2
कीरेतुमेर्याअ मोंडोळाअ जुदी-जुदी टुकळींअ फोरोज्या
1 वीसवास्यांहन एंहडया बाबोत्या हीकवुअजे का, जे हाचा ख्रीस्ती धारांअ पोरमाणे हाय आने जे उनाअनाराहांन आत्मीक रीते वादावे।
2 डाया आदमीहींन हीकवुअजे का, तीयाहांअ ता सोताल काबाम राखनारा बोंणांअ जोजे, आने ठावका सोबावाअ ने मीठा सोबावाअ बोंणांअ जोजे, आने ख्रीस्तुपेर्याअ तीयाहांअ पाका वीसवासाम डोगांअ नांय जोजे, आने बीहराहांपेअ माया राखांअ जोजे, आने बादों वेठी लांअ चालुज राखनारा बोंणांअ जोजे। 3 तेंहकींअज कीईन डायी बायाहांन एंहडी हीकामोण देजे का, ते पोरमेहेराल होपाअल्या बायाहांन सोबे एंहडों जीवोन जीवे। ते एक-बीहराअ नींदा नांय केअ, आने साकटया नांय बोंणे, आने जुवान बायाहांन हार्या हीकामोण्या देनार्या बोंणे। 4 आने ते जुवान बायाहांन एंहकींअ केलवे का, ते जुवान बाया सोताअ कोअवालाहांअ आने पोयराहांपेअ माया राखे। 5 आने ते सोताल काबाम राखनार्या, आने हार्या चाल-चोलगोतुवाल्या, आने सोताअ कोअ-बाअ हारकींअ सांबालनार्या, आने मायालु, आने सोताअ कोअवालाहांअ ताबांम रेनार्या बोंणें, ईयाअ खातुर का, तीयुहुंअ वोरतोनुअ लीदे पोरमेहेराअ हारी गोठीअ ओपमान नांय वेअ। 6 तेंहकींअज कीईन जुवान्यांहन सोताल काबाम राखनारा बोंणांअ हीकवुअजे। 7 बादी बाबोतींहम तुं बीहराहांअ आगलांअ हारी चाल-चोलगोतीअ नोमुनो बोंणजे! आने ठावका सोबावुकींअ आने जों खेरों हाय ने तुल बी तों खेरों लागेह तीयाअ तुं बोद देजे! 8 आने तुं जांहांअ बी बोद दयोव तांहांअ बीहराहांन उफ मीले एंहडो बोद देजे, ईयाअ खातुर का, केडों बी तींहमें तोअ भुल नांय काडी सेके, आने एंहकींअ कीईन, तोअ वीरुद केअनाराहांन आपुअ बाबोताम खोटों गोगांअ काय बी बानो नांय झुळे आने तें नाजवाय जाय।
9 बादी बाबोतींहम गुलामुंअ तीयाहांअ सेटुअ ताबांम रांअ जोजे, आने तीयाहांअ हुंबुर नांय गोगांअ जोजे। 10 आने तीयाहांअ चोरी नांय केरांअ जोजे, आने पुरी रीते आने कायोम सोताअ सेटुअ मांहेंअ बोंणांअ जोजे। तें एंहडें बोंणे ता, तीयाहांअ हारा वोरतोनुअ लीदे बादें मांहेंअ, आपनेंह आपुअ पापाहांअ सीक्सामेनेअ वाचावनारा पोरमेहेराअ बाबोताअ बोदा ल वादाराम-वादारे मान दीअ।
एंहकींअ मांअ आखांअ कारोण ईं हाय का,
11 बादा लोकाहांन तीयाहांअ पापाहांअ सीक्सामेनेअ वाचावांअ खातुर पोरमेहेरांय सोताअ मेरबानी जाहेर केअयीह। 12 आने पोरमेहेर तीयु मेरबानीकींअ आपनेंह एंहडी हीकामोण देहे का, आपुंह खाराब रीते ने ईयु दुन्याअ खाराब मोर्जींअ पोरमाणे नांय जीवजी, पेन सोताअ मोनुंहन काबाम राखीन खेरों आने धोरमी जीवोन जीवजी।
13 आपुंह ता, आपुअ मोडो पोरमेहेर, ने आपनेंह आपुअ पापाहांअ सीक्सामेनेअ वाचावनारो ईसु ख्रीस्त सोताअ मोडायाअ री पोरगोट वेरांअ हाय तीदीह जो आसीरवाद आपनेंह मीलीअ, तीयाअ वाट जोवतेंह। 14 तीयांयज आपनेंह बादी जातीअ खाराब बांदाणुमनेअ सोळवांअ आने आत्मीक रीते चोख्खें ने हारें कामें केरांअ कायोम तीयार रेनारें सोताअ मांहेंअ बोंणावांअ खातुर सोताअज भोग दीअ देदलो। 15 ए बादया बाबोत्या कीरेत बेटुअ ख्रीस्ती लोकाहांन हीकवुअजे, आने तीयाअ पोरमाणे चालांअ तीयाहांन उफ देजे, आने तोअ पुरा आदीकाराकींअ तीयाहांन ठोपको बी देजे। तुं जों काय आखोह, तीयाल केडों बी ओलकों नांय गोंएं तीयाअ कालजी राखजे।