4
झुटा बोदाअ बाबोताम चेतवोंणी
1 मेराला दोस्दारुहुं, सोताल पोरमेहेराअ गोठ जाहेर केअनारा एंहकींअ झुटी रीते आखावनारा खुब लोक दुन्याअ बीहरा लोकाहांन झुटी गोठ हीकवांअ नींग्याह। तीयाअ लीदे, “पोवीतोर आत्मांयज ए गोठ मांन देदीह” एंहकींअ आखावनारा केडाअ बी दोरेक गोठ मानी मां लेतें! पेन उलटों, तो बोद पोरमेहेरापेनेअ आलोह का नांह तों जांणांअ खातुर तीया बोदा ल पारखी हेअजा! 2 पोरमेहेरापेनेअ आलला बोदा ल आपुंह एंहकींअ कीईन पारखी सेकजी: “ईसु ख्रीस्त आपुअ होच मांहुंअ बोंणांअ पोरमेहेराअहींनेअ आलो” एंहकींअ जोंबी मांहुंअ कोबुल केअहे, तीयाअ बोद पोरमेहेरापेनेअ आलोह एंहकींअ मानुलोंअ। 3 पेन जे लोक ईसुअ बाबोताम तेंहकींअ नांह कोबुल केअता, तीयाहांअ बोद पोरमेहेरापेनेअ नांह आलो, पेन ख्रीस्तुअ वीरुद केअनारापनेअ आलोह। तुमां उनाअयेंह का, तेंहडा लोक आवनारा हाय। आमी बी ते लोक दुन्याम हायज। 4 पेन मांअ पोयराहां, तुमां ता पोरमेहेराअ हाय। आने तीया लोकाहांअ बोद तुमां नांह मान्या। काहाका, तुमांअ मोनाहांम वोहती केअनारो पोरमेहेराअ आत्मा, सेतानाअ केअता, मोंजे का, पोरमेहेराअ वीरुद केअनारा लोकाहांम रेनारा आत्मा केअता, मोडो हाय। 5 झुटो बोद देनारा ते लोक ख्रीस्तुल नांय माननारा मांहांयमेर्याअ हाय। तीयाअ लीदे, ख्रीस्तुल नांय माननारें मांहेंअ जे गोठ्या उनायांअ मागतेंह, तेज गोठ्या ते हीकवुअताह। आने तीयाअज लीदे, ख्रीस्तुल नांय माननारें तें मांहेंअ तीया लोकाहांअ गोठ्या उनाअतेंह। 6 पेन आमां ता पोरमेहेराअ हाय। तीयाअ लीदे, जें मांहेंअ पोरमेहेराल ओअखुअतेंह, तें आमांअ गोठ उनाअतेंह। पेन जें मांहेंअ पोरमेहेराअ नांह, तें आमांअ गोठ नांह उनाअतें। ईयापनेअ आपुंह जांय सेकतेंह का, हाचा बोद देनारा केडा हाय आने झुटा बोद देनारा केडा हाय।
पोरमेहेर मायालु सोबावाअ हाय
7 मेराला दोस्दारुहुं, आपुंह एक-बीहरापेअ माया राखजी! काहाका, पोरमेहेर आपनेंह एक-बीहरापेअ माया राखांअ मोदोत केअहे। आने जो केडों बी सोताअ आर्याअ वीसवास्यांहपेअ माया राखेह ता, ईयाअ ओर्थो ओ हाय का, तों पोरमेहेराअ पोयरो बोंणी गीयोंह आने तों पोरमेहेराल ओअखेह बी। 8 पेन जों केडों बी सोताअ आर्याअ वीसवास्यांहपेअ माया नांह राखतों ता, ईयाअ ओर्थो ओ हाय का, तों पोरमेहेराल ओअखुअतोंज नांह। काहाका, पोरमेहेर मायालु सोबावाअ हाय। 9 पोरमेहेर आपुंहपेअ माया राखेह तों तीयांय आपनेंह ईयाकींअ देखाव्योंह: तीयांय सोताअ एकना एक पोयराल दुन्याम मोकली देदो, ईयाअ खातुर का, आपुअ खातुर मोयन तीया पोयराहां जों काम पुरों केअयोंह तीयापेअ आपुंह जो वीसवास राखतेंह तीयाकींअ तो पोयरो आपनेंह कायोमाअ खातुर जीवावे। 10 आपुंह पोरमेहेरापेअ माया राखीह तीयुल हाची माया नांय आखाय। पेन पोरमेहेरांय आपुंहपेअ माया राखी तीयुलुज हाची माया आखाय। काहाका, आपुअ पाप माफ केरांअ खातुर तीयांय सोताअ पोयराल सोताअ जीवुअ भोग दांअ मोकल्यो। 11 मेराला दोस्दारुहुं, पोरमेहेरांय आपुंहपेअ एंहडी माया राखीह तीयाअ लीदे, आपुअ बी एक-बीहरापेअ माया राखांअ जोजे।
12 केडांय बी पोरमेहेराल कोय वोखत बी नांह देख्यो। तेबी, जो आपुंह एक-बीहरापेअ माया राखजी ता, तीयाकींअ आपुंह ईं देखावतेंह का, पोरमेहेराअ गुण आपुंहम हाय, आने पोरमेहेराअ ईरादा पोरमाणेज आपुंह बीहराहांपेअ माया राखतेंह। 13 पोरमेहेरांय सोताअ पोवीतोर आत्मा आपनेंह देदोह। ईयाकींअ आपनेंह खातरी वीअ सेके का, पोरमेहेराअरी आपुअ खास सोबोंद हाय आने तीयाअ गुण आपुंहम हाय। 14 आमां, मालीखाअ खास चेलाहां पोरमेहेराअ पोयराल देख्योह, आने आमां लोकाहांन आखताह का, दुन्याअ लोकाहांन तीयाहांअ पापाहांअ सीक्सामेनेअ वाचावांअ खातुर पोरमेहेर बाहकांय तीयाल मोकल्यो। 15 तीयाअ लीदे, “ईसु पोरमेहेराअ पोयरो हाय” एंहडों जों केडों बी कोबुल केअ ता, पोरमेहेराअ गुण तीयाम हाय आने पोरमेहेराअरी तीयाअ खास सोबोंद हाय। 16 आने पोरमेहेर आपुंहपेअ केंहडी माया राखेह तीयाअ आपुंह ओनुभोव केअयोह, आने आपुंह वीसवास बी केअयोह का, तो आपुंहपेअ माया राखेह। तीयाअ पोरीणामे, आपुंह बीहराहांपेअ माया राखतेंह। पोरमेहेर मायालु सोबावाअ हाय तीयाअ लीदे, जो केडों बी सोताअ आर्याअ वीसवास्यांहपेअ माया राखेह ता, पोरमेहेराअरी तीयाअ सोबोंद हाय, आने पोरमेहेराअ गुण तीयाम हाय। 17 पोरमेहेराअ ईरादा पोरमाणेज आपुअ बीहराहांपेअ माया राखांअ जोजे। आने जो आपुंह तेंहकींअ कीईन बीहराहांपेअ माया राखजी ता, पोरमेहेर आपुअ नीयाय केरांअ वोखत आवीअ तांहांअ, आपनेंह खातरी वीअ का, तीयाअरी आपुअ सोबोंद हाय। ख्रीस्त जेंहकींअ वोरतुअलो, तेंहकींअ ईयु दुन्याम वोरतीन आपुंह देखावतेंह का, आपुंह पोरमेहेराअ ईरादा पोरमाणेज माया राखतेंह। 18 जो आपुंह खोरेखोर पोरमेहेरापेअ माया राखतें वीअ ता, आपनेंह तीयाअ बीख नांय लागे। जो केडों बी पोरमेहेरापेअ तीयाअ ईरादा पोरमाणे माया राखेह ता, तीयाल पोरमेहेराअ बीख नांय लागे। पोरमेहेर आपनेंह सीक्सा कीअ एंहकींअ जो आपुंह धारजी तांहांअज, आपनेंह तीयाअ बीख लागीअ। तीयाअ लीदे, जो केडाल बी पोरमेहेराअ बीख लागती वीअ ता, तों नोक्कीज पुरी रीते पोरमेहेरापेअ माया नांह राखतों। 19 आपुंह पोरमेहेरापेअ आने आपुअ आर्याअ वीसवास्यांहपेअ माया राखतेंह, काहाका, पेअलांअ पोरमेहेरांय आपुंहपेअ माया राखी। 20 तीयाअ लीदे, “आंय पोरमेहेरापेअ माया राखुंह” एंहकींअ जो केडों बी आखे पेन सोताअ आर्याअ वीसवास्याल नोफरोत केअ ता, तों झुटों गोगेह। काहाका, सोताल देखाअहे एंहडा आर्याअ वीसवास्यापेअ तों माया नांय राखी सेकतों वीअ ता, तीयाल नांय देखाअनारा पोरमेहेरापेअ तों नोक्कीज माया राखी नांह सेकतों। 21 ईत राखजा का, पोरमेहेरांय आपनेंह हुकोम केअयोह का, जो केडों बी पोरमेहेरापेअ माया राखे ता, तीयाअ सोताअ आर्याअ वीसवास्यांहपेअ बी माया राखांअ जोजे।