2
आपुअ वेल-तांयन गोगनारो ख्रीस्त
1 मांअ मेराला पोयराहां, तुमां पाप मां कीअहा एंहडों आखांअ खातुर आंय तुमनेंह ईं लेखुंह। पेन जो तुमाहांमेनेअ केडों बी पाप केअ ता, पोरमेहेर तीयाल माफ कीअ। काहाका, पोरमेहेराअ आगलांअ आपुअ वेल-तांयन गोगनारो एक हाय। तो ता ईसु ख्रीस्त हाय, आने तो खोरेखोर हाचो हाय। 2 ईत राखजा का, ईसु ख्रीस्तुंह आपुअ पापाहांअ माफीअ खातुर सोताअ जीवुअ भोग देदो। तीयाअ लीदे पोरमेहेर आपुअ पाप माफ केअहे। एखला आपुअज नांय, पेन दुन्याअ बादा लोकाहांअ पाप बी तो माफ कीअ सेकेह। 3 जो आपुंह पोरमेहेराअ हुकोम पालजी ता, आपनेंह खातरी वीअ का, आपुंह पोरमेहेराल ओअखुअतेंह। 4 “आंय पोरमेहेराल ओअखुंह” एंहकींअ जोंबी आखेह, पेन तों पोरमेहेराअ हुकोम नांय मानतों वीअ ता, तों मांहुंअ झुटों हाय, आने तों पोरमेहेराअ हाची गोठी पोरमाणे नांह चालतों। 5 पेन जें पोरमेहेराअ हुकोम खोरेखोर पालतेंह, तें देखावतेंह का, तें पोरमेहेरापेअ पुरी रीते माया राखतेंह। एंहकींअ कीईनुज आपनेंह खातरी वीअ सेके का, आपुंह पोरमेहेराअरी जोळाअलें हाय। 6 “आंय पोरमेहेराअरी जोळाअलो हाय” एंहकींअ जोंबी मांहुंअ आखेह तीयाअ, ख्रीस्त जेंहकींअ वोरतुअत्लो तेंहकींअ वोरतांअ जोजे।
7 मेराला दोस्दारुहुं, आंय तुमनेंह नोवो हुकोम नांह लेखतो। उलटों, आंय तुमनेंह जुनो हुकोमुज लेखुंह। ओ हुकोम, तुमां ख्रीस्तुपेअ वीसवास राखांअ चालु केअलों तेहेअनेअ तुमाहांपेअ हाय। आने जे गोठ तुमां उनाअयाह, तीयु गोठीअ एक भागुज ओ हुकोम हाय। 8 तेबी, जो हुकोम आंय तुमनेंह लेखुंह तो नोवो बी हाय। तो ईयाअ लीदे नोवो हाय का, ख्रीस्तुंह जों केअलों तों नोवों आथों आने तुमां जों केअतेंह तों बी नोवों हाय। काहाका, खाराब रीते वोरतांअ तुमां सोळी देतें आलेंह, आने तीयाअ बोदले, तुमां चोख्खी रीते वोरतुअतें जातेंह। तों ता आंदाराम नांय रेतें वीअ एंहडों हाय। तीयाअ बोदले, तों एंहडी जागे रेतें वीअ एंहडों हाय का जींहीं खुब उजवोळ एगुह वार्योअ उजालों केअतो रेहे।
9 उजवोळाम रेनारा एक मांहांअ होच जों केडों “आंय चोख्खी रीते वोरतुंह” एंहकींअ आखावेह, आने तीयुज घेळी जो तो सोताअ आर्याअ वीसवास्याल नोफरोत केअ ता, तीयाअ ओर्थो ओ हाय का, तो आजी आंदारामुज रेनारा एक मांहांअ होच, आजी बी खाराब रीतेज वोरतेह। 10 पेन जो केडों सोताअ आर्याअ वीसवास्यापेअ माया राखेह ता, तीयाअ ओर्थो ओ हाय का, तो उजवोळाम रेनारा मांहांअ होच वोरतुअतो रेहे। बीहराहांन पाप केरावे एंहडों तीयाम काय बी नांह रेतों। 11 पेन जो केडों सोताअ आर्याअ वीसवास्याल नोफरोत केअहे ता, तीयाअ ओर्थो ओ हाय का, तों आंदाराम रेनारा मांहांअ होच आजी बी खाराब रीतेज वोरतेह। तीयाल खोबुर नांह का, तों नोरकाअ वेल जाय रीयोंह। तों आत्मीक रीते आंदलों बोंणी गीयोंह आने आत्मीक हाचायुअ तीयाल भान नांह। 12 तुमां मांअ पोयरें हाय। तुमनेंह आंय ईं लेखुंह। ईत राखजा का, ख्रीस्तुंह जों केअयोंह तीयाअ लीदे पोरमेहेरांय तुमांअ पाप माफ केअयाह। 13 बाहकाहांअ होच तुमां आत्मीक रीते मोडें वेअलें मांहेंअ हाय। तुमनेंह आंय ईं लेखुंह। ईत राखजा का, जो कायोमुज हायाताम आथो तीया ख्रीस्तुल तुमां ओअख्योह। जुवान मांहांहांअ होच तुमां आत्मीक रीते उंहालें हाय। तुमनेंह आंय ईं लेखुंह। ईत राखजा का, खोटों केअनारा सेतानाल तुमां जीती लेदोह। 14 तों आंय फाचो आखुंह: तुमां पोरमेहेर बाहकाल ओअख्योह। आने जो कायोमुज हायाताम हाय तीया ख्रीस्तुल बी तुमां ओअख्योह। आने तुमां गोतीवालें हाय। आने तुमां पोरमेहेराअ गोठ मानतें रेतेंह। आने खोटों केअनारा सेतानाल तुमां जीती लेदोह। ईया बादा कारोंणुअ लीदे मांयुं तुमनेंह ईं लेख्योंह।
15 दुन्यामेर्याअ बीहरा मांहांहांअ होच खाराब रीते जीवांअ तुमां मोर्जी मां राखतें! दुन्यामेर्येंअ खाराब मांहेंअ जीयाल हारों गोंअतेंह तीयापेअ तुमां माया नांह राखतें! दुन्याअ बीहरा मांहांहांअ होच खाराब रीते जीवांअ जों केडों वीसवासी मोर्जी राखेह ता, तीयाअ ओ ओर्थो हाय का, तों सोताअ पोरमेहेर बाहकापेअ मायाज नांह राखतों। 16 ईत राखजा का, दुन्याअ मांहांहांअ बादी खाराब मोरजीहींकींअ वेअनारें कामें एंहडें हाय: मांहेंअ सोताअ पापी सोबावाअ लालोच पुरी केरांअ मोर्जी राखतेंह। तें सोताअ सोरीलाहांअ बादा भागुंहन जोंबी गोंवेंह तों मीलवांअ मोर्जी राखतेंह। तें पोतापेरीअ माल-मीलकोतींअ बाबोताम मोडया-मोडया गोठ्या केअतेंह। एंहडों खाराब जीवोन पोरमेहेर बाहकापेनेअ नांह आवतों! पेन उलटों, तों दुन्यामेर्याअ एंहडा मांहांहांपेनेअ आवेह का जें पोरमेहेराल नांह ओअखुअतें! 17 पोरमेहेराल नांय ओअखुअनारें मांहेंअ आने तीयाहांअ मोरज्या नास वीअ जाय। पेन जों पोरमेहेराअ मोर्जी पुरी केअहे, तों कायोम हायाताम रीअ!
ख्रीस्तुअ वीरुद केअनाराअ बाबोताम
18 मांअ पोयराहां, आमी ओ युगुअ सेल्लो सोमोय हाय। आमांअ-मालीखाअ खास चेलाहां पनेअ तुमां उनाअयाह, ख्रीस्तुअ वीरुद केअनारा बीहरा बादा लोकाहांअ केअता वादारे तीयाअ वीरुद केअनारो एक जांअ आवनारो हाय। आने तीयाअ पोरमाणे, ख्रीस्तुअ वीरुद केअनारा खुब लोक आमी पेदा वीयाह। ईयापनेअ आपनेंह खोबुर पोळेह का, ओ ईया युगुअ सेल्लो सोमोय हाय। 19 ख्रीस्तुअ वीरुद केअनारा ते लोक आपुअ मोंडोळामनेअ नींगी गीयाह। काहाका, ते खोरेखोर आपुअमेर्याअ नांय आथा। जो ते खोरेखोर आपुअमेर्याअ वेअता ता, ते आपुअरी रेता; पेन ते नींगी गीयाह तीयाअ लीदे बादाहांन चोख्खी रीते खोबुर पोळीअ का, तीयाहांमेनेअ एक बी आपुअमेर्योअ नांय आथो। 20 पेन तुमांअ बाबोताम आखुं ता, ख्रीस्त जो पोवीतोर हाय, तीयापेनेअ तुमनेंह पोवीतोर आत्माअ ताकोत मीलीह। तीयाअ लीदे, तुमनेंह बादाहांन हाची गोठीम आने झुटा बोदा म काय फेर हाय तों पारखुअता आवळेह। 21 तुमां पोरमेहेराअ हाची गोठ नांह जांअतें तीयाअ लीदे आंय एंहकींअ लेखुंह एंहकींअ ता नांह। पेन उलटों, तुमां ते गोठ जांअतेंह तीयाअ लीदेज आंय तुमनेंह एंहकींअ लेखुंह। आने तुमां ईं बी जांअतेंह का, पोरमेहेर जो बादी हाचायुअ मुल हाय, तीयाहांअहींनेअ केल्लो बी झुटो बोद पेदा नांह वेअतो। 22 झुटों मांहुंअ केडों हाय? “ईसु ता ख्रीस्त नांह” एंहकींअ जों आखेह तोंज झुटों मांहुंअ हाय। एंहडों मांहुंअज ख्रीस्तुअ वीरुद केअनारों हाय। तों मांहुंअ ईं मानांअ ना पाळेह का, पोरमेहेर ता बाहको हाय, आने ईसु तीयाअ पोयरो हाय। 23 जो केडों बी “ईसु पोरमेहेराअ पोयरो हाय” एंहकींअ कोबुल केरांअ ना पाळेह ता, पोरमेहेर बाहकाअरी तीयाअ सोबोंद नांह। पेन जो केडों बी “ईसु पोरमेहेराअ पोयरो हाय” एंहकींअ कोबुल केअहे ता, पोरमेहेर बाहकाअरी तीयाअ सोबोंद हाय। 24 तीयाअ लीदे, ईसु ख्रीस्तुपेअ तुमां वीसवास राखांअ टेक्यें तांहांअ तुमां जे हाची गोठ उनाअलें, तीयुअ पोरमाणे तुमांअ वोरतांअ जोजे! जो तुमां एंहकींअ केअतें रीहा ता, पोरमेहेराअ पोयराअरी आने पोरमेहेर बाहकाअरी तुमांअ सोबोंद रीअ। 25 पोरमेहेरांय आपनेंह जों वोचोन देदोंह तों ईं हाय का, तो आपनेंह कायोमाअ खातुर जीवावीअ!
26 ख्रीस्तुअ बाबोताअ जे हाचाय हाय तीया बाबोताम जे लोक तुमनेंह ठोगांअ मागताह, तीयाहांअ बाबोताम तुमनेंह चेतवांअ खातुर मांयुं ईं बादों लेख्योंह। 27 तुमांअ बाबोताम आखुं ता, पोरमेहेराअ आत्मा, जो ख्रीस्तुपनेअ तुमनेंह मील्योह, तो तुमांअ मोनाहांम रेहे। तीयाअ लीदे, तुमनेंह नोवो बोद दांअ केडाअ बी जोरुल नांह। पोरमेहेराअ बाबोताम तुमांअ जेबी हाचाय जांणांअ जोरुल हाय ते बादी हाचाय तुमनेंह हीकवुअनारो ता, पोरमेहेराअ आत्मा हाय। तो आत्मा जों हीकवेह तों खेरोंज हाय, झुटों नांह। तीयाअ लीदे, पोरमेहेराअ आत्मांय तुमनेंह जों हीक्व्योंह तीयाअ पोरमाणे वोरतुअतें रा!
28 मांअ पोयराहां, ख्रीस्तुअरी जोळाअलें रा, ईयाअ खातुर का, जांहांअ तो फाचो पोरगोट वीअ तांहांअ तो आपनेंह तीयाअ लोकाहां तोरीके मानी लीअ एंहडी आपनेंह खातरी वीअ। ख्रीस्त फाचो आवीअ तांहांअ आपुंह नाजवाअहुं नांय। 29 तुमनेंह खोबुर हाय का, ख्रीस्त हाचो हाय। तीयाअ लीदे, तुमनेंह ईं बी खोबुर पोळांअ जोजे का, हाचें कामें केअनारें बादें पोरमेहेराअ पोयरें हाय।