4
दुन्याअरी दोस्ती
1 आमी आंय तुमनेंह फुचांअ मागुंह का, तुमां काहाल एक-बीहराअरी चुलाअतेंह? तुमांअ मोनाहांम ता, मोज-सोक केरांअ खाराब मोरज्या तुमांअ आत्माहांअरी कायोम चुलाअत्याह। तीयाअ लीदे, तुमांहम बोला-चाली ने बाथ-भानगुळ वेअहे। 2 तुमाहांपेअ जे वोस्तु नांह ते तुमां मीलवांअ मोर्जी राखतेंह। पेन ते तुमनेंह नांह मीलती तीयाअ लीदे, ते मीलवांअ तुमां खुन बी केअतेंह। आने बीहराहांपेरीअ वोस्तु मीलवांअ खुब मोर्जी राखतेंह तेबी, ते वोस्तु तुमनेंह नांह मीलती। तीयाअ लीदे, तुमां तीयाहांअरी चुलाअतेंह ने लोळतेंह। तेबी ते वोस्तु तुमनेंह नांह मीलती। काहाका, तुमां पोरमेहेरापेअ ते नांह मागतें। 3 आने तुमां पोरमेहेरापेअ मागतेंह तेबी ते वोस्तु तो तुमनेंह नांह देतो। काहाका, तुमां खोटा ईरादांहकींअ ते मागतेंह। आने ते वोस्तु सोताअ मोज-सोकुअ खातुरुज वापरांअ मागतेंह। 4 ओ ईमानदारी वोगुराअ लोकुंह! तुमां हारकींअ जांअताह का, दुन्याअरी दोस्ती राखुलोंअ तों, पोरमेहेराअरी वेर केअया बोराबोर हाय। तीयाअ लीदे, जों मांहुंअ दुन्याअरी दोस्ती राखांअ मोर्जी राखेह, तों पोरमेहेराअ दुसमोन बोंणेह। 5 पोवीतोर लेखाणाहांम एंहडों लेखलों हाय का, “पोरमेहेरांय जो आत्मा आपुअ माज थोव्योह, तो आपुअ मोनुंहन सोताअज काबाम राखांअ खुब मोर्जी राखेह।” आने ईं लेखाण खेरों हाय तों तुमां जांआ! 6 पेन पोरमेहेराअ मेरबानी ता मांहांअ आत्माअ मोर्जी केअता बी वादारे गोतीवाली हाय। तीयाअ लीदेज, पोवीतोर लेखाणाहांम एंहकींअ लेखलों हाय का, “पोरमेहेर ओभीमान राखनारांअ वीरुद हाय, पेन जें गोरीबळा सोबावाअ हाय, तीयाहांपेअ तो मेरबानी केअहे।” 7 तीयाअ लीदे, तुमां पोरमेहेराअ आदीनुम रा, आने खाराब मोरज्या पेदा केअनारा सेतानाअ वीरुद लोळा। तांहांअ सेतान तुमांअहींनेअ नाही जाय। 8 तुमां पोरमेहेराअ पाही जा ने पोरमेहेर बी तुमांअ पाही आवीअ। ओ पापीहीं, तुमांअ चाल-चोलगोत्या हुदारा! ने दुन्याअरी बी ने पोरमेहेराअरी बी दोस्ती राखांअ मोर्जी राखनाराहां, तुमां तुमांअ मोने चोख्खें केरा ने पोरमेहेराअरीज दोस्ती राखा! 9 तुमां पास्तावो कीईन रोळा! तुमां केअला खाराब कामाहांअ लीदे ओहतें मां, पेन रोळा! 10 पोरमेहेराअ हाजरीम रा तांहांअ तुमां सोताल गोरीबळें बोंणावा! तांहांअ तो तुमनेंह आत्मीक रीते मोडें बोंणावीअ।
11 मांअ पावु-बोंअयुहुं, एक-बीहराअ बाबोताम खोटों मां गोगतें! जो केल्लो बी ख्रीस्ती बीहरा ख्रीस्ती पावुअ बाबोताम खोटों गोगेह आने खोटी रीते तीयाअ नीयाय केअहे, तो खोरेखोर पोरमेहेराअ नीयोमाअ बाबोताम खोटों गोगेह आने खोटी रीते तीयाअ नीयाय केअहे। काहाका, तो नीयोम एंहडा मांहांअल गुनालों जाहेर केअहे। जो तुमां पोरमेहेराअ नीयोमाअ खोटी रीते नीयाय केअतें वीअ ता, खोरेखोर तुमां तो नीयोम पालनारें नांह बोंण्यें। पेन उलटों तीयाअ नीयाय केअनारें बोंण्येंह। 12 नीयोम देनारो आने लोकाहांअ नीयाय केअनारो ता पोरमेहेरुज हाय। आने तोज लोकाहांन वाचावी बी सेकेह आने तीयाहांअ नास बी कीअ सेकेह। खोटी रीते बीहरा वीसवासी पावुअ नीयाय केरांअ तुल काय बी होक नांह।
भोवीस्याअ बाबोताम आपुंह काय नांह जांअतें
13 तुमांअमेर्याअ थोळाक लोक आखताह का, “आज नेता हाकाल आमां फोलाणा सेहेराम जायन तींहीं एक वोरसों लोगुंअ रीहुं आने तींहीं धोंदो चालु कीईन खुब पोयसा पेदा कीअहुं।” एंहकींअ आखनाराहां, आमी मांअ गोठ धीयान राखीन उनाया। 14 हाकाल तुमांअ जीनगी केंहडी वीअ तों तुमां नांह जांअता। तुमांअ जीनगी ता, थोळेक लोगुंअ देखायन हातींअ उडी जानारा तुअराअ होच हाय। 15 तीयाअ लीदे, तुमांअ एंहकींअ आखांअ जोजे का, “पोरमेहेराअ मोर्जी वीअ ता, आमां जीवता रीहुं ने ईं का तों कीअहुं।” 16 पेन तीयाअ बोदले तुमां ता ओभीमान राखीन सोताअ मोडाय केअताह। तुमनेंह जों वेरांअ हाय तीया बाबोताम ओभीमान राखीन गोगांअ खोटों हाय। 17 तीयाअ लीदे, जोबी एक वीसवासी पावुह एंहडी बाबोतींहम जों खेरों हाय तों केरांअ जांअहे पेन तों नांह केअतो ता, तों तीयाअ खातुर पाप हाय।