3
वीचारीन गोगा!
1 मांअ पावु-बोंअयुहुं, तुमाहांमेनेअ पोरमेहेराअ हाचायुअ बाबोताअ बोद देनारा वादारे मां बोंणाह। काहाका, तुमां जांअतेंह का, ख्रीस्ती बोद देनारा आपुअ ता, पोरमेहेर बीहराहांअ केअता वादारे कोळोक रीते नीयाय कीअ। 2 आपुंह बादें खुब रीते भुल्या केअतेंह। जो एक वीसवासी मांहुंअ गोगे, आने तींहमें तों काय बी भुल नांय केअ ता, तीयाअ ओ ओर्थो हाय का, तीयाअ जीवोनाम पोरमेहेराअ ईरादो तीयांय पुरो कीअ देदोह, आने तों सोताअ आखा सोरीलाल काबाम राखी सेकेह। 3 मोडा कोळाल आपुअ मोर्जी पोरमाणे चालवांअ खातुर आपुंह तीयाअ मुंयांम हानीज लोगाम पोवावतेंह, आने तीयुकींअ आपुअ मोर्जी वेअ तेंहकींअ तीयाल चालवी सेकतेंह। 4 नेता जाहाजुअ वीचार केरा! तों कोतोंअ बी मोडों वेअ आने खुब जोरपेअ चालनारों वारों तीयाल चालवे। तेबी तीयाल चालवुअनारों मांहुंअ ता वाय हानांअ कोवोंडोरुकींअ तीयाअ मोर्जी वेअ तेंहकींअ तीयाल चालवेह। 5 तेंहकींअज कीईन मांहांअ जीब वाय हानीअ हाय तेबी, ते सोताअ बाबोताम मोडया-मोडया गोठ्या कीअ सेकेह।
आने तुमां जांअतेंह का, आगीअ एक हानीअ सीनगी खुब मोडा जोंगलुल बाली सेकेह। 6 मांहांअ जीब आगीअ होच हाय, आने खोटायुअ दुन्याअ होच हाय। आने आपुअ सोरीलुंहम जीब एंहडो भाग हाय का, जो आपुअ आखा जीवोनाम खोटाय फेलावी सेकेह आने नोरकामनेअ मीलली आगीकींअ आपुअ आखा जीवोनाअ नास कीअ सेकेह। 7 जोंगली जोनावोरुंहन, डोगरांहन, चीळाहांन, हापळाहांन, आने पांअयांम रेनारा जोनावोरुंहन मांहुंअ वोस कीअ सेकेह आने तीयाहांन वोस केअहे बी। 8 पेन केडों बी सोताअ जीबुल वोस कीअ नांह सेकतों। जीब ता वोस नांय केराय एंहडी खाराब वोस्तु हाय। आने हापळाअ झेरुअ होच ते लोकाहांन माय टाकी बी सेकेह। 9 ईयु जीबीकींअ आपुंह आपुअ मालीखाअ आने पोरमेहेर बाहकाअ गुणगान केअतेंह आने तीयाअ आभार मानतेंह। आने ईयुज जीबीकींअ आपुंह पोरमेहेरांय सोताअ होचुज बोंणावला मांहांअल हाराप बी देतेंह। 10 एंहकींअ कीईन आपुंह एकुज मुंयुंकींअ पोरमेहेराअ गुणगान बी केअतेंह, आने बीहराहांन हाराप बी देतेंह। मांअ पावु-बोंअयुहुं, एंहकींअ ता नांयज बोंणांअ जोजे। 11 पांअयांअ एकुज चोरुमनेअ खारों ने मीठों पांय नांह नींगतों। 12 आने मांअ पावु-बोंअयुहुं, बाबल्याअ चाळापेअ आंबल्या नांह लागत्या, आने वोळुअ चाळापेअ दाराखसें नांह लागतें। तेंहकींअज कीईन, खारा पांअयांअ चोरुमनेअ मीठों पांय नांह नींगतों। तीयाअ लीदे, पोरमेहेराअ हाचायुअ बाबोताअ बोद देनारा तुमां, जोंबी आखा तीया बाबोताम कालजी राखजा। 13 तुमाहांमेनेअ जोंबी गीयानी आने ओकलीवालों वीअ तों, सोताअ हारी चाल-चोलगोतीकींअ, आने गोरीबळा सोबावु ने गीयानुकींअ केअला तीयाअ हारा कामाहांकींअ, तीयाअ साबीती दे। 14 पेन जो तुमां तुमांअ मोनाहांम आदराय, कोळवी लागणी आने ईगलाय राखतें वीअ ता, “आमां गीयानी हाय” एंहडों तुमांअ ओभीमान नांय राखांअ जोजे, आने एंहकींअ कीईन ईसुअ बाबोताअ हारी गोठीअ वीरुद पाप नांय केरांअ जोजे। 15 एंहडों गीयान पोरमेहेर नांह देतो। पेन ईं ता, ईयु पापी दुन्याअ ने मांहांहांअ पापी सोबावाअ ने सेतानाअ गीयान हाय। 16 काहाका, जीयु जागे लोक आदरायुवाला ने ईगलायुवाला हाय, तीयु जागे धामाल ने बादी जातीअ बीहरा पाप वेअनाराज। 17 पेन जीयाअ जीवोनाम पोरमेहेरांय देदलों गीयान हाय, तों मांहुंअ पेअलांअ ता चोख्खी रीते जीवनारों हाय। आने तों बादाहांअरी ईली-मीलीन रेनारों, आकरों वोरतोन नांय राखनारों, दोस्ती राखनारों, बादी जातीअ हारें कामें केअनारों, बादाहांअरी हारको वेहवार राखनारों, आने ढोंग नांय केअनारों हाय। 18 मोंडोळाम सांती जालवी राखांअ खातुर बीहराहांअ होमजुण काडनारा मांहांहांन खेरों जीवोन मीलेह।