5
मालदाराहांन चेतवोंणी
1 मालदारुहुं! आमी तुमां मांअ गोठ उनाया! जें दुखें तुमाहांपेअ पोळनारें हाय तीयाहांअ लीदे तुमां फोके-फोके रोळा। 2 काहाका, तुमांअ माल-मीलकोत कामुअ नांय रीअ, आने तुमांअ पोतळाहांन ओदाअ खाय जाय। 3 पोरमेहेराअ रोगुज ईयु दुन्याअ ओंताअ सोमोयाम तुमां टोलवुअली माल-मीलकोत हाय। तुमांअ होना-चांदीअ कींमोत ओसी वीअ जाय। आने ते, पोरमेहेर लोकाहांअ नीयाय कीअ तीदीह, तुमांअ वीरुद साक्सी दीअ, आने आगीअ होच तुमांअ नास कीअ। 4 ईत केरा का, तुमांअ खेताहांम वाडनाराहांन ठोगीन तीयाहांअ मोजरी तुमां नांह देदी तीयाअ लीदे तें बोंबली-बोंबलीन, “आमांअ मोजरी आमनेंह दा” एंहकींअ फोरीयाद केअतेंह तों उनाया! आने तें रोळतेंह तो आवाज खुब ताकोतावालो मालीख उनाअयोह। 5 ईयु तोरतीपेअ तुमां मोज-सोकुम जीवतेंह। आने सोताल एक दीह खाटकी माय टाकीअ तों जांअया वोगुर पोहाअनारा जोनावोराहांअ होच पोरमेहेर तुमांअ नास केरांअ हाय तीया दीहाअ खातुर तुमां पोहाअतेंह। 6 हाचा मांहांहां तुमांअ वीरुद काय नांह केअयों तेबी, तुमां तीयाहांन गुनालें गोंईन माय टाक्येंह। तें तुमांअ हुंबुंर वीअ नांह सेक्यें।
धीरोज आने पोरमेहेराल ओरुज
7 तीयाअ लीदे, मांअ पावु-बोंअयुहुं, जेंहकींअ खेळुत सोताअ जोमीनाअ कींमती पाक आवे तीयाअ खातुर धीरोज राखीन पेअला ने फाचला वोहरातुअ वाट जोवेह, तेंहकींअ तुमां मालीख ईसु फाचो दुन्याम आवे तांव धीरोज राखा। 8 आंह, तुमांअ धीरोज राखांअ जोजे! मालीख ईसुअ फाचो आवांअ दीह पाही हाय। तीयाअ लीदे, तुमां हींमोत बी राखा!
9 आने मांअ पावु-बोंअयुहुं, पोरमेहेर तुमांअ नीयाय नांय केअ तीयाअ खातुर, तुमां एक बीहराअ वीरुद फोरीयाद मा केअतें। पोरमेहेर माहरीज बादा लोकाहांअ नीयाय कीअ। तीयाअ लीदे, तो नीयाय केअ तीयाअ वाट जोवा।
10 मांअ पावु-बोंअयुहुं, पोरमेहेराअ गोठ जाहेर केअनारा जुना जोमानाअ सेवोक जे मालीखाअ तोरफयाअ गोगला, तीयाहां कोतीअ धीरोज राखीन दुखें वेठलें तीयाअ तुमां वीचार केरा। 11 तीयाहां धीरोज राखीन दुखें वेठयें तीयाअ लीदे, आपुंह तीयाहांन सुखी मांहेंअ गोंअतेंह। दुखाहांअ वोखत जुना जोमानाअ योबुंह केंहडी धीरोज राखली तों तुमां उनाअयेंह। आने आपुअ मालीखांय तीयाल फाचलांअ नेअ केंहडो आसीरवाद देदलो तों बी तुमां जांअतेंह। काहाका, मालीख खुब दायालु ने मायालु हाय।
12 आने मांअ पावु-बोंअयुहुं, खास कीईन ईत केरा का, तुमां केडाल बी वोचोन दा तांहांअ, जुगीअ, का तोरतीअ, का केंहडाअ बी होम मां खातें। तांहांअ पोरमेहेर तुमनेंह सीक्सा नांय केअ। 13 तुमांअ मोंडोळाअ केडों बी केल्ला बी दुखुम वेअ ता, तीयाअ खातुर तो पोरमेहेराल ओरुज केअ। जो केडों खुस वेअ ता, तों पोरमेहेराअ गुणगान केअ। 14 आने तुमांअ मोंडोळाम जों केडों बी आजार्यें वेअ ता, तों मोंडोळाअ वोळीलुंहन हादावे। ते आवीन मांदाल तेल चोपळे आने मालीख तीयाल हारों केअ तीयाअ खातुर मालीखाल ओरुज केअ। आने जो आजार्याहांय एंहडा पाप केअया वीअ का जीयाहांअ कारोणे तो आजार तीयाल लागी वीअ ता, पोरमेहेर तीया पापाहांअ बी माफी दीअ। 15 आने वीसवास राखीन केअली ओरुजुअ मारफोते पोरमेहेर मांदाल हारों कीअ। 16 तीयाअ लीदे, काय बी केरा तांहांअ एक बीहराअ खातुर पोरमेहेराल ओरुज केरा, ईयाअ खातुर का, तो तुमनेंह हारें केअ। एक बीहराअ आगलांअ तुमांअ पाप कोबुल केरा! एक हाचा मांहांअ ओरुजुअ खुब हारी ओसोर पोळेह। 17 पोरमेहेराअ गोठ जाहेर केअनारो एलीया बी आपुअ होच सादारोण मांहुंअ आथों। पेन पोवीतोर लेखाणाहांम आपुंह जेंहकींअ वाचतेंह तेंहकींअ, पांय नांय पोळे एंहडी तीयांय ओरुज केअयी तांहांअ, ईसरायेल देसाम साळातीन वोरसें लोगुंअ पांय नांह पोळ्यों। 18 हातींअ फाची तीयांय ओरुज केअयी तांहांअ, जुगामेनेअ पांय पोळ्यों ने जोमीनाम हारो पाक आलो।