तीतुल पावुलुंह लेखलों कागलों
1
सालामाअ गोठ
1-4 ओ तीतु, पोरमेहेराअ सेवोक आने ईसु ख्रीस्तुंह मोकलुअलो खास चेलो आंय पावुल, ईं कागलों तुल लेखुंह। तुं मांअ होच ख्रीस्तुपेअ वीसवास राखोह। आने तुं मांअ खेरा पोयराअ होच हाय।
पोरमेहेरांय पोसोंद केअलें मांहेंअ ख्रीस्तुपेअ वीसवास राखे, आने तींहमें मोजबुत बोंणे, आने तें आपुअ धोरमा पोरमाणे जे हाचाय हाय ते जांएं, आने कायोम टीकनारों जीवोन मीलवांअ आस्या राखे तीयाअ खातुर मांन पोरमेहेरांय ख्रीस्ताअ खास चेलो बोंणाव्योह। एक जुबानीअ पोरमेहेरांय ईं जीवोन दांअ खुब-खुब वोखत पेअलांअज वोचोन देदलों। आमी पोरमेहेरांय ठोरावलो सोमोय आलो तांहांअ, ख्रीस्तुअ बाबोताअ हारी गोठीअ जाहेरात केरांअ काम आपनेंह वाचावनारा पोरमेहेराअ हुकोमुकींअ मांन होप्योंह।
कीरेत बेटुम तीतुल होपल्या जोवाबदार्या
5 आंय तुल कीरेत बेटुम ईयाअ खातुर थोवी आलोह का, तींहीं जों ओमुक-ओमुक काम केरांअ बाकी हाय, तों काम तुं पुरों क्योव, आने मांअ हुकोमा पोरमाणे दोरेक सेहेराअ मोंडोळुपेअ वोळील नीमो। 6 जीयाल तुं वोळील तोरीके नीमो, तीयाल केडों बी केल्ली बी जातीअ भुल नांय काडी सेके एंहडो तो वेरांअ जोजे। तो सोताअ कोअवालील ईमानदार रेनारो वेरांअ जोजे। आने तीयाअ पोयरें वेअ ता, तें बी ख्रीस्तुपेअ वीसवास राखनारें आने सोताअ याहकी-बाहकाअ आखलों माननारें आने हारी चाल-चोलगोतीवालें वेरांअ जोजे। 7 काहाका, मोंडोळाअ देखरेख राखनारो वोळील ता, पोरमेहेराअ मोंडोळाअ कारभारी हाय। तीयाअ लीदे, केडों बी तीयाअ भुल नांय काडी सेके एंहडो वेरांअ जोजे। तो टीणी तीअ रेनारो का, थीका मोगोजुअ का, साकटो का, धामाल्यो का, खोटी रीते पोयसा मीलवांअ लोब राखनारो नांय वेरांअ जोजे। 8 पेन उलटों, तो आला-गीयाअ चाकरी केअनारो, जों काय हारों हाय तीयापेअ माया राखनारो, ठावका सोबावाअ, नीतीवालो, पोवीतोर, आने सोताल काबाम राखनारो वेरांअ जोजे। 9 आगलांअनेअ हीकवुअला आने वीसवास राखांअ लायोक जे ख्रीस्ती धारा हाय तीयाहांन तो पुरी रीते पालनारो वेरांअ जोजे। एंहकींअ तो सोताअ हाचा बोदा कींअ बीहराहांन उफ दीअ सेके आने तीया ख्रीस्ती धारांअ वीरुद केअनाराहांन हुदारी सेके।
10 ख्रीस्ती मोंडोळाअ वोळील एंहडो वेरांअ जोजे तीयाअ कारोण ईं हाय का, कीरेतुम एंहडा खुब लोक हाय, का जे हाचा बोदाअ वीरुद केअताह। ते नोक्कामी रीते वाद-वीवाद केअताह आने बीहरा लोकाहांन भोरमावताह। खास कीईन ते एंहकींअ आखताह का, पापाहांअ सीक्सामेनेअ वाचायांअ खातुर सुन्नोत केरावांअ जोजे। 11 तीयाहांअ बोलतीज बोंद वीअ जाय एंहडों कायक केरांअ जोजे। नीच लाब मीलवांअ खातुर, ते एंहडा बोद देताह का जे नांय दांअ जोजे। आने एंहकींअ कीईन ते खुब कुटुंबुंअ लोकाहांन वीसवासामनेअ पाळी टाकताह। 12 कीरेत बेटुअज एक भोवीसवाणी केअनारा मोडा गुरुंह* एंहकींअ आख्योंह,
“कीरेत सेहेराअ मांहेंअ ता फोगें हाय। तें लालचु ने आल्येंह हाय, आने जोंगली जोनावोराहांअ होच खावायें हाय।”
13 कीरेतुअ लोकाहांअ हालोत एंहडीज हाय। तीयाअ लीदे, तुं तींहींर्याअ ख्रीस्तींहन कोळोक सोब्दांहम ठोपको देजे, ईयाअ खातुर का, ख्रीस्तुपेर्योअ तीयाहांअ वीसवास पाको वेअ। 14 आने तें येहुदीहीं उबजावी काडली गांअयुंहन, आने हाचायुल नोफरोत केअनाराहां बोंणावली वीदींहन नांय माने तीयाअ खातुर, तुं एंहडों केअजेज!
15 जीया मांहांहांअ मोनें चोख्खें हाय, तीयाहांअ खातुर ता बादों चोख्खों-सोटुज हाय। पेन जीयाहांअ मोनें चोख्खें नांह आने वीसवासु वोगुराअ हाय, तीयाहांअ खातुर ता काय बी चोख्खों नांह। तीयाहांअ ता मोनें ने जीव बी खाराबुज वीअ। 16 तें पोरमेहेराल ओअखुअतेंह एंहकींअ आखावतेंह, पेन तीयाहांअ कामाहांपेनेअ देखाय आवेह का, होकीकोतुम तें तीयाल नांह ओअखुअतें। ते ता नोफरोत केरांअ लायोक हाय आने पोरमेहेराअ आखलों नांय माननारें हाय। तें केल्ला बी हारा कामाम काम लागे एंहडें नांह।