11
पोरमेहेरापेअ वीसवास
1 जे वोस्तु मीलीअ एंहकींअ आपुंह आस्या राखतेंह, ते वोस्तु पोरमेहेर आपनेंह नोक्कीज दीअ एंहडी खातरी राखुलोंअ, आने जीयु वोस्ताहांन आपुंह हीअ नांह सेकतें ते वोस्तु नोक्कीज हायाताम हाय एंहकींअ पुरी खातरीकींअ मानुलोंअ, तोज वीसवास हाय। 2 जुना जोमानाअ पोवीतोर लोकाहीं पोरमेहेरापेअ वीसवास राखलो तीयाअ लीदे, तो तीयाहांपेअ राजी वीयो।
3 आपुंह पोरमेहेरापेअ वीसवास राखतेंह तीयाअ लीदे आपुंह होमजुअतेंह का, जुग-तोरती हायाताम आवे एंहकींअ पोरमेहेरांय हुकोम केअयो तीयाअ लीदो जुग-तोरती बोंणावी, मोंजे का, केडाल बी नांह देखाअतों तीयाकींअ पोरमेहेरांय जों आपनेंह देखाअहे तों होरज्यों।
4 आदामाअ पोयरा आबेलाल पोरमेहेरापेअ वीसवास आथो तीयाअ लीदे, तीयांय सोताअ पावुह कायीनुंह पोरमेहेराल चोळवुअला भोगुअ केअता चोळीयातो भोग चोळवुअलो। आने तीयाअ वीसवासाअ लीदे पोरमेहेरांय तीयाल खेरों मांहुंअ जाहेर केअयों। काहाका, पोरमेहेरांय सोतेज साक्सी देदी का, आबेलांय खेरा मोनाकींअ ओरपोणें चोळवुअलें। आबेलाल पोरमेहेरापेअ वीसवास आथो तीयाअ लीदे आपुंह आखी सेकतेंह का, तो मोय गीयो तेबी, तो आजी गोगेह। काहाका, तीयाअ वीसवासुकींअ आपनेंह बोद मीलतो रेहे।
5 हेनोखुल पोरमेहेरापेअ वीसवास आथो तीयाअ लीदे तो नांह मोअयो।
उलटों, पोरमेहेरांय तीयाल होरगाम लीअ लेदो। तो केडाल बी नांय झुळ्यो। काहाका, पोरमेहेरांय तीयाल होरगाम लीअ लेदलो। पोवीतोर लेखाणाहांम तीया बाबोताम लेख्योंह तेंहकींअ, पोरमेहेरांय हेनोखुल होरगाम लीअ लेदो तीयाअ पेअलांअ तीयांय पोरमेहेराल राजी राख्यो।
6 पोरमेहेरापेअ वीसवास राख्या वोगुर केडों बी तीयाल राजी नांह राखी सेकतों। काहाका, जोंबी मांहुंअ तीयाहांअहीं आवांअ मागे, तीयाअ एंहडो वीसवास राखांअ जोजे का, पोरमेहेर खोरेखोर हायाताम हाय, आने तीयाल मीलांअ मागनारांहन तो हारो बोदलो देहे।
7 नुहुल पोरमेहेरापेअ वीसवास आथो तीयाअ लीदे, तीयांय भोवीस्यांम बोंणनारा बोनावाअ बाबोताम पोरमेहेरांय तीयाल देदली चेतवोंणी मानी लेदी। तीयाअ लीदे, तो सोते आने तीयाअ कोर्येंअ, आवनारा नासुमनेअ वाचाय जाय तीयाअ खातुर तीयांय खुब मोडी उळी बोंणावी। तीयांय सोताअ वीसवासुकींअ देखावलों का, पोरमेहेरापेअ वीसवास नांय राखनारें मांहेंअ खाराब हाय। नुहुल पोरमेहेरापेअ वीसवास आथो तीयाअ लीदे, पोरमेहेरांय जाहेर केअयों का, नुह हाचो हाय।
8 पोरमेहेरांय आबराहामाल जो देस दांअ वोचोन देदलों तीया देसाम सोताअ कोअ सोळीन जांअ पोरमेहेरांय तीयाल आख्यों तांहांअ, आबराहामुंह पोरमेहेराअ वोचोनुपेअ वीसवास केअलो। तीयाअ लीदे, तीयांय पोरमेहेराअ आखलों मान्यों। तो कांहीं जाहे तीयाअ तीयाल सोताल बी खोबुर नांय आथी तेबी, तो सोताअ देस सोळीन गीयो। 9 पोरमेहेरांय तीयाल जो देस दांअ वोचोन देदलों तीया देसाम तो, पोरमेहेरापेर्याअ तीयाअ वीसवासाअ लीदे, पोरदेसी मांहांअ होच तोंबुंहम रेहलो।
तीयाअ होच पोरमेहेरापेनेअ तोंज वोचोन मीलवुअनारो तीयाअ पोयरो ईसाक आने ईसाकाअ पोयरो याकोब बी तोंबुंहम रेहला। 10 काहाका, रांअ खातुर आबराहामाअ नोजुर एंहडा सेहेरुपेअ आथी का, जीयाअ योज्ना केअनारो आने बांदनारो पोरमेहेर हाय, आने जों सेहेर कायोम रेनारों हाय।
11 पोयरें पेदा केरांअ आबराहामाअ ने तीयाअ कोअवालीअ साराअ उंमोर वीती गेहली आने सारा वांयटी बी आथी तेबी, तीयाहांअ पोयरों वीयो। काहाका, आबराहामाल खातरी आथी का, तीयाल वोचोन देनारो पोरमेहेर तीयाअ पोरमाणे कीअ। 12 तीयाअ लीदे, ईया एक मांहांअ मोंजे आबराहामाअ वोसुलाम ओतेंअ बादें पोयरें पेदा वीयें का, जें जुगामेर्याअ तारांअ तोतेंअ आने दोरीयाअ तोळीपेरीअ रेटीअ ओतेंअ गोंईं बी नांय सेकाय तेंहडें आथें। आबराहाम खुब डायो आथो आने पोयरें पेदा केरांअ बाबोताम तो मोअला मांहांअ होच आथो तेबी, एंहकींअ बोंणलों।
13 ए बादा वीसवासु लोक ता, पोरमेहेरांय तीयाहांन जे वोस्तु दांअ वोचोन देदलों, ते वोस्तु मीलव्या वोगुरुज पोरमेहेरापेअ वीसवास राखता-राखता मोअया। पेन तीयु वोस्ताहांन सेटेनेअज हीईन ते खुब खुस वीया। आने ते सोते ईयु तोरतीपेअ पोरदेसी लोक आने मुसाफोर हाय एंहकींअ तीयाहां उगाळी रीते कोबुल केअयों। 14 एंहकींअ कीईन कोबुल केअनारा सोते चोख्खी रीते आखताह का, सोताअ वेअ एंहडो देस कोबजो केरांअ ते वाट जोवताह। 15 ते जो देस सोळीन आलला, तीया देसाअ बाबोताम वीचार्या मां केअता। जो तीया बाबोताम ते वीचार्या केअता ता, तीया देसाम फाचा जांअ तीयाहांन तोक बी मीली रेती। 16 पेन ते तीया देसाम नांय, पेन तीयाअ केअता वादारे हारा देसाम, मोंजे का, होरगामेन्याअ देसाम जांअ मोर्जी राखत्ला। तीयाअ लीदे पोरमेहेराल तीयाहांअ पोरमेहेर आखावता खुसी वेअहे।
17 पोरमेहेरांय आबराहामाअ वीसवासाअ पारखों केअलों तांहांअ, आबराहाम तीयाअ पोयराअ भोग चोळवांअ तीयार वेअलो। काहाका, आबराहामाल पोरमेहेरापेअ आने तीयांय देदला वोचोनुपेअ वीसवास आथो। 18 पोरमेहेरांय ईसाकाअ बाबोताम आबराहामाल एंहडों वोचोन देदलों: “ईसाकुंहकींअज तोअ पोयराहांअ वोसुलो गोंणाय।” तेबी, आबराहाम सोताअ एका-एकुज पोयराल भोगुम दीअ दांअ तीयार वीअ गेहलो। 19 आबराहामाल खातरी आथी का, मोअलांमेनेअ बी मांहांहांन जीवतें केरांअ पोरमेहेरापेअ ताकोत हाय। आने एंहकींअ कीईन ईसाक मोअलांमेनेअ जीवतो वीईन आबराहामाल मील्यो वीअ तेंहडों बोंण्यों।
20 ईसाकुल बी पोरमेहेरापेअ वीसवास आथो तीयाअ लीदे तीयांय, याकोबाल आने येसावुल भोवीस्यांम मीलनारा आसीरवादुंअ बाबोताम भोवीसवाणी कीईन तीयाहांन आसीरवाद देदला।
21 याकोबाल बी पोरमेहेरापेअ वीसवास आथो तीयाअ लीदे तीयांय, मोअतीअ वोखत योसेफाअ बेनुं पोयराहांन आसीरवाद देदला। तांहांअ याकोबांय सोताअ लाकळीअ टेके उबी रीईन पोरमेहेराअ भोकती केअयी।
22 योसेफाल बी पोरमेहेरापेअ वीसवास आथो तीयाअ लीदे, तो मोरांअ तीयारीम आथो तांहांअ तीयांय ईसरायेल लोक मीसोर देसाअ गुलामीमेनेअ केंहकींअ नींगी जाय तीया बाबोताम तीयाहांन आखलों, आने तींहींनेअ नींगीन जातीअ वोखत तीयाअ आटकांहन तीयाहांअ काय केरांअ जोजे तीया बाबोताम बी आखलों।
23 मोसेअ याहकी-बाहकाल बी पोरमेहेरापेअ वीसवास आथो तीयाअ लीदे, राजाअ हुकोम तोळांअ आने मोसे जोनम्यो हातींअ तीन मोयना लोगुंअ तीयाल दोबावी राखांअ तीयाहांअ हींमोत चालली। काहाका, तीयाहां देखलों का, मोसे देखावळो पोयरो हाय।
24 मोसेल बी पोरमेहेरापेअ वीसवास आथो तीयाअ लीदे, तीयांय तो मोडो वीयो तांहांअ राजाअ पोयरीअ पोयरो आखावांअ ना पाळी। 25 आने पाप कीईन थोळाक वोखताअ खातुर सुख मीलव्या केअता पोरमेहेराअ लोकाहांअरी दुखें भोगवांअ तीयांय पोसोंद केअयों। 26 मोसेंय मीसोर देसाअ माल-मीलकोतींअ केअता ख्रीस्तुअ खातुर बीहरा लोक तीयाअ नींदा केअ तीयाल वादारे कींमती गोंअलों। काहाका, तीयाअ नोजुर ता, भोवीस्यांम तीयाल जो हारो बोदलो मीलनारो आथो, तीयापेअ आथी। 27 मोसेल पोरमेहेरापेअ वीसवास आथो तीयाअ लीदे, तीयांय मीसोर देस सोळी देदलो, आने राजाल रोग चोळी तेबी तीयाअ बीख नांय राखी। आने केडाल नांय देखाअनारा पोरमेहेरापेअ मोसेंय नोजुर राखली तीयाअ लीदे, तीयांय आगलांअ जांअज चालु राख्यों। 28 मोसेल पोरमेहेरापेअ वीसवास आथो तीयाअ लीदे, तीयांय पास्काअ तेहवार चालु केअलो। तीयांय ईसरायेल लोकाहांन आखलों, ते एक घेटाअ बोचाल मायन तीयाअ रोगुत बांअणाअ बारसाकुपेअ साटे, ईयाअ खातुर का, मीसोर देसाअ लोकाहांअ पेअलाअ जोलमुअला पोयराहांन माय टाकांअ खातुर आललो होरगाअ दुत ईसरायेल लोकाहांअ पेअलाअ जोलमुअला पोयराहांन माय नांय टाके।
29 ईसरायेल लोकाहांन पोरमेहेरापेअ वीसवास आथो तीयाअ लीदे, ते हुकली जोमीनुपेअ चालता वीअ तेंहकींअ राता दोरीयामनेअ चालीन दोरीयो उनखी गेहला। पेन मीसोर देसाअ लोक एंहकींअ कीईन दोरीयो उनखांअ गेहला ता ते पांअयांम बुडी मोअला।
30 ईसरायेल लोकाहांन पोरमेहेरापेअ वीसवास आथो तीयाअ लीदे, येरीखो सेहेराअ कोटुअ चारुवेल ते लोक सांत दीह फीर्या का तुरुतुज तीया सेहेराअ कोट टुटी पोळलो।
31 राहाब जे वेस्या आथी तीयाल पोरमेहेरापेअ वीसवास आथो तीयाअ लीदे, पोरमेहेराअ आखलों मानांअ ना पाळनारा तीयुअ सेहेराअ बीहरा मांहांहांअरी तीयुअ नास नांह वीयो। काहाका, तीयुंय ईसरायेली बातमीदारुंहन आवकार केअलो।
32 पोरमेहेरापेअ वीसवास राखला लोकाहांअ बाबोताम आजी कोतोंअ वादारे आंय तुमनेंह लेखुं? काहाका, गीदीयोन, बाराक, सामसुन, येफता, दावीद, सामुयेल आने पोरमेहेराअ गोठ जाहेर केअनारा बादाहांअ बाबोताम लेखांअ मांअपेअ पुरतो सोमोय नांह। 33 ईया लोकाहांन पोरमेहेरापेअ वीसवास आथो तीयाअ लीदे, तीयांमेर्याअ थोळाकाहीं पोरदेसी लोस्कोरुंअ आदमींअ वीरुद लोळीन तीयाहांन हारवुअला। थोळाकाहीं लोकाहांपेअ नीयायी रीते राज केअलों आने पोरमेहेरांय तीयाहांन जों दांअ वोचोनें देदलें तें मीलवुअलें। थोळाकाहीं सींह-वागुंअ मुंयें बी बोंद केअलें। 34 थोळाकाहीं चोळ-चोळ बोलती आगील उलवी टाकली, आने थोळाक तारवायुंहकींअ तीयाहांन माय टाकांअ कोसीस केअनारा लोकाहांअ से वाचाय बी गेहला। थोळाक नोबला आथा तेबी ते गोतीवाला बोंणला। थोळाक लोळायुम वीर बोंणला आने बीहरा थोळाकाहीं पोरदेसी लोस्कोरुंहन हारवुअलें। 35 ओमुक बायाहांन पोरमेहेरापेअ वीसवास आथो तीयाअ लीदे, तीयुहुंन तीयुहुंअ मोय गेहलें जातुलें मोअलांमेनेअ फाचें जीवतें मीललें।
तांहांअ ओमुक जें वीसवास सोळीन सोतावोणीमनेअ सुटकारो मीलवांअ ना पाळीन रीबाय-रीबायन मोय गेहलें; काहाका, तीयाहां आस्या राखली का, तीयाहांन फाचें जीवतें कीईन हातींअ पोरमेहेर तीयाहांन ईया जीवोना केअता हारों जीवोन दीअ। 36 बीहरा थोळाकाहांन तीयाहांअ वीसवासाअ लीदे बीहरा मांहांहां मोस्कुरी केअली आने चापकाहांअ मार ठोकलो। आने बीहराहांन तीयाहां बेळ्या टाकीन जेलाम कोंडवी देदलें। 37 मांहांहां बीहरा थोळाकाहांन ढोगळाकींअ ठोकीन माय टाकलें, आने थोळाकाहांन कोरवोतुकींअ वेअरीन बेन कुटका कीअ टाकलें। आने बीहरा थोळाकाहांन तीयाहां तारवायुकींअ माय टाकलें। थोळेंक एकदोम गोरीब आथें आने घेटाहांअ का बोकळांअ चांबळें पोवत्लें। तीयाहां दुखें वेठलें, आने लोक तीयाहांअरी खाराब रीते वोरतुअत्ला। 38 ते बीहरा देसाम जायन आसरो लेनारांअ होच उजाळुंहम आने डोगाहांम रोखळुअतें फीरत्लें, आने खोळकाअ गुफाहांम आने तोरतीअ खाडांहम रेहलें। ए दुन्या तीयाहांअ रांअ लायोक नांह रीयी।
39 ईया बादा लोकाहांन पोरमेहेरापेअ एंहडो पाको वीसवास आथो का, बीहरा मांहांहां तीयाहांअ वीसवासाअ लीदे तीयाहांन मान देदों। तेबी, पोरमेहेरांय तीयाहांन जों दांअ वोचोन देदलों तों तीयाहांन नांह मील्यों। 40 काहाका, पोरमेहेरांय आपुअ खातुर एक हाराम-हारी योज्ना नोक्की कीअ राखीह। तीयाअ ईरादो ओ आथो का, आपुअरीज तो तीयाहांन बी खामी वोगुराअ बोंणावे।