5
ईसुज ख्रीस्त हाय एंहडो वीसवास
1 “ईसुज ख्रीस्त हाय” एंहडो वीसवास केअनारें बादें मांहेंअ खोरेखोर पोरमेहेराअ पोयरें बोंण्येंह। जों केडों बी तीयाल सोताअ पोयरो बोंणावनारा पोरमेहेरापेअ माया राखतों वीअ ता, तों सोताअ आर्याअ वीसवास्यापेअ बी माया राखीअ। काहाका, तीयाल बी पोरमेहेरांय सोताअ पोयरो बोंणाव्योह। 2 जांहांअ आपुंह पोरमेहेरापेअ माया राखीन तीयाअ हुकोम पालतेंह तांहांअ, आपनेंह खोबुर पोळेह का आपुंह पोरमेहेराअ पोयराहांपेअ बी हाची रीते माया राखतेंह। 3 खोरेखोर ता, आपुंह पोरमेहेराअ हुकोम पालजी तों, तीयापेअ आपुंह माया राखजी तीयाअ बोराबोर हाय। आने तीयाअ हुकोम पालांअ तों दाबोण आवे एंहडों नांह। 4 जीयाल बी पोरमेहेरांय सोताअ पोयरो बोंणाव्योह तो, पोरमेहेराअ वीरुद केअनारा लोकाहांअ खाराब रीवाज पालांअ ना पाळतो रेहे। ख्रीस्तुपेअ आपुंह राखला वीसवासुकींअज आपुंह एगुंहवार्येंअ तीया लोकाहांअ खाराब वाटे चालांअ ना पाळतें रीयेंह। 5 “ईसुज पोरमेहेराअ पोयरो हाय” एंहकींअ जें वीसवास केअतेंह, तेंज मांहेंअ, पोरमेहेराअ वीरुद केअनारा लोकाहांअ खाराब वाटे चालांअ ना पाळी सेक्तेंह।
ईसु ख्रीस्तुअ बाबोताम साक्सी
6 ईसु ख्रीस्तुअ बाबोताम वीचारजा! बापतीस्मा केअनारा योहानांय तीयाअ बापतीस्मा केअलों तांहांअ आने तो सोताअ रोगुत पाळीन मोअयो तांहांअ पोरमेहेरांय देखाव्यों का, तो होकीकोतुमुज पोरमेहेराअहींनेअ आलो। योहानांय तीयाअ बापतीस्मा केअलों तांहांअ ओतोंअज नांय, पेन तो आपुअ खातुर रोगुत पाळीन मोअयो तांहांअ बी पोरमेहेरांय ए बाबोत जाहेर केअयी। आने पोरमेहेराअ आत्मा बी जाहेर केअहे का ईसु ख्रीस्त पोरमेहेराअहींनेअज आलो। तो आत्मा, जों खेरों हाय तोंज कायोम गोगेह। 7 तीन एंहडया बाबोत्या हाय का जीयुंहकींअ आपुंह जांय सेकतेंह का ख्रीस्त पोरमेहेराअहींनेअज आलो। 8 ते बाबोत्या ए हाय: पोरमेहेराअ आत्मांय, आने योहानांय ख्रीस्ताअ बापतीस्मा केअलों तांहांअ पोरमेहेरांय जों आखलों तों, आने कुरुसापेअ ख्रीस्तंह सोताअ रोगुत पाळलों तांहांअ जों बोंणलों तों। ए तीनुं बाबोत्या खातरी देत्याह का, ईसु पोरमेहेराअहींनेअज आलो। 9 बीहरें मांहेंअ जों आखतेंह तों आपुंह मानतेंहज। पेन पोरमेहेर जों आखेह तों, मांहेंअ जों आखतेंह तीयाअ केअता वादारे खातरीअ हाय। 10 तीयाअ लीदे, जोंबी पोरमेहेराअ पोयरापेअ वीसवास केअहे, तों सोताअ मोनाम जांअहे का, पोरमेहेर सोताअ पोयराअ बाबोताम जों आखेह तों खेरोंज हाय। पेन पोरमेहेर जों आखेह तों खेरोंज हाय एंहडों मानांअ जोंबी ना पाळेह, तों एंहकींअ जाहेर केअहे का, पोरमेहेर झुटों गोगेह। 11 पोरमेहेर जों आखेह तों ईं हाय: “मांयुं वोचोन देदोंह का, तुमां कायोमाअ खातुर जीवाह!” जो तीयाअ पोयराअरी आपुअ हारो सोबोंद वीअ ता, आपुंह कायोमाअ खातुर जीवुंह। 12 जीयांय बी, पोरमेहेराअ पोयराहां तीयाअ खातुर जों केअयोंह तो मान्योह, तीयांय कायोमाअ खातुर जीवांअ चालु कीअ देदोंह। पेन जीयांय बी, पोरमेहेराअ पोयराहां तीयाअ खातुर जों केअयोंह तों नांह मान्यों, तीयांय कायोमाअ खातुर जीवांअ चालु नांह केअयों।
ईसु ख्रीस्त सोताअ लोकाहांन कायोमाअ खातुर जीवावेह
13 “ईसुज पोरमेहेराअ पोयरो हाय” एंहकींअ माननारा तुमाहांपेअ मांयुं ईं कागलों लेख्योंह, ईयाअ खातुर का, तुमां कायोमाअ खातुर जीवतेंह तों तुमां जांणा। 14 तीया बाबोताम आपनेंह पाकी खातरी हाय का, जांहांअ बी आपुंह तीयाअ मोर्जी पोरमाणे तीयापेअ जों काय बी मागजी, तांहांअ तो आपुअ ओरुज उनायन तो आपनेंह दीअ। 15 खास कीईन आपुंह जांअतेंह का, तो आपुअ ओरुजया उनाअहे। तीयाअ लीदे, आपनेंह खातरी वीअ सेके का, जो आपुंह तीयापेअ मागुंह, तों तो आपनेंह दीअ।
16 जो केडों सोताअ आर्याअ वीसवास्याल खोटों केअता हेअ ता, तो तीया वीसवास्यांअ खातुर पोरमेहेराल ओरुज केअ, आने तीयाअ पोरीणामे, पोरमेहेर तीयाल कायोमाअ खातुर जीवावीअ। पेन ओमुक मांहेंअ एंहकींअ पाप केअतेंह का जो तीयाहांन कायोमाअ खातुर पोरमेहेराअ से सेटे केअहे। एंहकींअ पाप केअनारा मांहांहांअ खातुर तुमां पोरमेहेराल ओरुज केरा एंहकींअ आंय नांह आखतो। 17 खोटों केरुलोंअ तोंज कायोम पाप हाय। पेन एंहडा थोळाक पाप हाय का जे एक मांहांअल कायोमाअ खातुर पोरमेहेराअ से सेटे नांह केअता। 18 आपुंह जांअतेंह का, जीया बी मांहांअल पोरमेहेरांय सोताअ पोयरो बोंणाव्योह, तों मांहुंअ पाप केअतों नांह रेतों। उलटों, पोरमेहेराअ पोयरो तीयाल हाचवेह, ईयाअ खातुर का, खोटों केअनारो सेतान तीयाअ नुकसान नांय केअ। 19 आपुंह ईं बी जांअतेंह का, आपुंह पोरमेहेराअ हाय, आने दुन्यामेर्येंअ खाराब मांहेंअ खोटों केअनारा सेतानाअ कोबजाम हाय। 20 आपुंह ईं बी जांअतेंह का, पोरमेहेराअ पोयरो आपुंअहीं आलोह, आने तीयांय आपनेंह खेरा पोरमेहेराल ओअखाव्योह। मोंजे आमी, खेरा पोरमेहेराअरी आपुअ हारो सोबोंद हाय। काहाका, आपुंह तीयाअ पोयरा ईसु ख्रीस्तुअ लोक हाय। ईसु ख्रीस्त होकीकोतुमुज पोरमेहेर हाय, आने लोकाहांन कायोमाअ खातुर जीवावनारो बी तोज हाय।
21 मांअ पोयराहां, ईसु ख्रीस्त होकीकोतुमुज पोरमेहेर हाय तीयाअ लीदे, नोकली देवुंहन मां पुंजतें!