फीलेमोनुल पावुलुंह लेखलों कागलों
1
सालामाअ गोठ
1-2 आमांअ मेराला दोस्दार आने हारी गोठ फेलावांअ कामाम आमनेंह मोदोत केअनारा फीलेमोन, ख्रीस्तुअ सेवा केरांअ खातुर जेलाम कोंडाअलो आंय पावुल, तुल मांअ सालाम दीहुं। मांअरी आपुअ ख्रीस्ती पावुह तीमोथी बी तुल सालाम देहे। आरी-आरी तोअ कोअवाली आफीया, जे आमांअ वीसवासी बोंअहीं हाय तीयुल, आने आमांअरी खोटायुअ वीरुद लोळाय लोळनारो तोअ पोयरो आरखीप्पुल, आने तोअ कोअमें जों मोंडोळ चालेह तीयाअ बादा लोकाहांन बी आमांअ सालाम!
3 पोरमेहेर आपुअ बाहको, आने मालीख ईसु ख्रीस्त तुमाहांपेअ मेरबानी केअ आने तुमनेंह सुख-सांती दे।
पोरमेहेराअ लोकुंहपेरीअ फीलेमोनुअ माया आने ईसुपेर्योअ तीयाअ वीसवास
4 मांअ दोस्दार फीलेमोन, जांहांअ बी आंय पोरमेहेराल ओरुज कीअहुं, तांहांअ आंय कायोम तोअ खातुर बी तीयाल ओरुज कीअहुं आने तोअ लीदे तीयाअ आभार मानुंह। 5 काहाका, पोरमेहेराअ बादा लोकुंहपेरीअ तोअ मायाअ बाबोताम आने मालीख ईसुपेर्याअ तोअ वीसवासाअ बाबोताम आंय कायोम उनाअतो रीहुं। 6 आंय पोरमेहेराल ओरुज कीअहुं का, ईसुपेअ वीसवास केअनारांअ तोरीके आपुअ जे आत्मीक सोंगोत हाय तीयुकींअ तुं, ख्रीस्तुअरी जोळाअला आपुअ जीवोनाहांम मीलनारा बादा आसीरवादुंहन पुरी रीते होमजी सेको। 7 मांअ मेराला दोस्दार! पोरमेहेराअ लोकुंहपेरीअ तोअ मायाअ लीदे मांन खुब आनोंद वीयोह आने खुब उफ मील्योह; आने तोअ मारफोते पोरमेहेराअ लोकाहांअ चींता मीटी गीयीह।
ओनेसीमुअ खातुर पावुल फीलेमोनुल कालावाला केअहे
8 ईया कारोणे, आंय हींमोत राखीन तोअपेअ एक मोदोत मागुंह। ख्रीस्ताअ खास चेला तोरीके आंय तुल हुकोम कीईन तोअपेनेअ तों मागी सेकुंह। काहाका, तोअ मांन एंहडी मोदोत केरांअज जोजे। 9 तेबी तोअपेरीअ मांअ मायाअ लीदे, आंय तुल कालावाला कीअहुं। ख्रीस्त ईसुअ खास चेलो आने आमी तीयाअ खातुर जेलाम कोंडाअलो डायों मांहुंअ आंय पावुल तुल कालावाला कीअहुं। 10 आंय जीयाल मांअ सोताअ पोयराअ होच गोंअहुं, तीयापेअ तुं दाया देखावजे एंहडा आंय तुल कालावाला कीअहुं। जेलाम मांयुं केअली सेवाअ लीदे एक जांअ ख्रीस्ती वीसवासी बोंण्योह, आने तीयाल आंय मांअ पोयराअ होचुज गोंअहुं। जीयाअ गोठ आंय कीअहुं तो ता ओनेसीमु हाय। 11 “ओनेसीमु” नांवांअ ओर्थो “कामुअ मांहुंअ” हाय तेबी, पेअलांअ तो तोअ कामुअ नांय आथो। पेन आमी तो मांअ आने तोअ बेनुंअ कामुअ हाय।
12 तो मांअ जीवुअ होच खुब मेरालो हाय। पेन आमी आंय तीयाल तोअहीं फाचो मोकली दीहुं। 13 हारी गोठ जाहेर केरांअ कारोणे आंय जेलाम हाय एंहडो सोमोय तोअ बोदलाम तो मांअ सेवा चाकरी केअ तीयाअ खातुर तीयाल मांअरी राखांअ मांअ वीचार आथो। 14 पेन तुं मांन मोदोत क्योव एंहडी आंय तुल फोरोज पाळांअ नांह मागतो। उलटों, तुं सोताअ राजी-खुसी मांन मोदोत क्योव एंहडी मांअ मोर्जी हाय। तीयाअ लीदे, तोअ राज्या वोगुर आंय ईयु बाबोताम काय बी नांय क्युंव। 15 ओनेसीमु वीसवासी बोंण्यो तीयाअ लीदे कायोम तो तोअरीज रे तीयाअ खातुर, तीयाल तोअहींनेअ पोरमेहेरांयज नाहावी देदलो एंहकींअ मांन लागेह। 16 आमी तीयाल तुं खाली गुलामु तोरीकेज नांय, पेन गुलामु केअता हारो, मोंजे का, तोअ मेराला पावुह तोरीके मानीन राखी लेजे! तो मांअ ता मेराला पावुह हाय। आने एंहकींअ वीअ ता, मांहांअ तोरीके ने मालीखापेअ वीसवास राखनारा तोरीके तो तोअ खुब मेरालो बोंणीअकने?
17 तीयाअ लीदे, जो तुं मांन तोअ आर्योअ मालीखाअ सेवा केअनारो मानतो वीअ ता, मांअज आवकार केअतो वीअ तेंहकींअ तीयाल फाचो आवकारजे। 18 जो तीयांय तोअ काय खोटों केअयों वीअ का, तोअ तीयापेअ लेणों नींगतों वीअ ता, तों मांअ नांवें लेखी लेजे। 19 आंय सोताअ आथे लेखुंह का, आंय पावुल तों बादों पोय देहें। मांअ मारफोते तुं ख्रीस्ती बोंण्योह तीयाअ लीदे, तुं मांअ देवादारेंअ होच हाय तों आंय आखांअ नांह मागतो। 20 तीयाअ लीदे, मांअ मेराला पावुह, मालीखाअ खातुर मेरबानी कीईन मांन ए मोदोत केअजे! आने एंहकींअ कीईन ख्रीस्तुअ आर्याअ आपुअ जोळाणुअ लीदे मांअ चींता मीटावजे!
21 आंय जों तोअपेअ मागुंह तों तुं कीअहो एंहडी खातरी राखीन आंय ईं कागलों तुल मोकलुंह। खोरेखोर मांन खोबुर हाय का, तुं मांअ माग्या केअता बी वादारे कीअहो। 22 आने मांअ खातुर रांअ जागो तीयार केअजे! काहाका, आंय एंहडी आस्या राखुंह का, पोरमेहेर तुमांअ बादाहांअ ओरुज उनायन मांन जेलाम नेअ सोळवीअ आने आंय माहरीज तुमांअहीं फाचो आवेंह।
सेल्ली सालाम आने आसीरवाद
23 ख्रीस्त ईसुअ सेवाअ खातुर मांअरी जेलाम कोंडाअलो एपाफीरा तुमनेंह सालाम देहे। 24 आने तेंहकींअज मांअरी सेवा केअनारा मार्क, आरीस्तारखु, देमा आने लुक बी तुमनेंह सालाम देताह।
25 मालीख ईसु ख्रीस्त तुमांअ बादाहां पेअ मेरबानी केअ!