5
1 येहुदीहींअ दोरेक मोडांम-मोडा पुंजाराल येहुदी लोकाहांमेनेअ ज पोसोंद केअतेंह आने तीयाल पोरमेहेराअ आर्याअ सोबोंदुअ बाबोतुंहम तीया मांहांहांअ तोरफयोअ नीमतेंह। तो, बीहरें मांहेंअ पोरमेहेराअ आभार मानांअ खातुर जों काय ओरपोण लावे तों, आने सोताअ पापाहांअ माफी मीलवांअ खातुर जों काय भोग लावे तों, पोरमेहेराल चोळवेह। 2 मोडांम-मोडो पुंजारो सोते बी मांहुंअ हाय तीयाअ लीदे, तो सोते पापाम पोळी जाय एंहडो नोबलो हाय। तीयाअ लीदे, जांअया वोगुर पापाम पोळी जानारा बीहरा मांहांहांअरी तो मायालु रीते वेहवार राखी सेकेह। 3 तो सोते बी पापाम पोळी जाय एंहडो नोबलो हाय तीयाअ लीदे, जेंहकींअ बीहरा लोकाहीं अ पापाहांअ माफीअ खातुर पोरमेहेराल भोग चोळवांअ तो बांदाअलो हाय, तेंहकींअज सोताअ पापाहांअ माफीअ खातुर बी भोग चोळवांअ तो बांदाअलो हाय। 4 केल्लों बी मांहुंअ मोडांम-मोडो पुंजारो बोंणांअ जेंहडो मोडा मानुवालो होददो सोताअ मेते मीलवी नांह सेकतों। पेन जेंहकींअ आरोनुल पोरमेहेरांय हादलो ने तीयाकींअ तीयाल ओ होददो मीललो, तेंहकींअ पोरमेहेर हादेह तोताअमुज तो होददो केडाल बी मीलेह। 5 एंहकींअज कीईन, ख्रीस्तुंह बी मोडांम-मोडा पुंजाराअ मोडो मानुवालो होददो सोताअ मेते नांह लेदो। पेन पोरमेहेरांयज तीयाल तो देदलो। तीयु वोखत तीयांय ख्रीस्ताल जों आखलों, तों तीयांय केल्ला बी मोडा पुंजाराल नांह आख्यों। पोरमेहेरांय जों आख्यों तों पोवीतोर लेखाणाहांम एंहकींअ नोंदलों हाय का,
“तुं मांअ पोयरो हाय। आज मांयुं बादाहांअ आगलांअ जाहेर केअयोंह का, ‘आंय तोअ बाहको बोंण्योह।’”
6 आने पोवीतोर लेखाणाहांम बीहरी जागे बी एंहकींअ नोंदलों हाय का,
“मेलखीसेदेकुअ पुंजाराअ धारा पोरमाणे तुं कायोमाअ खातुर पुंजारो रीहो।”
7 ईसु ईयु दुन्याम आथो तांहांअ, तीयांय तीयाल मोतुमनेअ वाचावी सेकनारा पोरमेहेराल मोडा आवाजे रोळता ने रोजयें पाळता ओरुज केअयी ने कालावाला केअया। आने गोंवें तीयु हालोताम पोरमेहेराअ मोर्जी पुरी केरांअ तो तीयार आथो तीयाअ लीदे, पोरमेहेर तीयाअ ओरुज ने कालावाला उनाअयो। 8 तो पोरमेहेराअ पोयरो आथो तेबी, सोते वेठला दुखुंहकींअ तीयांय तांहांअ पोरमेहेराअ आखलों मानांअ हीकयों। 9 एंहकींअ कीईन, पोरमेहेरांय तीयाल डागु वोगुराअ मोडांम-मोडो पुंजारो रांअ लायोक बोंणाव्यो। आने तो, तीयाअ आखलों माननारें बादें सोताअ पापाहांअ सीक्सामेनेअ कायोमाअ खातुर वाचाय तीयाअ खातुर मोदोत केअनारो बोंण्यो। 10 आने पोरमेहेरांय तीयाल मेलखीसेदेकुअ पुंजाराअ धारा पोरमाणे मोडांम-मोडा पुंजाराअ होददो देदो।
ख्रीस्ती वीसवास सोळीन जांअ बाबोताम चेतवोंणी
11 ख्रीस्त केंहकींअ मेलखीसेदेकुअ होच हाय तीया बाबोताम तुमनेंह आखांअ जेंहडों मांअपेअ खुब हाय। पेन तों तुमनेंह होमजावुलोंअ मांन ओगरों हाय। काहाका, तुमांअ आत्मीक होमुज ओसी हाय। 12 ओताअ वोखताम ता, तुमांअ बीहराहांन आत्मीक बाबोत्या होमजावांअ लायोक बोंणी जांअ जोजत्लों। पेन तीयाअ बोदले, तुमनेंह पोरमेहेराअ गोठीअ पेअलोअ एकळो बी बीहराअ फाचो हीकवांअ पोळे एंहडों हाय। मांडो नांय पेन दुद ओतोंअज जीरवी सेकनारा हानांअ पोयराहांअ होच तुमां आत्मीक जीवोनाअ ओगर्या बाबोत्या नांय पेन हेलल्या बाबोत्याज होमजी सेकतेंह। 13 जोंबी केडों दुदुपेअज जीवेह, तीयाल खेरों-खोटों पारखुअता नांह आवळुअतों। काहाका, तों आजी हानोंअ पोयरोंज हाय। 14 जेंहकींअ मोडें मांहेंअज मांडो जीरवी सेकतेंह, तेंहकींअ जें ओनुभोवी हाय तेंज आत्मीक जीवोनाअ ओगर्या बाबोत्या होमजी सेकतेंह। ओनुभोवुअ कारोणे, तें a खेरों-खोटों पारखी सेकतेंह।