12
ईसु ख्रीस्तुअ नोमुनो
1 पोरमेहेरापेअ वीसवास राखनारा जुना जोमानाअ एंहडा लोकाहांअ मोडी भीळ आपुअ चारु वेल उबी रीईन आपनेंह हेअया केअहे तीयाअ लीदे, चाला आपुंह ख्रीस्ती जीवोनाम आगलांअ वादता आपनेंह ओटकावनारी दोरेक बाबोतील, मोंजे का, आपनेंह सोताअ गुलाम बोंणावी देनारा पापुल सोळी देजी, आने दोवळांअ होरीफायुम दोवळुअतें वीअ तेंहकींअ, आपुंह आपुअ आगलार्योंअ ख्रीस्ती जीवोन जीवांअ आपुअ मोनाहांम नोक्की केअजी! 2 जो ईसु सोरुवातनेअ सेवोट लोगुंअ आपुअ वीसवासाअ आदार हाय, तीया ईसुअ बाबोताम आपुंह होर-होमीसा वीचार केअतें रेजी! तो सोताल फाचलांअ नेअ मीलनारा आनोंदुअ खातुर राजी-खुसी ओपमान वेठीन कुरुसापेअ मोअयो, आने आमी तो होरगाम पोरमेहेराअ गादीअ हुदी वेल, मोंजे का, खुब मानुवाला जागे बोठलो हाय। 3 पापींअ वीरुद बी वेठी लेनारा ईसुअ तुमां वीचार केरा, ईयाअ खातुर का, तुमां हींमोत नांय हारी जा आने तीयापेअ वीसवास राखांअ सोळी नांय दा।
पोरमेहेर आपुअ आत्मीक बाहका तोरीके आपनेंह वारेह
4 पापी सोबावाअ आर्याअ तुमांअ लोळायुम, तुमनेंह सोताल मोरांअ पोळे एंहडी हालोत आजी लोगुंअ नांह आली।
5 पोरमेहेर तुमनेंह तीयाअ पोयराहांअ तोरीके उंह चोळवांअ खातुर जे सोब्दा आखेह, ते तुमां वीहराय मां जातें! तो एंहकींअ आखेह का,
“ओ मांअ पोयरा, जांहांअ आंय मालीख तुल वारुंह, तांहांअ तीयापेअ बोराबोर धीयान दे! आने जांहांअ आंय तुल ठोपको दीहुं, तांहांअ तुं जीव मां पाळतो! 6 काहाका, जीया बी मांहांहांपेअ आंय मालीख माया राखुंह, तीयाहांन आंय वारुंह, आने जीया बी मांहांहांन आंय सोताअ पोयरें गोंअहुं, तीयाहांन आंय सीक्सा कीअहुं।” 7 तुमां वेठतेंह तों दुख सोताअ बाहको वारेह एंहकींअ गोंईन वेठी ला। तुमांअ दुख एंहडी साबीती देहे का, पोरमेहेर तुमांअरी सोताअ पोयराहांअ तोरीके वोरतेह। काहाका, एंहडों एक बी पोयरों नांह का, जीयाल तीयाअ बाहको वारतो नांह। 8 पोरमेहेर जेंहकींअ तीयाअ बीहरा बादा पोयराहांन वारेह तेंहकींअ जो तो तुमनेंह नांय वारे ता, तीयाअ ओर्थो ओ हाय का, तुमां खेरी रीते तीयाअ पोयरें नांह। 9 दुन्यामेर्याअ आपुअ बाहकाहां आपनेंह वार्यें आने आपुंह तीयाहांन मान बी देदों। तांहांअ होरगामेन्याअ आपुअ पोरमेहेर बाहको आपनेंह वारेह तों बी आपुंह वेठी लेजी, आने तीयाअ पोरीणामे कायोमाअ खातुर होरगाम जीवजी तीयाअ कोतीअ वादारे जोरुल हाय!
10 दुन्यामेर्याअ आपुअ बाहकाहां तीयाहांन हारों लागलों तेंहकींअ थोळेंक वोरसें आपनेंह वार्यें। पेन आपुअ पोरमेहेर बाहको आपुअ हाराअ खातुर आपनेंह वारेह, ईयाअ खातुर का, आपुंह तीयाअ होच पोवीतोर बोंणजी। 11 पोरमेहेर बाहको आपनेंह वारे तांहांअ तुरुतुज ता तों आपनेंह हारों नांहज लागतों, पेन दुखी केअनारोंज लागेह। पेन तों वेठनारा आपनेंह फाचलांअ नेअ तीयाअ पोरीणामे सांतीवालों आने खेरों जीवोन मीलेह।
12 तीयाअ लीदे, तुमां ख्रीस्ती जीवोनाअ बाबोताम बेन-मोनुवालें मां बोंणतें! पेन उलटों एक-बीहराल उफ देतें रा! 13 आने तुमां हाचायुअ रीते वोरता, ईयाअ खातुर का, जें मांहेंअ आत्मीक रीते नोबलें हाय, तें वादारे नोबलें नांय बोंणे पेन मोजबुत बोंणे।
14 बादा लोकाहांअरी सांतीम रांअ कोसीस केअजा आने पोवीतोर जीवोन जीवांअ मेहनोत केअजा! काहाका, एंहडों जीवोन नांय जीवा ता, मालीखाअ दोरसोन तुमनेंह नांय मीले। 15 तुमाहांमेनेअ केडों बी पोरमेहेराअ मेरबानी मीलवांअ चुकी नांय जाय तीयाअ कालजी राखजा! कालजी राखजा का, तुमांअ माज केल्ली बी जातीअ कोळवो सोबाव नांय पेदा वेअ। काहाका, तो पेदा वेअहे तांहांअ खुब जातीअ मुस्कुल्या पेदा वेअत्याह, आने तीयाअ पोरीणामे, एक-बीहराअरीअ सोंगोत टुटी जाहे। 16 हेअजा का, तुमाहांमेनेअ केडों बी सीनालों केअनारों नांय बोंणे, का आत्मीक बाबोतीहींअ कींमोत नांय जांअनारा एसावुअ होच नांय बोंणे! तीया एसावुंह, मोडा पोयरा तोरीके तीयाल जो होक मीललो, तो एक टोकुअ मांडाहांअ खातुर वेची देदलो। 17 तुमनेंह खोबुर हाय का, फाचलांअ नेअ तीयांय सोताअ बाहकापेनेअ आसीरवाद मीलवांअ मोर्जी राखली, पेन तो तीयाल नांह मील्यो। रोळता-रोळता तो आसीरवाद मीलवांअ तो कोसीस केअत्लो तेबी, तीयांय पेअलांअ जों केअलों तीयाल तो बोदली नांह सेक्यो।
18-19 आपुअ आगलेंअ डायें आललें तेंहडा सीनाय डोगुअहीं तुमां नांह आलें। तीया सीनाय डोगुअहीं ता, चोळ-चोळ आग बोलत्ली, आंदारों-गुळुक वीअ गेहलों, आने वादुंअ चालत्लों, आने पीपारांअ खुब आवाज आवत्लो, आने पोरमेहेर गोगत्लो तों एंहडों आथों का, उनाअनाराहां कालावाला केअया, “आमनेंह आमी एक बी सोब्दो वादारे मां उनावोह।” 20 काहाका, पोरमेहेरांय जो हुकोम देदलो तो उनायनुंज तें कापी उठलें। तीयांय एंहकींअ हुकोम देदलो का, “जों केडों बी ईया डोगाअल आथले, हातींअ तों मांहुंअ वेअ का जोनावोर वेअ, तीयाल ढोगळाकींअ ठोकीन माय टाकुलोंअ!” 21 आने तींहींमेनेअ देखावुज बीख लागे एंहडो आथो का, मोसे ता बोंबली उठलो: “बीखुअ लीदे मांन थुर-थुर कापावी उठ्योंह!”
22 पेन तुमां ता सीयोन डोगुअहीं आलेंह, एकुज खेरा पोरमेहेराअ सेहेराम, मोंजे का, होरगामेन्याअ येरुसालेम सेहेराम आलेंह। तींहीं हाजारु होरगाअ दुत हाय। 23 आने तुमां पोरमेहेराअ आत्मीक कुटुंबुम पेअलाअ जोन्मुअला पोयराहांअ मोंडोळाम आलेंह, का जीयाहांअ नांवें पोरमेहेरांय होरगाम नोंदयेंह। आने तुमां बादा लोकाहांअ नीयाय केअनारा पोरमेहेराअहीं आलेंह। आने जीया जुना जोमानाअ लोकाहांन पोरमेहेरांय डागु वोगुराअ बोंणाव्याह, तीया हाचा लोकाहांअहीं आलेंह, का जें आमी होरगाम आत्माअ रुपाम हाय। 24 आने जीयाअ मारफोते पोरमेहेरांय लोकाहांअरी नोवो कारार केअयोह तीया ईसुअहीं तुमां आलेंह, आने सोताअ खुनाअ बोदलो वालांअ पोरमेहेराल पोकार केअनारा आबेलुअ रोगुताअ हीं आवांअ बोदले, तुमां ईसुंय साटला रोगुताअ हीं आलेंह का जों तीयाल माय टाकनारांहन मेरबानी कीईन माफ केअहे।
25 तीयाअ लीदे, तुमांअरी गोगनारा पोरमेहेराअ गोठ धीयान दीईन उनायांअ कालजी राखजा। पोरमेहेराअ गोठ जाहेर केअनारा ईयु तोरतीमेर्याअ मोसेअ गोठ जें ईसरायेल मांहेंअ धीयान राखीन नांह उनाअयें, तें सीक्सामेनेअ नांह वाचाअयें। तांहांअ जो आपुंह होरगामेनेअ आपुअरी गोगनाराअ गोठ्या नांय मानजी ता, नोक्कीज सीक्सामेनेअ नांय वाचाअजी। 26 तीयु वोखत पोरमेहेरांय सोताअ आवाजुकींअ तोरतील आलवी टाकली। पेन आमी तो बीहरों एक वोचोन देहे का, “आंय फाचो एक वोखत तोरतील एखली नांय, पेन जुगाल बी आलवी टाकेंह।” 27 “फाचो एक वोखत” ईया सोब्दांअ चोख्खो ओर्थो ओ वेअहे का, पोरमेहेरांय बोंणावली वोस्ताहांन तो आलवी टाकीअ, ईयाअ खातुर का, आलवाय नांय तेंहडया वोस्तु कायोम रीअ सेके।