3
जों हारों हाय तों केअजा!
1 तोअ मोंडोळाअ लोकाहांन कायोम ईं ईत केरावतो रेजे का, ते राज केअनारांअ आने ओमोलदाराहांअ ताबांम रे आने तीयाहांअ हुकोम माने, आने केल्लों बी हारों काम केरांअ तीयार रे। 2 तीयाहांन एंहकींअ आखजे का, केडाअ बी बाबोताम खाराब नांय गोगुलोंअ, केडाअरी भानगुळ नांय केरुलोंअ, बादाहांअरी ईली-मीलीन रेवुलोंअ, आने बादाहांअरी नोवीन वोरतुलोंअ। 3 एक वोखत आपुंह बी आत्मीक बाबोत्या होमजांअ नांय मागनारें, पोरमेहेराअ आखलों नांय माननारें, आने जुदाज मारगे जानारें आथें, आने जाती-जातीअ खाराब मोर्जींअ आने मोज-सोकुअ गुलाम आथें, आने एक-बीहराअरी आटी राखीन आने आदराय राखीन जीवत्लें, आने आपुंह बीहराहांन नोफरोत केअजी ने बीहरें आपनेंह नोफरोत केअ एंहडें आथें। 4 पेन आपुअ पोरमेहेरांय सोताअ दाया आने माया जाहेर केअयी तांहांअ, 5 तीयांय तीयु खाराब बोबोतींहमनेअ आपनेंह वाचाव्यें। तीयांय ता आपुंह केअला हारा कामाहांअ लीदे नांय, पेन तीयाअ मेरबानीअ लीदेज आपनेंह वाचाव्येंह। आपुअ मोनुंहन चोख्खें कीईन आपनेंह नोवों जोन्मो आने नोवों जीवोन देनारा पोवीतोर आत्माअ मारफोते पोरमेहेरांय आपनेंह वाचाव्येंह। 6 आपनेंह वाचावनारा ईसु ख्रीस्ताअ मारफोते पोरमेहेरांय आपनेंह सुटा आथे पोवीतोर आत्मा देदोह। 7 तीयांय सोताअ मोडी मेरबानीकींअ आपनेंह गुना वोगुराअ जाहेर केअयेंह। आने आमी आपुंह जांअतेंह का, आपुंह कायोमाअ खातुर होरगाम जीवुंह। 8 मांयुं आख्या ए गोठ्या ता हाच्याज हाय।
सोमाजुम ख्रीस्ती चाल-चोलगोत्या
मांअ एंहडी मोर्जी हाय का, मांयुं जे बाबोत्या तुल लेख्याह ते तुं तीयाहांन दाबोणुज दीईन हीकवो, ईयाअ खातुर का, जीयाहां पोरमेहेरापेअ वीसवास राख्योह, तें पुरा मोने हारें कामें केअतें रे। एंहडें कामेंज हारें आने दोरेकुअ फायदाअ हाय। 9 पेन ओकली वोगुराअ दोलीलुंहम, आने वोसुलांअ नांवांअ लांबी-लांबी ईयादींअ बाबोताअ चारचांहम, आने मोसेंय देदला नीयोमाहांअ ओर्थो काडांअ बाबोताअ चारचांहम, तुं मां पोळतो। काहाका, तीयाकींअ काय फायदो नांह वेअनारो आने ते काय कामुअ बी नांह। 10 मोंडोळाम फाट-फुट पाळनारांहन एक वोखत, जोरुल पोळे ता, बेन वोखत चेतवोंणी देजे! तेबी तें नांय माने ता, तीयाहांअरी वेहवारुज बोंद कीअ देजे! 11 काहाका, तीयाहांअ बाबोताम तुं जांअहो का, तें जुदीज वाटे चोळी गीयेंह, आने तीयाहांअ पापुज तीयाहांन गुनालें साबीत केअताह।
सेल्ली गोठ आने सालाम
12 आरतेमाल नेता तुखीकुल आंय तोअहीं मोकलेंह। तीयाहांमेर्योअ एक आवे तांहांअ, तुं मांअहीं, बोंणे तोतोअ माहरी, नीपीयालोोली सेहेर आवांअ कोसीस केअजे! काहाका, आखों हीयालों तींहींज रांअ मांयुं नोक्की केअयोंह। 13 झेना वोकीलुल आने आपोल्लुल सोताअ वाट खोरचाअ खातुर जों काय जोजे तों दीईन, बोंणे तोताअ उतवाल्या मांअहीं मोकली देजे! 14 कीरेतुमेर्याअ आपुअ वीसवासी लोक सोताअ होकीकोतुम जे जोरुल्या हाय ते पुर्या केरांअ खातुर हारा कामाम सोताअ सोमोय वापरे, ईयाअ खातुर का, तीयाहांअ जीवोन नोककामों नांय वेळफाय।
15 ईंहीं मांअ आर्याअ बादा तुल सालाम आखताह। आमाहांपेअ माया राखनारा तींहींर्याअ बादा ख्रीस्ती पावु-बोंअयुंहन मांअ सालाम देजे!
पोरमेहेर तुमांअ बादाहां पेअ मेरबानी केअ!