8
आपुअ मोडांम-मोडो पुंजारो ख्रीस्त
1 मांयुं जों आख्योंह तींहमें मुददाअ गोठ ए हाय: आपनेंह एंहडो मोडांम-मोडो पुंजारो मील्योह का, जो होरगाम पोरमेहेराअ हुदी वेल खुब मानुवाला जागे बोठोह। 2 आने तो होरगाम एकदोम पोवीतोर जागे, मोंजे का, एंहडा भोकती केरांअ हाचा जागे आपुअ मोडांम-मोडा पुंजारा तोरीके सेवा केअहे का, जो मांहांय नांय, पेन मालीखांय सोते बोंणाव्योह।
3 दोरेक मोडांम-मोडो पुंजारो पोरमेहेराल ओरपोण आने जोनावोराहांअ भोग चोळवांअ खातुर नीमाअहे। तीयाअ लीदे, आपुअ मोडांम-मोडा पुंजारापेअ बी पोरमेहेराल चोळवांअ खातुर काय वेरांअ जोजे। 4 आमी गोठ एंहडी हाय का, जो तो तोरतीपेअ वेअतो ता, तो पुंजारो बी नांय वेअतो। काहाका, मोसेअ नीयोमा पोरमाणे पोरमेहेराल ओरपोण चोळवुअनारा पुंजारा ता तोरतीपेअ पेअलांअनेअ हायज। 5 पुंजाराअ तोरीके ते जों काम केअताह तों ता, होरगाम ख्रीस्त जों केअहे तीयाअ खाली नोमुनोज हाय। जांहांअ मोसे भोकती केरांअ तोंबु बोंणावांअ तीयारीम आथो तांहांअ पोरमेहेरांय तीयाल ए चेतवोंणी देदली का, “सीनाय डोगाअपेअ मांयुं तुल जेंहकींअ आखलों तीयाअ पोरमाणे बादों बोंणावांअ तुं कालजी राखजे!” 6 पेन आमी ईसुल मीलीह ते मोडांम-मोडा पुंजाराअ सेवा ता, येहुदी पुंजाराअ सेवा केअता चोळीयाती हाय। तेंहकींअज कीईन, पोरमेहेराअ आने तीयाअ लोकाहांअ नीसमें ख्रीस्तुंह गोठवोणी केअयीह तो नोवो कारार बी, मोसेंय गोठवुअला जुना कारारु केअता चोळीयातो हाय। काहाका, नोवा कारारुअ आदार ता, पोरमेहेरांय आपनेंह वादारे हार्या वोस्तु दांअ वोचोन देदोंह तीया वोचोनुपेअ हाय।
7 जो तीया पेअलाअ काराराम काय खामीज नांय वेअती ता, बीहरा कारारुअ जोरुल नांय पोळती। 8 पेन मांहेंअ तीया पेअलाअ कारारु पोरमाणे चाली नांय सेक्यें तीयाअ लीदे, पोरमेहेरांय तीयाहांअ भुल काडी। पोवीतोर लेखाणाहांम एंहकींअ लेखलों हाय का,
“मालीख आखेह का, ‘उनाअजा!
एंहडो सोमोय आवीअ का जांहांअ आंय ईसरायेल लोकाहांअरी
आने येहुदा लोकाहांअरी नोवो कारार केअहें। 9 बाहको पोयराअ आथ तीईन तीयाल सालामोतीअ जागे दोरी जाहे तेंहकींअ ईयाहांअ आगलाअ डायाहांन मांयुं मीसोर देसामेनेअ बारे काडलें तांहांअ तीयाहांअरी मांयुं जो कारार केअलो, तीयाअ होच ओ नोवो कारार नांय वेअ। ते लोक तीया मांअ कारारु पोरमाणे नांह चाल्या। तीयाअ लीदे, मांयुं तीयाहांन धीक्कार्या।’ एंहकींअ मालीख आखेह का, 10 ‘पेन आमी, पेअलाअ कारारुअ ओंताअ सोमोय हातींअ आंय ईसरायेल लोकाहांअरी जो नोवो कारार केअहें। तो एंहडो हाय:
ते मांअ नीयोमाहांन होमजे एंहडों आंय केअहें; आने खेरा मोनाकींअ तीयाहांन पाले एंहडों बी केअहें; आने आंय तीयाहांअ पोरमेहेर वेअहें, आने ते मांअ लोक वीअ।
11 तीयाहांमेर्याअ केडाअ बी सोताअ देसाअ मांहांअल का तीयाअ जातुलांहन एंहकींअ आखीन हीकवांअ जोरुल नांय पोळे का, मालीखाल ओअखुअजे!
काहाका, हानांअ लोकाहांअहींनेअ मोडा लोकाहांअ लोगुंअ बादाज मांन ओअखुअता वीअ। 12 आंय तीयाहांअ पाप माफ केअहें; आने ते कीदीह बी फाचो ईत नांय क्युंव।’”
13 नोवा कारारुअ बाबोताम एंहकींअ आखीन पोरमेहेरांय पेअला काराराल जुनो बोंणावी देदोह। जेंहकींअ जुनी वेअनारी केल्ली बी वोस्तु माहरीज नास वीअ जाहे, तेंहकींअ तो पेअलो कारार बी माहरीज नास वीअ जाय।