2
बादाहांअरी हारको वेहवार राखा!
1 मांअ पावु-बोंअयुहुं, खुब उजवोळाम रेनारा आपुअ मालीख ईसु ख्रीस्तुपेअ पाको वीसवास राखनारांअ तोरीके, तुमां मांहांहांअ उपर्योअ देखाव हीईन तीयाहांअरी जुदी-जुदी रीते मां वोरतुअतें। 2 धारा का, तुमांअ भोकती मोंडोळाअ कोअमें, एक मालदार मांहुंअ होनाअ मुंदी आने हाराम-हारें पोतळें पोवीन आवे, आने एक गोरीब मांहुंअ बी फाटलें पोतळें पोवीन तींहीं आवे। 3 आने तुमाहांमेनेअ एक मांहुंअ तीया मालदार मांहांअल मान दीईन तीयाअ आवकार केअ आने तीयाल आखे, “मेरबानी कीईन ईया हाराम-हारा जागे बोह!” पेन गोरीबुल आखे, “तींहीं उबी रे!” नेता, “मांअ पागाहांअहीं एठा बोह!” 4 ता, तीयाअ ओर्थो ओ हाय का, तुमां माजाअ-माज भेद-भाव राखतेंह, आने बीहराहांअरी केंहकींअ वोरतुलोंअ तों तुमां सोताअ खाराब ईरादांहकींअ नोक्की केअतेंह, आने एंहकींअ गुनालें बोंणतेंह। 5 मांअ मेराला पावु-बोंअयुहुं, धीयान राखीन उनाया! तुमां हारकींअज जांअतेंह का, दुन्याअ नोजराम जें गोरीब हाय, तीयाहांन ईसुपेर्याअ तीयाहांअ वीसवासाअ लीदे वादारे आत्मीक आसीरवाद मीले, आने पोरमेहेरापेअ मेर केअनाराहांन तीयांय जों राज दांअ वोचोन देदोंह तीया राज्याअ ते लोक बोंणे तीयाअ खातुर, पोरमेहेरांय तीयाहांन पोसोंद केअयेंह। 6 पेन तुमां ता गोरीब लोकाहांन मान नांह देतें। तुमनेंह दुख पाळनारा आने कोरोटाम लीअ जानारा ता मालदारुज हायकने? 7 आने तुमां बापतीस्मा लेदों तांहांअ, जीया ईसु ख्रीस्तुअ तुमां लोक बोंण्या तीयाअ हाराम हारा नांवांअ बाबोताम खोटों-खोटों गोगनारा बी तेज मालदार हाय। 8 पोवीतोर चोपळीम पोरमेहेराअ एंहडो एक नीयोम हाय का, “जेंहकींअ सोतापेअ तेंहकींअ बीहराहांपेअ बी माया राखा!” जो तुमां ईया नीयोमा पोरमाणे चालतें वीअ ता, ईयाअ ओ ओर्थो हाय का, तुमां पोरमेहेर आपुअ राजाअ हुकोम पालतेंह। 9 पेन जो तुमां गोरीबाहांअरी आने मालदारुंअरी हारको वेहवार नांह राखतें ता, तुमां पाप केअतेंह आने पोरमेहेराअ नीयोम तोळतेंह। तीयाअ लीदे, तुमां गुनालें हाय। 10 जोंबी मांहुंअ पोरमेहेराअ बीहरा बादा नीयोम पालीन तीयाअ एकुज नीयोम तोळे ता, तों मांहुंअ पोरमेहेराअ नोजराम बादा नीयोम तोळनारांअ ओतोंअज गुनालों हाय। 11 काहाका, “सीनालों कीअहो मा!” एंहकींअ आखनारा पोरमेहेरांयज एंहकींअ बी आख्योंह, “खुन कीअहो मा!” जो तुं सीनालों नांह केअतो पेन खुन क्योव ता, तुं पोरमेहेराअ नीयोम तोळनारो बोंण्योह। 12 मालीख ईसुअ बाबोताअ हारी गोठीपेर्याअ आपुअ वीसवासुकींअ आपनेंह सुटकारो मीलेह। आने तीयु गोठीअ नीयोमाहांअ पोरमाणे तुमां चाल्यें का नांह तीया बाबोताम पोरमेहेर तुमांअ नीयाय कीअ। तीयाअ लीदे, ईं होमजीन तुमां गोगा ने वोरता। 13 काहाका, जीयांय बीहरा मांहांहांपेअ दाया नांह राखी, तीयाअ नीयाय केअतीअ वोखत पोरमेहेर बी तीयापेअ दाया नांय राखे, आने जों बीहराहांपेअ दाया राखेह, तीयाल पोरमेहेर सीक्सा नांय केअ।
14 मांअ पावु-बोंअयुहुं, जो एक ख्रीस्ती मांहुंअ एंहकींअ आखे का, तीयाल पोरमेहेरापेअ वीसवास हाय, पेन तों सोताअ कामाहांकींअ तों नांय देखावे ता, तीयाअ काय बी फायदो नांह। आने तीयाअ एंहडो वीसवास तीयाल वाचावी नांय सेके। 15 धारा का, थोळाक पावु-बोंअयुंहपेअ पुरतें पोतळें , का पुरतो मांडो नांह। 16 आने तीयाहांअ खानगी जोरुलीहींअ खातुर काय बी देया वोगुर तुमां तीयाहांन आखा का, सुके जा, हेकाया ने हारकींअ खा। ता, तुमांअ गोठीहींकींअ काय बी फायदो नांह। 17 तीयाअ लीदे, पोरमेहेरापेअ वीसवास राखा तोतोंअज पुरतों नांह। तीयाअ आरी-आरी हारें कामें बी केरा। 18 पेन जो एक मांहुंअ आखे का, “थोळाक ख्रीस्ती लोक वीसवास राखताह आने बीहरा थोळाक ख्रीस्ती लोक हारें कामें केअताह।” तीया मांहांअल आंय आखुंह, “एक ख्रीस्ती हारें कामें केअया वोगुर वीसवास राखी सेके ता, तों मांन साबीत कीअ देखाव। पेन आंय तुल मांअ हारा कामाहांकींअ साबीत कीअ देखावेंह का आंय वीसवास राखुंह।” 19 मांन खोबुर हाय का, तुं एकुज पोरमेहेरापेअ वीसवास कीअहो। साबास! एंहकींअ ता पुतळें बी वीसवास राखतेंह आने काप्या केअतेंह। 20 ओ गांडा, आंय तुल साबीत कीअ देखावेंह का, हारा कामुं वोगुराअ वीसवास नोककामो हाय। 21 आपुअ मोडा आगलाअ डाया आबराहामुंह वेदीपेअ सोताअ पोयरा ईसाकाअ भोग चोळव्यो तांहांअ, तीयाअ तीया हारा कामुअ लीदे पोरमेहेरांय तीयाल हाचो गोंअयो। 22 एंहकींअ कीईन तुं जांअहो का आबराहामुंह हारें कामें बी केअलें, आने एंहकींअ कीईन तीयाअ वीसवास पोरमेहेराअ ईरादा पोरमाणे जेंहडो जोजे तेंहडो हारो, तीयाअ हारा कामाहांकींअ बोंण्यो। 23 आने एंहकींअ कीईन पोवीतोर लेखाण खेरों पोळ्यों का, “आबराहामुंह पोरमेहेराअ वोचोनुपेअ वीसवास केअयो ने तीयाअ वीसवासाअ लीदे पोरमेहेरांय तीयाल हाचो गोंअयो।” आने पोरमेहेरांय आख्यों, आबराहाम मांअ दोस्दार हाय। 24 एंहकींअ कीईन आपुंह जांअतेंह का, पोरमेहेर एक मांहांअल तीयाअ वीसवासाअ लीदे ओतोअज नांय, पेन तीयाअ हारा कामाहांअ लीदे तीयाल हाचो गोंअहें।
25 एंहकींअज कीईन राहाब वेस्याल पोरमेहेरांय हाची गोंअयी। काहाका, तीयुंय ईसरायेल बातमीदारुंहन आवकार देदलो, आने तीयाहांन बीहरी वाटे नाहावीन वाचावी लेदला। आने तीयुअ हारा कामुअ लीदे पोरमेहेरांय तीयुल हाची गोंअयी।
26 तीयाअ लीदे तुमां होमजी ला का, जेंहकींअ जीवु वोगुराअ सोरील नोककामो हाय, तेंहकींअ ख्रीस्ती मांहुंअ पोरमेहेरापेअ वीसवास ओतोअज केअ आने तों सोताअ हारा कामाहांकींअ नांय देखावे ता, तीयाअ वीसवास बी नोककामो हाय।