9
तोरतीपेअ आने होरगाम पोरमेहेराअ भोकती
1 तीया पेअलाअ काराराम पोरमेहेराअ भोकती केरांअ खातुर वीदया आथ्या आने तीयाअ खातुर तोरतीपेअ रेनारा मांहांया तीयार केअलो खास जागो बी आथो। 2 एक तोंबु उबो केअलो। तीयाअ आगलाअ भागाम दीवी, टेबोल आने तीयापेअ पुंजारा जे मांडो पोरमेहेराल चोळवुअत्ला ते थोवत्लें। ईया भागाल पोवीतोर खोली आखत्लें। 3 तोंबुअ फाचला भागाल आने आगला भागाल जुदा पाळतो बीहरो पोळदो आथो, आने तीया पोळदाअ फाचलांअ एक खोली आथी। तीयुल एकदोम पोवीतोर खोली आखत्लें। 4 तीयु खोलीम तुणी केरांअ खातुर होनाअ वेदी आथी, आने आखी होनो मोडावली कारारुअ पेटी आथी। तीयु पेटीम मान्ना नांवांअ मांडो पोअली होनाअ बोंरनी आथी आने आरोनुअ डेंगारो बी आथो। तीया डेंगाराअ चोमोत्काराअ रीते डालख्या फुटल्या। आने पोरमेहेराअ दोह नीयोम कोतरुअला आथा ते बेन ढोगळा बी तीयु पेटीम आथा। 5 आने पेटीअ उपराअ भागाम पोरमेहेराअ मोडायाअ नीसाणी तोरीके खेरुबीम नांवांअ फाकळींवाला आकार थोवला आथा। तीयाहांअ फाकळ्या, पोरमेहेर लोकाहांअ पाप माफ केअ तीया जागाअ उपेअ सावाअल्या आथ्या। तीयु बादी वोस्तुंअ बाबोताम वोगोतवार लेखांअ आमी जोरुल नांह।
6 तीयु बादी वोस्ताहांअ गोठवोणी वेअली आथी आने तोंबुअ आगली खोलीम रोददीह पुंजारा सोताअ पुंजाअ काम केरांअ जाहला। 7 पेन बीहरी खोलीम ता एखलो मोडांम-मोडो पुंजारोज जाहलो, आने तो बी वोरसाम एकुज वोखत जाहलो। जाती वोखत तो सोताअरी सोताअ पापाहांअ खातुर आने लोकाहीं ओजाणताम केअला पापाहांअ खातुर जोनावोराहांअ रोगुत लीईन जाहलो। 8 ईयु गोठवोणींहकींअ पोवीतोर आत्मांय चोख्खी रीते जाहेर केअयोंह का, जांव लोगुंअ भोकती केरांअ तोंबुम पेअली खोली आजी हाजोर आथी आने भोग चोळवांअ मोसेंय देदली रीत ओमोलुम आथी, तांव लोगुंअ तोंबुअ माजर्याअ एकदोम पोवीतोर खोलीम, मोंजे का, पोरमेहेराअ हाजरीम जांअ मारोग लोकाहांअ खातुर नांह उगाळ्यो। 9 तोंबुअ आगली खोलीम जों वेअत्लों, तों बादों आमीर्याअ जोमानाअ बाबोताम देखावनारी नीसाणी हाय। ईयाअ ओर्थो ओ हाय का, पोरमेहेराअ भोकती केअनारों मांहुंअ पोरमेहेराल जे ओरपोण आने जोनावोराहांअ भोग चोळवेह, ते तीयाअ मोनुल चोख्खों बोंणावी नांह सेकता। 10 काहाका, ते बादा ता बार्याअ ने देखा-देखीअ नांवांअ पुरत्या आथा। ते मांहांहांअ खांअ-पीयांअ बाबोताम, आने धारमीक रीते चोख्खें वेरांअ खातुर मांहेंअ जे जुदी-जुदी जातीअ वीदया केअत्लें तीयुहुंअ बाबोताम नीयोम आथा। आने मांहांहांअ मोनुअरी तीयु वीदींअ काय बी लागतों-वीअगुअतोंज नांह। आने ते ता, खाली पोरमेहेर नोवा काराराल ओमोलुम लावे तांव लोगुंअज ओमोलुम रीअ। 11 ख्रीस्तुंह जों केअयों तीयाकींअ नोवो कारार ओमोलुम आलो। तो आपुंह जे हारी बाबोतीहींअ ओनुभोव कीअ रीयेंह तीयाअ सोबोंदुम मोडांम-मोडो पुंजारो बोंण्योह। जीया भोकती केरांअ जागे तो आपुअ खातुर सेवा केअहे, तो जागो तोरतीमेर्याअ तीया जुना तोंबुअ केअता वादारे मोडायावालो आने खामी वोगुराअ हाय। ओ ता मांहांय बोंणावलो तोंबु नांह, मोंजे का, पोरमेहेराअ बोंणावली ईयु दुन्याअ भाग नांह। 12 ख्रीस्त होरगामेन्याअ खुब पोवीतोर जागाअ नांवांअ तीयु बीहरी खोलीम गीयो तांहांअ, तो पोरमेहेराल चोळवांअ खातुर सोताअरी बोकळांअ आने वासळांअ रोगुत लीईन नांह गीयो। पेन सोताअज रोगुत लीईन गीयो। आने एंहडों तीयाल एकुज वोखत केरांअ पोळलों आने एंहकींअ कीईन तीयांय आपनेंह आपुअ गुनांहमनेअ कायोमाअ खातुर सोळव्यें। 13 मोसेअ नीयोम तोळला तीयाअ लीदे जें मांहेंअ धारमीक रीते बाटलाय गेहलें, तीयाहांपेअ पुंजारो बोकळांअ आने वासळांअ रोगुत आने भोगु तोरीके आगीम बाली टाकली वासळीअ खाअ साटत्लो। आने तो बादा जुना धारांअ पोरमाणे तीया मांहांहांन तीया नीयोमाहांअ पोरमाणे धारमीक रीते चोख्खें केअत्लो। 14 जो एंहडों वीअ ता वीचारा ता खेरा! ख्रीस्तुअ रोगुत मोत देवावनारा कामुंहमनेअ आपुअ मोनुंहन कोतेंअ वादारे हारकींअ चोख्खें कीअ, ईयाअ खातुर का आपुंह जीवता-जागता पोरमेहेराअ भोकती कीअ सेकजी! काहाका, कायोम रेनारा पोवीतोर आत्माअ मोदोताकींअ ख्रीस्तुंह सोताल आपुअ पापाअ खातुर खामी वोगुराअ भोगु तोरीके पोरमेहेराल ओरपोण केअयो।
15 ईयाज कारोणे, ख्रीस्त नोवा काराराल ओमोलुम लावांअ खातुर पोरमेहेराअ ने लोकाहांअ नीसमें वोचेटयो बोंण्योह। ईयाअ पोरीणामे, पोरमेहेरांय जीयाहांन हादयेंह तें बादें, जे कायोम टीकनारा आसीरवाद दांअ तीयांय तीयाहांन वोचोन देदोंह, ते आसीरवाद मीलवी सेके। ईं बोंणी सेकेह, काहाका, पेअलो कारार ओमोलुम आथो तांहांअज तीया लोकाहीं केअला पापुंहमनेअ तीयाहांन सोळवांअ खातुर ख्रीस्त मोअयो। 16 एंहडी जातीअ कारार केरुलोंअ तों ता वोसीयोत नामो aलेखी दांअ कामुअ होच हाय। वोसीयोत नामो लेखी देनारों मांहुंअ मोय गीयोंह एंहकींअ साबीत वेअ तोज, जीयाल वोस्तु लेखी देदयाह तीयाल ते वोस्तु मीले। 17 मोंजे का, वोसीयोत नामो लेखी देनारों मांहुंअ मोय जाय तांहांअज वोसीयोत नामो ओमोलुम आवेह। तों लेखी देनारों मांहुंअ जीवतोंज वेअ ता, केडों बी तीया वोसीयोत नामाल कामाम नांह लीअ सेकतों। 18 ईया कारोणेज, पेअलोअ कारार बी रोगोतुकींअज, मोंजे का, जोनावोराहांअ भोगुकींअज ओमोलुम आललो। 19 मोसेंय ईसरायेल लोकाहांन नीयोमाहांअ चोपळीमेर्याअ बादा हुकोम वाची देखाव्या। हातींअ तीयांय वासळांअ आने बोकळांअ रोगुत लीईन पांअयांम बेळ्यों। हातींअ तीयांय राता उन ने हीस्सोप नांवांअ हारी गुंदीवाला सोडाअ डालखी तींहमें पीजवीन तों नीयोमाहांअ चोपळीपेअ आने बादा ईसरायेल लोकाहांपेअ साटयों। 20 साटता-साटता तीयांय आख्यों, “तुमां पाला तीयाअ खातुर पोरमेहेरांय जो कारार तुमांअरी केअयोह, तीयाल पाको केअनारों ईंज रोगुत हाय।” 21 एंहकींअज कीईन, मोसेंय तों रोगुत भोकती केरांअ तोंबुपेअ आने सेवा-पुंजाम वापराअनारी बादी वोस्ताहांपेअ बी साटयों। 22 खोरेखोर ता, नीयोमाहांअ चोपळीम लेख्या पोरमाणे रोगुत साटीनुंज पुंजारा लोग-भोग बादी वोस्ताहांन चोख्या केअत्ला। काहाका, रोगुत पाळ्या वोगुर पापाहांअ माफी नांय मीले। 23 तीयाअ लीदे, तोरतीमेर्याअ तोंबुल आने तींहमेंरीअ वोस्ताहांन जोनावोराहांअ रोगोतुकींअ चोख्खें केरांअ पोळलों। काहाका, ते वोस्तु होरगामेरीअ वोस्ताहांअ नोमुना आथा। पेन होरगामेरीअ ओसोल वोस्ताहांन चोख्या केरांअ ता, जोनावोराहांअ रोगुतु केअता वादारे चोळीयाता भोगाहांअ जोरुल पोळेह। 24 तीयाअ लीदे, ख्रीस्त मांहांअ बोंणावला भोकती केरांअ जागे नांह गीयो का जो होरगामेन्याअ भोकती केरांअ जागाअ खाली नोमुनोज आथो। पेन तो ता आपुअ तोरफयोअ पोरमेहेराअ आगलांअ पोरगोट वेरांअ खातुर ओसोल जागेज, मोंजे का, होरगामुज गीयोह। 25मोडांम-मोडो पुंजारो जोनावोरुअ रोगुत चोळवांअ दोर वोरसे एकदोम पोवीतोर खोलीम जाहे तेंहकींअ, ख्रीस्त होरगामेन्याअ एकदोम पोवीतोर खोलीम गीयो, पेन तींहीं तो फाचो-फाचो सोताअ भोग चोळवांअ नांह गीयो। 26 काहाका, जो तीयाअ जोरुल पोळती ता, दुन्या बोंणावी तेहेअनेअ आमी लोगुंअ तीयाल घेळी-घेळी मोरांअ पोळतों। पेन होकीकोत एंहडी हाय: सोताअ जीवुअ भोगुकींअ बादा लोकाहांअ पापाहांअ माफीअ खातुर तो बादा जोमानाअ ओंताअ सोमोये एकुज वोखत पोरगोट वीयोह। 27 पोरमेहेरांय नोक्की केअयोंह का, बादें मांहेंअ एकुज वोखत मोए, आने हातींअ तो तीयाहांअ नीयाय केअ। 28 एंहकींअज कीईन, ख्रीस्तुंह बी खुब लोकाहांअ पाप माथे लांअ खातुर एकुज वोखत सोताअ जीवुअ भोग चोळव्यो। तो फाचो आवीअ। लोकाहांअ पापाहांअ खातुर सोताअ जीव दांअ नांय, पेन तीयाअ आवांअ वाट जोवनारांहन पुरी रीते वाचावांअ खातुर तो फाचो आवीअ।