10
1 पोरमेहेराअ भोकती केरांअ खातुर मोसेअ नीयोमाहांअ पोरमाणे जे जुनी रीत आथी, ते ता आवनारी बाबोतीहींअ खाली सांअयुंअ होचुज हाय। पेन ते, पोरमेहेरांय दांअ वोचोन देदों तीया हार्या वोस्तुंअ होकीकोत नांह। तीयाअ लीदे, जे भोग मांहेंअ दोर वोरसे पोरमेहेराल एक-धारा चोळवुअतेंह, ते पोरमेहेराअ भोकती केरांअ तीयाअ पाही आवनारा तीया मांहांहांन खामी वोगुराअ बोंणावीज नांह सेकता। 2 जो तीया भोगुंहकींअ मांहेंअ खामी वोगुराअ बोंणी सेकतें ता, भोग दांअ बी बोंद वीअ जातों। काहाका, पोरमेहेराअ भोकती केअनारा लोकाहांन तीयाहांअ पापाहांअ माफी मीली जाती आने तीयाहांन एंहडों नांय लागतों का तें गुनालें हाय। 3 पेन होकीकोत ता ए हाय का, ईया भोगुंहकींअ दोर वोरसे लोकाहांन तीयाहांअ पापुज ईत आवताह। 4 काहाका, वासळांअ आने बोकळांअ रोगोतुकींअ, मांहांहांअ पाप माफ नांह वीअ सेकता।
5 तीयाअ लीदे, ख्रीस्तुंह दुन्याम आवता पेअलांअ पोरमेहेर बाहकाल आखलों,
“जोनावोराहांअ भोगाहांअ आने ओरपोणुंहकींअ तुं राजी नांह वेअतो। तीयाअ लीदे, तुंयुं मांन मांहांअ सोरील देदोंह, ईयाअ खातुर का, आंय तोअ मोर्जी पुरी क्युंव।
6 वेदीपेअ आगीम होम केअला भोगुहुं, आने मांहांहांअ पापाहांअ माफीअ खातुर चोळवुअला बीहरा भोगुहुं तुल खुस नांह केअयो।
7 तीयाअ लीदे मांयुं आख्यों,
‘ओ मांअ पोरमेहेर, पोवीतोर लेखाणाहांम मांअ बाबोताम लेख्या पोरमाणे तोअ मोर्जी पुरी केरांअ खातुर आंय तोरतीपेअ आलोह।’” 8 पेअलांअ, ख्रीस्तुंह पोरमेहेर बाहकाल आख्यों, “खोरेखोर जोनावोराहांअ भोगुंहकींअ का, ओरपोणुंहकींअ का, आगीम होम केअला भोगुंहकींअ का, मांहांया सोताअ पापाहांअ माफीअ खातुर चोळवुअला बीहरा भोगुंहकींअ तुं राजी नांह वीयो।” (मोसेअ नीयोमाहांअ पोरमाणेज मांहांहां ए बादा भोग चोळवुअला तेबी, ख्रीस्तुंह एंहकींअ आखलों।) 9 हातींअ तीयांय आख्यों, “ओ मांअ पोरमेहेर, तोअ मोर्जी पुरी केरांअ खातुर आंय तोरतीपेअ आलोह।” एंहकींअ आखीन तो देखावेह का नोवा काराराम ओमोलुम लावांअ खातुर पोरमेहेर जुना काराराम रोद केअहे। 10 ईसु ख्रीस्तुंह तीयाअ सोताअ सोरीलाअ जो भोग बादाहांअ खातुर एकुळ्योज चोळव्यो आने पोरमेहेराअ मोर्जी पुरी केअयी। तीयाकींअ पोरमेहेर आपनेंह पोवीतोर केअहे।
11 येहुदी धोरमाअ दोरेक पुंजारो रोददीह वेदीअ आगलांअ उबी रीईन पुंजा-वीदया केअहे आने पोरमेहेराल खुब वोखत एकुज जातीअ भोग चोळवेह। तीया भोगुंहकींअ ता मांहांहांन पापाहांअ माफी मीलीज नांह सेक्ती। 12 पेन ख्रीस्तुंह मांहांहांअ पापाहांअ माफीअ खातुर एकुज वोखत भोग देदो आने तो भोग कायोमाअ खातुर पुरतो हाय। आने भोग दीईन हातींअ तो होरगाम पोरमेहेराअ हुदी वेल, मोंजे का, खुब मानुवाला जागे बोठोह। 13 आने तेहेअनेअ तो, पोरमेहेर तीयाअ दुसमोनाहांन पुरी रीते हारवे तीयाअ वाट जोवी रीयोह। 14 पोरमेहेरांय जीया मांहांहांन तीयाहांअ पापुंमनेअ चोख्खें केअयेंह, तीयाहांन ख्रीस्तुंह सोताअ एकुज वोखतुर्याअ भोगुकींअ कायोमाअ खातुर खामी वोगुराअ बोंणावी देदेंह।
15 पोवीतोर आत्मा बी खातरी देहे का, ए गोठ हाची हाय। 16 पेअलांअ तो आखेह का, “मालीख आखेह: ‘आवनारा जोमानाम आंय मांअ लोकाहांअरी जो कारार केअहें तो एंहडो हाय: आंय मांअ नीयोम तीयाहांअ मोनाहांम उतावेंह आने ते नीयोम तीयाहांन खेरा मोनाकींअ पालावेंह।’” 17 आने हातींअ तो आखेह का, “आंय तीयाहांअ पाप आने खोटें कामें फाचो कीदीह बी ईत नांय क्युंव।” 18 तांहांअ पोरमेहेरांय पापाहांअ माफी दीईज देदीह ता, तीयाअ खातुर बीहरा केल्ला बी भोगुअ जोरुलुज नांह।
पोरमेहेराअ हाजरीम जाजी!
19 तीयाअ लीदे मेराला पावु-बोंअयुहुं, ईसुअ रोगुतुकींअ आपुंह एकदोम पोवीतोर खोलीम, मोंजे, पोरमेहेराअ हाजरीम हींमोत राखीन जाय सेकतेंह। 20 ख्रीस्तुंह सोताअ मोतुकींअ आपुअ खातुर पोरमेहेराअ हाजरीम जांअ एक नोवो आने हाची जीनगी देनारो मारोग बोंणाव्योह। तीयाकींअ तीयांय, लोकाहांन पोरमेहेराअ हाजरीम जाता ओटकावत्लो तो पोळदो उगाळ्योह।
21 ख्रीस्त आपुअ मोडांम-मोडो पुंजारो हाय। तो पोरमेहेराअ कोअ रुपी मोंडोळाअ लोकाहांपेअ राज केअहे।
22 तीयाअ लीदे, खेरा मोनाकींअ, आने पोरमेहेरापेअ पाको भोरुचो राखीन, आने ख्रीस्तुअ रोगुतुकींअ आपनेंह आत्मीक रीते चोख्खें कीईन, आने चोख्खा पांअयांकींअ सोताअ सोरीलुंहन तुवीन, पोरमेहेराअ हाजरीम जाजी!
23 आपुंह आखतेंह का, आपुअ एक आस्या हाय। ते आस्या आपुंह तीअ राखतें रेजी! काहाका, आपुंह जांअतेंह का, पोरमेहेर जोंबी वोचोन देहे, तों तो कायोम पालनारो हाय। 24 एक-बीहराल केंहकींअ उफ देजी, एक-बीहरापेअ केंहकींअ माया राखजी, आने हारें कामें केंहकींअ केअजी तीयाअ आपुंह वीचार केअजी!
25 आने आरी-आरी, जेंहकींअ ओमुक मांहेंअ भोकती केरांअ मोंडोळाम टोलवायांअ सोळी देतेंह, तेंहकींअ आपुंह तों सोळी नांय देजी। पेन एक-बीहराल उंह चोळवुअजी! आने मालीखाअ फाचो आवांअ दीह पाही आवी रीयोह तों जांयन ता आपुंह एंहकींअ वादारे केअतें रेजी!
26 काहाका, हारी गोठीअ हाचाय जांयन हातींअ बी जो आपुंह जांय जोवीन पाप केअतें रेजी ता, तीया पापाहांअ माफी मीलवांअ खातुर बीहरो एक बी भोग नांह रेतो। 27 उलटों, आपुअ खातुर बीता-बीता पोरमेहेराअ नीयायाअ दीहाअ, आने पोरमेहेराअ वीरुद केअनारा मांहांहांअ नास केअनारी खुब मोडी आगीअ वाट जोवांअ ओतोंअज रेहे। 28 जोंबी येहुदी मांहुंअ मोसेंय देदला नीयोम तोळे आने ओसाम ओसों बेन का तीन साक्सीहींअ देदली साबीतीअ आदारे गुनेगार साबीत वेअ ता, तीया मांहांपेअ जाराक बी दाया राख्या वोगुर तीयाल मोताअ सीक्सा देवाअहे। 29 एंहकींअ वेअ ता, पोरमेहेराअ पोयराल नोफरोत केअनारा, ने नोवा काराराल चालु केअनारा आने तीया मांहांअल पोवीतोर केअनारा ख्रीस्तुअ मोतुल ओलकों गोंअनारा, ने आपुंहपेअ मेरबानी केअनारा पोवीतोर आत्माअ नींदा कोअनारों मांहुंअ, तीयाअ केअता कोतीअ मोडी सीक्सा मीलवांअ लायोक बोंणीअ, तीयाअ तुमां वीचार केरा। 30 काहाका, जीयांय एंहकींअ आख्योंह, “आंय बोदलो वालेंह आने जें तीयाअ लायोक हाय तीयाहांपेअ बोदलो लेंहें,” आने जीयांय एंहकींअ बी आख्योंह, “आंय मालीख मांअ लोकाहांअ नीयाय केअहें।,” तीयाल आपुंह ओअखुअतेंह। 31 खुब ताकोतावाला पोरमेहेराअ आकरी सीक्सा भोगवांअ एकदोम बीख लागे एंहडों हाय।
32 गीया दीहाहांम तुमनेंह जों वेअलों तों तुमां ईत केरा। तीया दीहाहांम, जांहांअ तुमां पेअलांम पेअलेंअ ख्रीस्ती बोंणलें तांहांअ, तुमां खुब दुखें वेठलें तेबी, तुमां ख्रीस्तुल ईमानदार रेहलें। 33 ओमुक वोखत लोकाहीं तुमांअमेर्याअ थोळाकाहीं बीहराहांअ आगलांअ नींदा केअली, आने तीयाहांअरी खोटी रीते वोरतुअत्लें बी। बीहरा सोमोयाम तुमाहांमेनेअ बीहरें एंहडें दुखें वेठनारांअरी तीयाहांअ दुखुंहम राजी-खुसी गोंवांदी बोंणलें। 34 आने जेलाम कोंडाअला ख्रीस्ती लोकाहांपेअ तुमां दाया देखावली, आने तुमांअ बादया माल-मीलकोत्या तुमांअ दुसमानुहुं जोबोर-जोस्ती बुअची लेदल्या तांहांअ तीयाअ खोट तुमां ओहता मुंयें वेठी लेदली। काहाका, तुमनेंह खातरी आथी का, तुमांअ खातुर तीयु माल-मीलकोतींअ केअता वादारे हार्या ने कायोम टीकनार्या वोस्तु होरगाम रीयाह। 35 तीयाअ लीदे, हींमोत मां हारतें! काहाका, तुमां हींमोत राखी रीहा ता, तुमनेंह मोडो बोदलो मीलीअ। 36 धीरोज राखतें रा आने पोरमेहेराअ मोर्जी पुरी केरा! तांहांअ जों दांअ तीयांय तुमनेंह वोचोन देदोंह, तों तुमां मीलवाह। 37 काहाका, पोवीतोर लेखाणाहांम लेख्योंह तेंहकींअ,
“आमी थोळीकुज वाअ हाय, आने जो आवांअ हाय तो आवीअ आने तो वाअ नांय लागवे।
38 हाचें मांहेंअ मांअपेअ वीसवास राखीअ, आने तीया वीसवासुकींअ तें कायोमाअ खातुर जीवीअ। पेन तीयाहांमेर्योंअ केडों बी मांअपेअ वीसवास राखांअ सोळी दीअ ता, तीयापेअ आंय राजी नांय व्युंव।” 39 पेन आपुंह ता वीसवास सोळी दीईन नास वेअजी एंहडा लोक नांह। पेन आपुंह वीसवास राखताह आने तीयाअ पोरीणामे पोरमेहेर आपनेंह आपुअ पापाहांअ सीक्सामेनेअ वाचावेह।