योहानाअ पेअलोंअ कागलों
1
खेरों जीवोन देनारो सोब्दो
1 बादा लोकाहांन खेरों जीवोन देनाराअ बाबोताम आंय योहान तुमनेंह लेखुंह। तो, जों काय हाय तों बादों हायाताम आलों तीयाअ पेअलांअ हायाताम आथो। आमां तीयाअ बोद उनाअयाह, डोंआं-नोजरे तीयाल हेअयोह, आने आथाकींअ तीयाल आथल्योह बी। तीयांय जे गोठ आमनेंह आखी ते मानीन बादें मांहेंअ खेरों जीवोन मीलवी सेकतेंह। 2 लोकाहांन खेरों जीवोन देनाराल पोरमेहेरांय पोरगोट केअयो, आने आमां तीयाल देख्योह। तीयाअ बाबोताम आमां साक्सी देताह, आने तीयाअ बाबोताअ गोठ जाहेर बी केअताह। तो पोरमेहेर बाहकाअरी आथो। पोरमेहेरांय तीयाल आमांअ आगलांअ पोरगोट केअयो। तो कायोम जीवनारो हाय। 3 जीयाल आमां देख्यो, ने जीयांय आखल्या गोठ्या आमां उनाअया, तीयाअज बाबोताअ गोठ आमां तुमनेंह ईयाअ लीदे जाहेर केअताह का, तुमां आमांअरी पाको सोबोंद राखा। आमांअ सोबोंद पोरमेहेर बाहकाअरी आने तीयाअ पोयरा ईसु ख्रीस्तुअरी हाय। 4 आंय ए गोठ्या तुमनेंह ईयाअ लीदे लेखुंह का, आमां पुरी रीते खुस वेअजी।
5 जे गोठ आमां ख्रीस्तुपनेअ उनाअला, आने आमी तुमनेंह जाहेर केअताह ते ए हाय: पोरमेहेर एकदोम चोख्खो हाय। तो कोय वोखत बी पाप नांह केअतो। तो एंहडा उजवोळाअ होच हाय का जींहमें जाराक बी आंदारों नांह। 6 “पोरमेहेराअरी आपुअ एकदोम हारो सोबोंद हाय” एंहकींअ जो आपुंह आखजी, पेन आपुअ वोरतोन खाराब वेअ ता, आपुंह झुटें हाय, आने पोरमेहेराअ हाची गोठी पोरमाणे आपुंह नांह वोरतुअतें। 7 पेन जेंहकींअ पोरमेहेर एकदोम चोख्खों वोरतोन राखेह, तेंहकींअ जो आपुंह बी चोख्खों वोरतोन राखजी ता, तांहांअ एंहकींअ आखाय का आपुंह पोरमेहेराअ उजवोळाम रेतेंह आने एक-बीहराअरी हारो सोबोंद राखतेंह। 8 “आपुंह पापुज नांह केअयो” एंहकींअ जो आपुंह आखजी ता, आपुंह सोतालुज ठोगतेंह आने पोरमेहेर आपुअ बाबोताम जे हाची गोठ आखेह ते आपुंह मानांअ ना पाळतेंह। 9 पेन जो आपुंह आपुअ पाप पोरमेहेराअ आगलांअ कोबुल केअजी ता, तो आपुअ बादा पाप माफ कीअ, आने आपुअ बादी खोटायुहुंअ मोल तुवी टाकीअ। काहाका, तो खातरीवालो आने हाचो हाय। 10 “बादाहां ज पाप केअयाह” एंहकींअ पोरमेहेर आखेह तीयाअ लीदे, “आपुंह पापुज नांह केअयो” एंहकींअ जो आपुंह आखजी ता, आपुंह पोरमेहेराल झुटो पाळतेंह, आने आपुअ बाबोताम पोरमेहेर जों आखेह तों आपुंह नांह मानतें।