7
मेलखीसेदेक आबराहामाअ केअता मोडो हाय
1 ओ मेलखीसेदेक, सालेम सेहेराअ राजा आथो आने बादापेअ ओमोल चालवुअनारा पोरमेहेराअ पुंजारो बी आथो। आबराहाम मोडी लोळायुम चार राजाहांन माय टाकीन हातींअ कोअ आवत्लो तांहांअ मेलखीसेदेकुंह तीयाल मीलीन तीयाल आसीरवाद देदो। 2 तांहांअ आबराहामुंह लोळायुम तीयाल मीलल्या बादी वोस्तुंहमनेअ मेलखीसेदेकुल दोस्मो भाग देदो। “मेलखीसेदेक” नांवांअ पेअलो ओर्थो ओ हाय का “नीयायी रीते राज केअनारो राजा”। आने तो सालेम सेहेराअ राजा आथो तीयाअ लीदे, तीयाअ नांवांअ ओर्थो ओ बी हाय का, “सांतीअ रीते राज केअनारो राजा।” 3 तीयाअ बाहको केडो आथो, तीयाअ याहकी केडी आथी, तीयाअ आगलेंअ डायें केडें-केडें आथें, तो केंहडीवेल जोनम्यो, केंहडीवेल मोअयो, ईयु बाबोताम पोवीतोर लेखाणाहांम काय बी नांह नोंदाअयों। तीयाअ लीदे एंहकींअ आखी सेकाय का, तो कायोमाअ खातुर पोरमेहेराअ पुंजारो रेहे आने एंहकींअ तो पोरमेहेराअ पोयराअ होच हाय।
4 आपुअ आगलोअ डायो आबराहाम खुब मोडो आथो तेबी, लोळायुम तीयाल मीलल्या वोस्तुंहमनेअ तीयांय मेलखीसेदेकुल दोस्मो भाग देदो। ईयापनेअ तुमां वीचार केरा, मेलखीसेदेक कोतोअ मोडो वीअ। 5 आबराहामाअ वोसुलामेर्योअ लेवीअ* वोसुलामेर्याअ आदमीहींन, जे ईसरायेल लोकाहांअ पुंजारा आथा तीयाहांन, पोरमेहेरांय मोसेल देदला नीयोमुंहम हुकोम केअयोह का, ते तीयाहांअ सोताअज जातुलांहपनेअ आवोकुअ दोस्मो भाग ले। ते लोक बी आबराहामाअ वोसुलामेर्याअज आथा तेबी, तीया पुंजाराहांन पोरमेहेरांय एंहकींअ हुकोम केअयो। 6 पेन ओ मेलखीसेदेक लेवीअ वोसुलामेर्योअ नांय आथो तेबी, तीयांय आबराहामुपनेअ दोस्मो भाग लेदो आने तीयाल आसीरवाद देदो।तीयाल आसीरवाद दांअ पोरमेहेरांय वोचोनें देदलें। 7 बादें जांअतेंह का, मोडों मांहुंअज हान्ना मांहांअल आसीरवाद देहे। 8 दोस्मो भाग लेनारा येहुदी पुंजारा मोय जानारा हाय। पेन मेलखीसेदेक ता जीवतो रेहे एंहकींअ पोवीतोर लेखाणाहांम साक्सी देदली हाय। 9 आने आंय एंहकींअ बी आखुंह, आबराहामुंह मेलखीसेदेकुल दोस्मो भाग देदो तांहांअ तीयाअ मारफोते लेवींह बी, जो लोकाहांपेनेअ दोस्मो भाग लेनारो हाय तीयांय बी, तीयाल दोस्मो भाग देदो। 10 काहाका, लेवी आजी जोनम्योज नांह तेबी, आबराहामुपनेअ मेलखीसेदेकुंह दोस्मो भाग लेदो तांहांअ लेवीअ मुल तीयाअ आगलाअ डाया आबराहामुम आथोंज।
11 लेवीअ वोसुलामेर्याहांन देदला पुंजाराअ कामुअ आदारेज, पोरमेहेरांय ईसरायेल लोकाहांन नीयोम देदा। पेन तीया पुंजाराअ कामुकींअ मांहेंअ खामी वोगुराअ नांय बोंणी सेक्यें। तीयाअ लीदे, लेवीअ वोसुलामेर्याअ आरोनुअ पुंजाराअ धाराअ बोदले, पोरमेहेराल मेलखीसेदेकुअ पुंजाराअ धारा पोरमाणे बीहरी जातीअ पुंजाराल मोकलांअ जोरुल पोळी। 12 जांहांअ पुंजाराअ होददाअ धारो बोदलाअहे, तांहांअ तीया धाराअरी लागतो-वीअगुअतो नीयोम बी बोदलांअ जोजे। 13 ए बादया गोठ्या आपुंह ख्रीस्ताअ बाबोतामुज आखतेंह। तो लेवीअ वोसुलामेर्योअ नांय आथो, पेन तो बीहराअ वोसुलामेर्योअ आथो। तीया वोसुलामेर्याअ एगांह बी वेदीअहीं पुंजारा तोरीके सेवा नांह देदी। 14 आपुंह हारकींअ जांअतेंह का, आपुअ मालीख येहुदाअ वोसुलाम जोनम्यो। आने येहुदाअ वोसुलामेर्याअ आदमी पुंजारा बोंणीअ एंहकींअ मोसेंय कीदीह बी नांह आख्यों।
मेलखीसेदेकुअ होच बीहरो पुंजारो
15 पुंजाराअ धाराअरी लागतो-वीअगुअतो नीयोम बोदलाअहे ए गोठ ईंहमें आजी वादारे चोख्खी वेअहे का, बीहरी जातीअ पुंजारो आमी पोरगोट वीयोह, जो मेलखीसेदेकुअ होच हाय। 16 पुंजारो लेवीअ कुळामेर्योअ जोजे एंहडो जुनो नीयोम पुरो कीईन नांय, पेन नास नांय केराय एंहडा जीवोनाअ ताकोताकींअ तो पुंजारो बोंण्यो। 17 पोवीतोर लेखाणाहांम ख्रीस्तुअ बाबोताम एंहकींअ लेखलों हाय का, “पोरमेहेर आखेह का, ‘मेलखीसेदेकुअ पुंजाराअ धारा पोरमाणे तुं कायोमाअ खातुर पुंजारो हाय।’” 18 जीया जुना नीयोमाहांअ पोरमाणे लेवीअ वोसुलामेर्याअ पुंजाराहांन धारमीक काम केरांअ पोळत्लों, तीया बादा नीयोमाहांन पोरमेहेरांय रोद केअया। काहाका, ते नीयोम नोबला आने नोककामा आथा।
19 तीया नीयोमुंहकींअ केडों बी खामी वोगुराअ नांय बोंणी सेक्यों। आने आमी तीयाअ बोदले आपनेंह वादारे हारी आस्या मीलीह, आने तीयाअ मारफोते आपुंह पोरमेहेराअ पाही जाय सेकतेंह।
20 पोरमेहेरांय होम खादो का, ख्रीस्त कायोमाअ खातुर पुंजारो रीअ। पेन तीयांय बीहरा केल्ला बी पुंजाराअ बाबोताम एंहडो होम नांह खादो। 21 ख्रीस्तुल ता तीयांय होम खायन नीम्यो। ईयु बाबोताम पोवीतोर लेखाणाहांम एंहकींअ नोंदलों हाय का,
“मालीखांय होम खादोह आने तो सोताअ आखल्यामनेअ फीरी नांय जाय:
‘तुं कायोमाअ खातुर पुंजारो रीहो।’” 22 एंहकींअ कीईन ईसु वादारे हारा कारारुअ जामीन बोंण्योह। 23 पुंजाराअ जुना धारा पोरमाणे पुंजारा खुब आथा। एक पुंजारो मोय जाय तांहांअ तीयाअ जागे बीहरो जांअ पुंजारो बोंणत्लो। 24 ख्रीस्त कायोमाअ खातुर पुंजारो रेहे। काहाका, तो कायोम जीवतो हाय। 25 तीयाअ लीदे तो तीयाअ मारफोते पोरमेहेराअहीं जानारांहन पुरी रीते वाचावी सेकेह। काहाका, तो पोरमेहेराअ आगलांअ तीयाहांअ वेले तांणांअ खातुर कायोम जीवेह।
26 आपनेंह ईसुअ जेंहडा मोडांम-मोडा पुंजाराअज जोरुल हाय। काहाका, तो पोवीतोर आने गुना वोगुराअ आने डागु वोगुराअ हाय। आने तो पापी लोकाहांअ केअता एकदोम जुदो हाय आने पोरमेहेरांय तीयाल होरगाम खुब मानुवालो जागो देदोह। 27 बीहरा मोडांम-मोडा पुंजाराअ होच तीयाल रोददीह पेअलांअ सोताअ पापाहांअ लीदे आने हातींअ बीहरा लोकाहीं अ पापाहांअ लीदे भोग चोळवांअ जोरुल नांह रेती। काहाका, तीयाल लोकाहांअ पापाहांअ लीदे एकुज वोखत सोताअ जीवुअ भोग चोळवांअज जोरुल आथी। 28 मोसेअ नीयोमा पोरमाणे जे मोडांम-मोडा पुंजारा तोरीके नीमाअया, ते ता पापाम पोळी जाय एंहडा नोबला आथा। पेन तो नीयोम दीईन हातींअ, पोरमेहेरांय होम खायन तीयाअ पोयराल मोडांम-मोडा पुंजारा तोरीके नीम्यो, आने तीया पोयराल तीयांय कायोमाअ खातुर खामी वोगुराअ बोंणाव्योह।