ मोंडोळाअ लोक आने मांअ आमीक पोयरो मार्क तुमनेंह सालाम देताह। 14 तुमां ख्रीस्ती मायाकींअ एक-बीहराल सालाम देजा।
ईसु ख्रीस्तुपेअ वीसवास राखनारा तुमनेंह बादाहांन सांती मीले!