हीबरु ख्रीस्तींहन लेखलों कागलों
ईया कागलाअ बाबोताम बेन गोठ्या
ईं कागलों केडांय लेख्योंह तों आपुंह नांह जांअतें। लेखनारांह ईया कागलाम सोताअ नांव नांह जाणाव्यों। पेन आपनेंह ओतीअ ता खोबुर हाय का, ईं कागलों येहुदींहमनेअ ख्रीस्ती बोंणला लोकाहांपेअ लेखाअलों हाय। एंहकींअ ख्रीस्ती बोंणला लोकाहांन बीहरा येहुदींहमनेअ ओलोग पाळांअ खातुर तीयाहांन ‘हीबरु’ आखत्लें।
ए हीबरु लोक देखीती रीतेज ख्रीस्ती वीसवासाम आगलांअ वादांअ सोळी दीईन फाचा येहुदी वीसवासाम जाता रे एंहडो सोंजोग पेदा वीअ गेहलो। तीयाअ लीदे, ईं कागलों लेखनारो तीयाहांन होमजावांअ मागेह का, पोरमेहेरांय जुना काराराल रोद कीईन मांहांहांअरी नोवो कारार केअयोह। ओ नोवो कारार तीया जुना कारारु केअता वादारे चोळीयातो हाय। जुनो कारार थोळाक वोखताअ खातुरुज आथो आने नोवा कारारुअ खातुर लोकाहांन तीयार केरांअ तीयाअ काम आथों। पोरमेहेर तीयाअ पोयरा ईसु ख्रीस्तंह देदला सोताअ जीवु रुपी भोगुकींअ मांहांहांन तीयाहांअ पापाहांअ सीक्सामेनेअ वाचावेह तों नोवो कारार देखावेह। ओज कारार पोरमेहेरांय मांहांहांअरी केअलो सेल्लो कारार हाय। आमी बीहरा केल्ला बी कारारुअ जोरुल नांह।
ईया कागलाम हीकांअ जेंहडया खास गोठ्या
जुना काराराम भोवीसवाणी केराअली बाबोत ख्रीस्तुंह पुरी केअयीह। मोंजे का, जुनो धारमीक धारो ता भोवीस्यांम आवनारा धाराअ खाली नोमुनोज आथो। आने आमी ख्रीस्त आलोह तीयाअ लीदे, जुना धाराअ जोरुल नांह रेती।
जुना कारारु पोरमाणे ता पोरमेहेराअ आगलांअ गुना वोगुराअ गोंणायांअ खातुर मांहांहांन खुब जातीअ नीयोम पालांअ पोळत्लो। आमी तीयाअ बोदले पोरमेहेरांय एंहडी वाट खोली देदीह का, मांहेंअ खाली ख्रीस्तुंह देदला सोताअ जीवु रुपी भोगुपेअ वीसवास राखीन पोरमेहेराअ आगलांअ गुना वोगुराअ गोंणाय सेकतेंह।
जुना कारारुअ बोदले नोवो कारार देनारो ता पोरमेहेर सोतेज हाय। तीयाअ लीदे, नोवा कारारुअ वीरुद केरुलोंअ पोरमेहेराअ वीरुद केअया बोराबोर हाय।
मांहांहांअ सुटकाराअ खातुर पोरमेहेरांय केअली योज्ना नोवा काराराम पुरी वीयीह। आमी मांहेंअ पोवीतोर बोंणी सेकतेंह आने तीयाअ लीदे तें पोरमेहेराअ हाजरीम रांअ लायोक बोंणतेंह।
मांहेंअ जुग-तोरतीपेअ राज केअ, एज पोरमेहेराअ खास योज्ना आथी। आमी ते योज्ना मांहेंअ ख्रीस्तुअ आर्याअ तीयाहांअ जोळाणुकींअ पुरी कीअ सेकतेंह।
ईया कागलामेरीअ बाबोतीहींअ रुपरेखा
आगली गोठ: पोरमेहेराल पुरी रीते पोरगोट केअनारो ख्रीस्त १:१-३
होरगाअ दुताहांअ केअता ख्रीस्त वादारे चोळीयातो हाय १:४-२:१८
मोसे ने येहोसुवा केअता ख्रीस्त वादारे चोळीयातो हाय ३:१-४:१३
जुना येहुदी पुंजाराअ धारा केअता ख्रीस्तुअ पुंजाराअ धारो वादारे चोळीयातो हाय ४:१४-७:२८
जुना कारारु केअता ख्रीस्तुअ कारार वादारे चोळीयातो हाय ८:१-९:२८
जुना कारारुअ भोगाहांअ केअता ख्रीस्तुंह देदलो तीयाअ भोग वादारे चोळीयातो हाय १०:१-३९
ख्रीस्ती जीवोनाम वीसवासाअ जागो ११:१-१२:२९
पोरमेहेराल राजी राखुलोंअ १३:१-१९
कागलों वाचनारांअ खातुर पोरमेहेराल सेल्ली ओरुज १३:२०-२१
सेल्या गोठ्या १३:२२-२५