3
पोरमेहेराअ पोयराहांअ तोरीके जीवांअ
1 आपुअ पोरमेहेर बाहको आपुंहपेअ कोतीअ बादी माया राखेह तीयाअ वीचार केअजा! आपुंह तीयाअ पोयरें हाय एंहकींअ आखांअ तो आपनेंह सुट देहे! होकीकोतुमुज आपुंह तीयाअ पोयरें हाय। पेन दुन्यामेर्येंअ मांहेंअ जें ख्रीस्तुपेअ वीसवास नांह केअतें तें, पोरमेहेर होकीकोतुम केडो हाय तों नांह होमज्यें। तीयाअ लीदे, तें ईं बी नांह होमजुअतें का, आपुंह होकीकोतुम पोरमेहेराअ पोयरें हाय। 2 मांअ मेराला दोसदारुहुं, आमी आपुंह पोरमेहेराअ पोयरें हाय तेबी, पोरमेहेरांय आजी लोगुंअ आपनेंह जाहेर नांह केअयों का, ख्रीस्त फाचो आवीअ तांहांअ आपुंह केंहडें मांहेंअ वीअहुं। तेबी, आपुंह ओतोंअ ता जांअतेंह का, जांहांअ तो फाचो आवीअ तांहांअ आपुंह तीयाअ होच वीअहुं। काहाका, होकीकोतुम तो जेंहडो हाय तेंहडोज तीयाल आपुंह हीअहुं। 3 तीयाअ लीदे, ख्रीस्त फाचो आवीअ तांहांअ तो होकीकोतुम जेंहडो हाय तेंहडो तीयाल हेरांअ जो केडों बी आस्या राखतों वीअ ता, तीयाअ, जेंहकींअ ख्रीस्त एकदोम चोख्खो हाय तेंहकींअ सोताल एकदोम चोख्खों राखांअ जोजे! 4 पेन जें पापामुज पोळी रेतेंह, तें खोरेखोर पोरमेहेराअ नीयोम तोळतेंह। काहाका, पोरमेहेराअ नीयोम तोळुलोंअ तोंज पाप हाय। 5 तुमां जांअतेंह का, आपुअ पापाहांअ गुनो दुर केरांअज ख्रीस्त आलो। तुमां ईं बी जांअतेंह का, तीयांय कीदीह बी पाप नांह केअयो। 6 तीयाअ लीदे, जों केडों बी, ख्रीस्त तीयापेअ जों केरावांअ मागेह तों केअतों रेहे ता, तों घेळी-घेळी पाप नांह केअया केअतों। पेन जों केडों बी घेळी-घेळी पाप केअहे ता, तीयांय ख्रीस्तुल खोरेखोर होमज्यो बी नांह आने ओअख्यो बी नांह। 7 तीयाअ लीदे, मांअ मेराला पोयराहां, आंय तुमनेंह कालावाला कीईन आखुंह, केडों बी तुमनेंह ठोगीन पाप नांय केरावी जाय तीयाअ कालजी राखजा! जो तुमां हाचें कामें केअया केअतेंह ता, जेंहकींअ ख्रीस्त हाचो हाय तेंहकींअ तुमां बी हाचें हाय। 8 पेन जो केडों बी पाप केअया केअहे ता, तों सेतानाअ होच हाय। काहाका, सेतान दुन्या बोंणली तेंहडामेर्योअ पाप केअतोज आलोह। पेन सेतानाअ कामाहांअ नास केरांअज पोरमेहेराअ पोयरो मांहुंअ बोंण्यो। 9 जोंबी पोरमेहेराअ पोयरो बोंण्यों वीअ ता, तों घेळी-घेळी पाप केअतों नांह रेतों। काहाका, पोरमेहेरांय जों हारों जीवोन आने हारो गुण तीयाम पेदा केअयोह तीयाअ पोरमाणे तों वोरतुअतों रेहे। तों घेळी-घेळी पाप केअतों नांह रीअ सेकतों। काहाका, पोरमेहेरांय तीयाल सोताअ पोयरो बोंणाव्योह। 10 पोरमेहेराअ पोयरें केडें हाय आने सेतानाअ पोयरें केडें हाय तीयाअ फेर चोख्खी रीते देखाय आवेह। सेतानाअ पोयराहांन ओअखांअ रीत ए हाय: जों केडों बी हाची रीते नांह वोरतुअतों ता, तों पोरमेहेराअ पोयरो नांह। खास कीईन जो केडों बी सोताअ आर्याअ वीसवास्यांहपेअ माया नांह राखतों ता, तों पोरमेहेराअ पोयरो नांह। उलटों, तों सेतानाअ पोयरो हाय।
एक बीहरापेअ माया राखा!
11 ख्रीस्तुपेअ तुमां पेअलांम-पेअलोअ वीसवास केअलो तांहांअ जे गोठ तुमां उनाअलें, ते एज हाय का, आपुअ एक-बीहरापेअ माया राखांअ जोजे। 12 आदामाअ पोयरो कायीन, जो खोटों केअनारा सेतानाअ मांहुंअ आथो, तीयांय जेंहकींअ सोताअ पावुहल नोफरोत केअली तेंहकींअ आपुअ, आपुअ आर्याअ वीसवास्यांहन नोफरोत नांय केरांअ जोजे। कायीनुंह सोताअ पावुहल नोफरोत केअली तीयाअ लीदे, तीयांय सोताअ पावुहल माय टाकलो। तीयांय सोताअ पावुहल काहाल माय टाकलो तों आंय तुमनेंह ईत केरावुंह: पोरमेहेराअ नोजराम तीयाअ वोरतोनुंज खाराब आथों, आने तीयाअ पावुअ वोरतोन खेरों आथों। 13 तीयाअ लीदे मांअ पावु-बोंअयुहुं, ख्रीस्तुल नांय माननारें मांहेंअ तुमनेंह नोफरोत केअ तांहांअ, तुमनेंह नोवाय नांय लागांअ जोजे। 14 आपुंह जांअतेंह का, आत्मीक रीते मोअली हालोतामेनेअ नींगीन आपुंह आत्मीक रीते जीवती हालोताम आलेंह। काहाका, आपुंह आपुअ आर्याअ वीसवास्यांहपेअ माया राखतेंह। पेन जों केडों बी सोताअ आर्याअ वीसवास्यांहपेअ माया नांह राखतों ता, तों आजी आत्मीक रीते मोअली हालोतामुज हाय। 15 जों केडों बी सोताअ आर्याअ वीसवास्याल नोफरोत केअ ता, पोरमेहेर तीयाल खुनी गोंअहें। आने तुमां जांअतेंह का, केल्ला बी खुनील पोरमेहेर कायोमाअ खातुर नांय जीवावीअ। 16 ख्रीस्तुंह आपुअ खातुर सोताअ जीव देदो। तीयापेनेअ आपुंह जांय लेदोंह का, आपुअ आर्याअ वीसवास्यांहपेअ आपुअ केंहडी माया राखांअ जोजे। तीयाअ लीदे, आपुअ आर्याअ वीसवास्यांहन जोरुल वेअ एंहडों काय बी आपुंहपेअ वेअ ता, तों तीयाहांन दांअ आपुअ तीयार रांअ जोजे। तीयाहांअ खातुर आपुअ जीव दांअ बी आपुअ तीयार रांअ जोजे। 17 आपुंहमेर्याअ खुब मांहांहांपेअ ईयु दुन्याम जीवांअ खातुर जोजवुअत्या वोस्तु वीअ, आने आपुअ आर्याअ वीसवास्याल जीवांअ खातुर काय जोरुल पोळीह तों जांयन बी तीयाल ते पुरी पाळांअ जो आपुंह ना पाळजी ता, आपुंह आखतेंह तीयाअ पोरमाणे आपुंह खोरेखोर पोरमेहेरापेअ माया नांह राखतें। 18 मांअ पोयराहां, आपुंह नांडें-नांडें नांय आखजी का, आपुंह आपुअ आर्याअ वीसवास्यांहपेअ माया राखतेंह। उलटों, तीयाहांन मोदोत कीईन देखावजी का, आपुंह तीयाहांपेअ खोरेखोर माया राखतेंह!
19 आपुअ आर्याअ वीसवास्यांहपेअ आपुंह खोरेखोर माया राखजी ता, आपनेंह खातरी वीअ सेके का, आपुंह हाची गोठी पोरमाणे वोरतुअतेंह। तीयाअ पोरीणामे, पोरमेहेराअरी आपुंह गोठ्या केअजी तांहांअ आपनेंह एंहडों नांय लागे का आपुंह गुनालें हाय। 20 आपुंह गुनालें हाय एंहकींअ आपनेंह लागे तेबी, पोरमेहेराल ओरुज केअतीअ वोखत आपनेंह खातरी वीअ सेके। काहाका, आपनेंह जों लागेह तीयाअ केअता पोरमेहेर मोडो हाय। तो आपुअ बाबोताम बादों जांअहे। 21 मेराला दोस्दारुहुं, आपुंह गुनालें हाय एंहकींअ आपनेंह नांय लागे ता, आपुंह खातरी राखीन पोरमेहेराल ओरुज कीअ सेकतेंह। 22 तांहांअ, जो आपुंह तीयापेनेअ काय बी मागुंह ता, तों तीयापेनेअ आपनेंह मीलीअ। काहाका, आपुंह तीयाअ हुकोम पालतेंह आने तीयाल गोंवतें कामें केअतेंह। 23 तीयांय आपनेंह जो एकदोम खास हुकोम देदोह तो ओ हाय: ईसु ख्रीस्त तीयाअ पोयरो हाय एंहकींअ आपुअ मानांअ जोजे, आने तीयांय देदला हुकोमा पोरमाणे आपुअ एक-बीहरापेअ माया बी राखांअ जोजे। 24 जों केडों पोरमेहेराअ हुकोम पालेह, पोरमेहेराअरी तीयाअ खास सोबोंद हाय, आने पोरमेहेराअ बी तीयाअरी खास सोबोंद हाय। पोरमेहेरांय आपनेंह जो पोवीतोर आत्मा देदोह तीयापेनेअ आपुंह जांअतेंह का, आपुअरी पोरमेहेराअ खास सोबोंद हाय।