6
1 तीयाअ लीदे आपुंह फाचे-फाचे ख्रीस्ती जीवोनाअ सोरुवाताअ बोदाहांअज वीचार नांय केअया केअजी! पेन आपुंह सोताअ आत्मीक जीवोनाम वादजी आने आपुअ होमजुणुम पाकें बोंणजी! खोटें कामें सोळीन पोरमेहेरापेअ वीसवास राखांअ एंहडा ख्रीस्ती जीवोनाअ पायाअ बोद फाचो-फाचो लांअ आपुअ जोरुल नांह। 2 आने बापतीस्मांअ बाबोताम, आने आत्मीक वोरदानें मीलवांअ मोदोत केरांअ खातुर मोंडोळाअ वोळील वीसवास्यांहपेअ आथ थोवे तीया बाबोताम, आने मोअला मांहांहांन पोरमेहेर जीवतें उठवीअ तीया बाबोताम, आने पोरमेहेर लोकाहांअ नीयाय कीईन तीयाहांन कायोमाअ जीन्गी का कायोमाअ सीक्सा दीअ, तीया बाबोताम बी आजी वादारे हीकामोणुअ आपनेंह जोरुल नांह। 3 तीयाअ लीदे, खोरेखोर जो पोरमेहेराअ मोर्जी वेअ ता, आपुंह आपनेंह आत्मीक जीवोनाम वादावे एंहडा बोद लीहुं। 4-6 काहाका, जीया लोकाहीं एक वोखत आत्मीक गीयान मीलव्योंह, आने होरगाअ हारी-हारी बाबोतीहींअ ओनुभोव केअयोह, आने बीहरा वीसवास्यांरी मीलीन पोवीतोर आत्मा मीलव्योह, आने जीयाहां पोरमेहेराअ खुब हारा वोचोनाहांअ आने तीयाअ ताकोतुअ कामें का जें आवनारा जोमानाम पुरी रीते जाहेर वेअनारें हाय तीयाहांअ ओनुभोव केअयोह, आने हातींअ ख्रीस्तुपेअ वीसवास केरांअ सोळी देदोंह, तीया लोकाहांन फाचा पापाअ वाटेनेअ वालीन तीयापेअ वीसवास केरावांअ बोंणीज नांह सेकतों। काहाका, तेंहकींअ कीईन ते सोताअ पापाअ लीदे पोरमेहेराअ पोयराल फाचो कुरुसापेअ जोळीन जाहेराम तीयाअ नींदा केअता वीअ एंहडों हाय।
7 जों खेत तीयापेअ घेळी-घेळी पोळनारा वोहरातुअ पांअयुल चुही लेहे ने खेळुतुल लाब वेअ एंहडो पाक पेदा केअहे, तेंहडों खेत पोरमेहेरापेनेअ आसीरवाद मीलवीअ। 8 पेन जो तों खेत एखलें काटें-चेखरेंज पेदा केअ ता, तों नोककामो हाय। आखरीप, खेळुत तीया खेतुल सीलगावी दीअ। तेंहकींअज कीईन, जें ख्रीस्ती मांहेंअ पोरमेहेरापेनेअ आसीरवाद मीलवीन तीयाल पोसोंद पोळे एंहडों जीवोन जीवतेंह, तीयाहांपेअ तो खुब राजी वीअ। पेन जें ख्रीस्ती मांहेंअ तीयापेनेअ आसीरवाद मीलवीन बी तीयाल पोसोंद पोळे एंहडों जीवोन नांह जीवतें, तीयाहांन तो सीक्सा कीअ। 9 मेराला दोस्दारुहुं, आंय तुमनेंह एंहकींअ चेतवोंणी दीहुं तेबी तुमांअ बाबोताम मांन खातरी हाय का, तुमांअ आत्मीक हालोत एंहडी नांह, पेन ते हारी हाय, आने तुमां जीयाहांन पोरमेहेरांय तीयाहांअ पापाहांअ सीक्सामेनेअ वाचाव्याह, तेंहडा लोकाहांन सोबे तेंहडें कामें केअतेंह। 10 तुमां पोरमेहेराअ लोकाहांन, मोंजे का, बीहरा ख्रीस्तींहन मोदोत केअयीह; आने आजी बी तुमां तीयाहांन मोदोत केअतेंह। एंहकींअ कीईन तुमां देखाव्योंह का, तुमां पोरमेहेरापेअ माया राखतेंह। पोरमेहेराअ खातुर तुमां जों काम केअयोंह, तों पोरमेहेर वीहराय नांय जाय, पेन तीयाअ तो तुमनेंह बोदलो दीअ। काहाका, तो कायोम नीयायी हाय। 11 आंय खुब मोर्जी राखुंह का, तुमां जीवा तांव लोगुंअ बीहरा ख्रीस्तींहन मोदोत केअतें रा, ईयाअ खातुर का, पोरमेहेरापेनेअ जे आसीरवाद मीलवांअ तुमां आस्या राखतेंह, ते आसीरवाद तुमनेंह नोक्कीज मीले। 12 तांहांअ, तुमां आत्मीक जीवोनाम आल्येंह नांय बोंणा! पेन उलटों, एंहडा लोकाहांअ होच बोंणाह का जे सोताअ वीसवास आने धीरोजुअ लीदे जे आसीरवाद दांअ पोरमेहेरांय तीयाहांन वोचोन देदोंह ते मीलवुअनारा हाय।
पोरमेहेराअ वोचोनु पोरमाणे नोक्कीज वीअ
13 पोरमेहेरांय जांहांअ आबराहामाल वोचोन देदलों, तांहांअ तीयांय होम खादो का, तो तीया वोचोनु पोरमाणे कीईअज। तो होम खांअ खातुर पोरमेहेराअ केअता केडों बी मोडो नांह तीयाअ लीदे, तीयांय तांहांअ सोताअज नांवें होम खादो। 14 होम खायन तीयांय आख्यों, “आंय तुल नोक्कीज आसीरवाद देहें आने तोअ वोसुलो नोक्कीज वादावेंह।” 15 ईयाअ पोरीणामे, पोरमेहेरांय आबराहामाल जो आसीरवाद दांअ वोचोन देदलों, तो तीयाल मील्यो; काहाका, पोरमेहेर सोताअ वोचोन पुरों केअ तीयाअ आबराहामुंह धीरोज राखीन वाट जोवी।
16 जांहांअ एक मांहुंअ होम खाहे, तांहांअ तो तीयाअ केअता मोडा मांहांअ नांवांअ होम खाहे। आने तीयाकींअ तीया मांहांअ बीहरा मांहांअ आर्याअ बाथ-भानगुळीअ नीकाल वीअ जाहे। 17 पोरमेहेरांय जे आसीरवाद दांअ वोचोन देदलों ते जे लोक मीलवीअ, तीयाहांन तो चोख्खी रीते देखावांअ मागत्लो का, तो सोताअ ईरादो कीदीह बी नांय बोदले। तीयाअ लीदे, तीयांय होम खायन आख्यों, तो तीया आबराहामाल देदला वोचोनु पोरमाणे नोक्कीज कीअ। 18 पोरमेहेरांय वोचोन बी देदोंह आने तों वोचोन पुरों केरांअ होम बी खादोह। पोरमेहेर झुटों गोगीज नांह सेकतो। तीयाअ लीदे, ईयु बेनुं गोठीहींकींअ , मोंजे का, वोचोन आने होमुकींअ तीयांय देखाव्योंह का, तीयांय जों आख्योंह तों कीदीह बी नांय बोदलाय। तीयाअ लीदे, मोदोत मीलवांअ तीयाहांअहीं दोवळी जानारें आपुंह आस्या राखतेंह का, पोरमेहेरांय जे आसीरवाद दांअ वोचोन देदोंह, ते आपुंह नोक्कीज मीलवुंह। 19 आपुअ ए आस्या, जाहाजुल मोजबुत रीते तीअ राखनारा लोंगोरुअ होच मोजबुत हाय। आने आपनेंह मोदोत केअ एंहकींअ जीयाअ आपुंह आस्या राखीन वाट जोवतेंह, तो ता ईसु हाय का जो पोरमेहेराअ हाजरीम जाहे। जेंहकींअ मोडांम-मोडो पुंजारो पोरमेहेराअ हाजरी आथी तींहीं मोंजे तोंबुम एकदोम माजर्याअ भागाम पोळदाअ फाचलांअ जाहलो तेंहकींअ। 20 ईयाज पोरमेहेराअ हाजरीम आपुअ खातुर आपुअ आगलांअ ईसु गीयोह आने मेलखीसेदेकुअ पुंजाराअ धाराअ पोरमाणे तो कायोमाअ खातुर मोडांम-मोडो पुंजारो बोंण्योंह।