याकोबांय लेखलों कागलों
1
1 पोरमेहेराअ आने मालीख ईसु ख्रीस्तुअ सेवा केअनारो आंय याकोब, जुदा-जुदा देसाहांम वेरगाय गेहला बादा ख्रीस्ती लोकाहांन, ईं कागलों लेखुंह।
तुमनेंह मांअ सालाम!
धीरोज, वीसवास, आने गीयान
2 मेराला पावु-बोंअयुहुं, जांहांअ बी तुमाहांपेअ जाती-जातीअ कोसोटया आवे, तांहांअ तुमां खुब खुस वेरा! 3 काहाका, तुमां जांअतेंह का, कोसोटींअ वोखत बी ईसुपेर्योअ वीसवास तुमां नांय सोळा ता, तीयाअ पोरीणामे, तुमनेंह बादों वेठांअ धीरोज मीलीअ। 4 आने ए धीरोज तुमां कायोम राखजा! तांहांअ तुमां वीसवासाम पुरी रीते पाकें वीअहा, आने तुमांअ जीवोनाहांम केल्ली बी बाबोताअ खामी नांय रीअ।
5 जो तुमाहांमेनेअ केडापेअ गीयानाअ खामी वीअ ता, तों पोरमेहेरापेअ मागे आने पोरमेहेर तीयाल तों दीअज। काहाका, पोरमेहेर तीयापेअ मागनारा बादा लोकाहांन भोला मोनाकींअ ने राजी वीईन देहे। 6 पेन तुमां मागा तांहांअ पोरमेहेर दीअ का नांय एंहडी सोंका मा राखतें। पेन उलटों, तीयापेअ वीसवास राखजा! काहाका, सोंका राखनारों मांहुंअ वाराअरी ठोकाअनारा-कुटाअनारा आने हाअडाय जानारा दोरीयाअ चुवाअ होच हाय। 7-8 एंहडों मांहुंअ बेन वीचारुंहवालों हाय, आने तों काय बी नोक्की नांह कीअ सेकतों। तों मांहुंअ पोरमेहेरापेअ जोंबी मागेह तों पोरमेहेर तीयाल दीअ एंहडी आस्या तीयाअ नांय राखांअ जोजे।
गोरीब आने मालदार ख्रीस्ती लोकाहांन सालाह
9 गोरीब ख्रीस्तींअ ओभीमान राखांअ जोजे, काहाका पोरमेहेरांय तीयाहांन आत्मीक रीते मालदार बोंणाव्येंह। 10 आने मालदार मांहांहांअ बी ओभीमान राखांअ जोजे, काहाका, पोरमेहेरांय तीयाहांन देखाव्योंह का तें आत्मीक रीते गोरीब हाय। माहरीज कोमटाय जानारा जोंगली बाटवाअ फुलुंअ होच, तें मांहेंअ मोय जाय। 11 दीह उगीन खुब तोपेह। आने तोपुअ लीदे जोंगली बाटवें आने तीयाहांअ फुलें हुकाय जातेंह आने तीयाहांअ सोबा जाती रेहे। तेंहकींअज कीईन, मालदार मांहेंअ चालु धोंदेज मोय जाय।
हार्या वोस्तु देनारो ता पोरमेहेरुज हाय
12 जें मांहेंअ कोसोटींअ वोखत बी पोरमेहेरापेर्योअ वीसवास नांह सोळतें, तें पोरमेहेराअ नोजराम खेरी रीते सुखी हाय। काहाका, वीसवासाअ पोरीकसाम तें पास वीअ तांहांअ, पोरमेहेर तीयाहांन भेटु तोरीके कायोमाअ खातुर जीवावीअ। पोरमेहेरांय तीयापेअ माया राखनाराहांन बादाहांन एंहकींअ कायोमाअ खातुर जीवावांअ वोचोन देदोंह। 13 ईत राखजा! जांहांअ मांहेंअ खोटों केरांअ लालचाय, तांहांअ तीयाहांअ एंहकींअ नांय आखांअ जोजे का, “पोरमेहेर आमनेंह खोटों केरांअ लालचावेह।” काहाका, केडों बी पोरमेहेराल खोटों केरांअ लालचावी नांह सेकतों, आने पोरमेहेर बी केडाल खोटों केरांअ लालचावतो नांह। 14 पेन मांहुंअ सोताअ खाराब मोर्जीकींअ मोही पोळेह, आने पापाअ फांदांम पोळेह, आने एंहकींअ कीईन तों खोटों केरांअ लालोचुम पोळेह। 15 हातींअ तीयाअ खाराब मोर्जी तीयाल पाप केरावेह, आने पाप वादता-वादता, तों पोरमेहेराअ से कायोमाअ खातुर जुदों पोळी जाहे।
16 मांअ मेराला पावु-बोंअयुहुं, लालचावांअ बाबोताम केडों बी तुमनेंह ठोगे एंहडों वेरांअ मां देतें! 17 पोरमेहेर बाहको हारी आने खामी वोगुराअ भेटुज देहे। तीयांयज बादी जातीअ उजवोळ बोंणाव्याह। उजवोळांअ लीदे पोळनार्या सांअयां बोदलाअत्या रेत्याह। पेन पोरमेहेर ता कीदीह बी सोताअ गुणुम बोदलाअतो नांह, आने सोताअ गुणुअ वीरुद केडाल लालचावतो बी नांह। 18 तीयांय आत्मीक रीते बोंणावला बादा लोकाहांम आपुंह पेअलांम-पेअलोअ जागो मीलवुअजी तीयाअ लीदे तीयांय सोताअज मोर्जी पोरमाणे ईसुअ बाबोताअ हाचायुअ गोठीकींअ आपनेंह आत्मीक जोन्मो देदोंह।
हाचो धोरमों
19 मांअ मेराला पावु-बोंअयुहुं, ईं ईत राखजा, तुमां बादें पोरमेहेराअ गोठ उनायांअ उत्वाल केरा। पेन ते गोठ बीहराहांन होमजावांअ उत्वाल मां केअतें। आने माहरी रोगवाय बी मां जातें। 20 काहाका, रोगवाय जानारों मांहुंअ पोरमेहेराअ हाचो ईरादो पुरो कीअ सेकतों नांह। 21 तीयाअ लीदे, बादया खाराब होंवांयां आने खोट्या चाल-चोलगोत्या सोळी दा। आने पोरमेहेर तुमांअ मोनाहांम जे गोठ होमजावेह, ते गोरीबळा सोबावे मानी ला। ते गोठ तुमनेंह तुमांअ पापाहांअ सीक्सामेनेअ वाचावी सेकेह। 22 पेन पोरमेहेराअ गोठ उनायुलोंअ ओतोंअज नांय, पेन तीयाअ पोरमाणे चालांअ बी जोजे। नेता होमजी ला का, तुमां सोतालुज ठोगतेंह। 23-24 जोंबी मांहुंअ पोरमेहेराअ गोठ उनायन तीयाअ पोरमाणे नांह चालतों, तों सोताअ मुंय आरसाम हेअनारा मांहांअ होच हाय। तों सोताल आरसाम हीईन जाहे, आने तों सोते आरसाम केंहडों देखाअयों तों, तों तुरुतुज वीहराय जाहे। 25 पेन जो केल्लों बी मांहुंअ ख्रीस्तुअ बाबोताअ हारी गोठ, का जींहमें पोरमेहेराअ खामी वोगुराअ नीयोम होमाअलो हाय आने जे लोकाहांन बादी जातीअ बांदाणुंहमनेअ सोळवेह, ते गोठ धीयान राखीन उनाय, आने ते गोठ तों वीहराय नांय जाय, पेन तीयाअ पोरमाणे चालतों रे ता, तीयाअ बादा कामुंहपेअ पोरमेहेर आसीरवाद दीअ। 26 जोंबी मांहुंअ सोताअ मोनाम एंहकींअ धारे का, तों धारमीक हाय, पेन तों सोताअ जीबुल काबाम नांय राखे ता, तों मांहुंअ सोतालुज ठोगेह, आने तीयाअ धोरमाकींअ तीयाल काय फायदो नांह। 27 जोंबी मांहुंअ पोहला पोयराहांअ आने रोंडेअ बायाहांअ हाकळीअ वोखताम तीयाहांअ चींता राखेह, आने खेरा पोरमेहेराल नांय ओअखुअनारें मांहेंअ जे पाप केअतेंह तीया पापुंहकींअ सोताल आत्मीक रीते बाटलावतों नांह, तीयाअज धोरमो पोरमेहेराअ नोजराम हाचो ने चोख्खो हाय।