तीतुल पावुलुंह लेखलों कागलों
ईया कागलाअ बाबोताम बेन गोठ्या
तीतु येहुदी जातीअ नांह तेंहडी जातीमनेअ ख्रीस्ती बोंणलो। आने तो हारी गोठ जाहेर केरांअ कामाम पावुलाअ मोदोत केअत्लो। तीतु कीरेत बेटुम आथो तांहांअ पावुलुंह तीयाल ईं कागलों लेखलों। काहाका, तांहांअ कीरेत बेटुअ ख्रीस्ती मोंडोळ हाचवांअ खातुर पावुल तीयाल तींहीं थोवी आललो। पावुलुंह ईया कागलाम तीन खास बाबोत्या लेख्याह।
पेअलांअ ता, तीया मोंडोळाअ देखरेख राखनारा वोळीलुंअ चाल-चोलगोत्या केंहडया वेरांअ जोजे तों लेख्योंह। काहाका, कीरेत बेटुअ रेवासींअ चाल-चोलगोत्या खाराब आथ्या (१:१२)। बीहरी बाबोत पावुलुंह ए लेखीह का, तींहीं मोंडोळाम जे लोक हाय तीयाहांन ओमुक सालाह दांअ आख्योंह। दाखला तोरीके, डाया आदमीहींन ने डायी बायाहांन एंहडी सालाह दांअ आख्योंह, तें जुवान आदमीहींन ने जुवान बायाहांन केलवे। आने जुवान्यांहन ने गुलामुंहन केंहकींअ केलवुलोंअ तों बी तीयांय लेख्योंह। आने सेल्ले, ख्रीस्ती मांहांअ चाल-चोलगोत्या केंहडया वेरांअ जोजे तों पावुल लेखेह। तो एंहकींअ लेखेह का, ख्रीस्ती मांहेंअ ता, सांतीम रांअ मागनारें, दोस्ती राखनारें, आदराय नांय केअनारें, केडाअरी माथाकुट नांय केअनारें, आने मोंडोळाम भागला नांय पाळनारें वेरांअ जोजे।
ईया कागलामेरीअ बाबोतीहींअ रुपरेखा
आगली गोठ १:१-४
मोंडोळाअ देखरेख राखनारा वोळीलुंअ बाबोत १:५-१६
मोंडोळाअ जुदी-जुदी टुकळींअ जोवाबदार्या २:१-१५
हीकामोण्या ने चेतवोंण्या ३:१-११
सेल्या गोठ्या ३:१२-१५