4
पोरमेहेराअ लोकाहांअ खातुर आत्मीक आराम
1 पेन, पोरमेहेरांय आपनेंह वोचोन देदोंह का, आपुंह होरगाम कायोमाअ खातुर आराम कीअ सेकतेंह। तीयाअ लीदे, आपुंह खुब कालजी राखजी का, आपुंहमेर्योंअ केडों बी तींहीं जांअ रीअ नांय जाय!
2 ईसरायेल लोक पोरमेहेरांय तीयाहांन देदलों तों वोचोन उनाअला, पेन तीयाहांमेनेअ खुब लोकाहीं तीयापेअ वीसवास नांय केअयो। तीयाअ लीदे, तीयाहांमेर्याअ आरदांहन तीया वोचोनुकींअ फायदो नांय वीयो। तेंहकींअज कीईन आपुंह बी हारी गोठ उनाअयाह, आने आपुंह बी तीयु गोठीपेअ वीसवास नांय राखजी ता, आपनेंह बी तीयुकींअ काय फायदो नांहज वेअनारो। 3 आपुंह जांअतेंह का, ख्रीस्तुपेअ वीसवास केअनारें आपुंह होरगाम तीया आरामाअ जागे जाय सेकतेंह। पेन जें वीसवास नांह केअतें, तें तीयु जागे पोची नांय सेके। काहाका, पोवीतोर लेखाणाहांम पोरमेहेराल एंहकींअ आखता नोंदलों हाय:
“मांन तीयाहांपेअ रोग चोळी, आने मांयुं एंहडो होम खादो: ‘जीया कानान देसाम आंय तीयाहांन आराम केरांअ देनारो आथो, तीया देसाम तें कीदीह बी नांय वीहे।’” पोरमेहेरांय जुग-तोरती आने बीहरों बादों बोंणाव्यों तांहांअ तीयाअ काम पुरों वेअलों तेबी तीयांय एंहकींअ आख्यों। 4 काहाका, आरामाअ दीहाअ बाबोताम पोवीतोर लेखाणाहांम एंहकींअ लेखलों हाय: “बादों बोंणावांअ काम पुरों कीईन हातींअ सातमे दीह पोरमेहेरांय आराम केअयो।” 5 पेन पोवीतोर लेखाणाअ जो भाग मांयुं आख्योह तीयापेअ धीयान दा! तींहमें ईसरायेल लोकाहांअ बाबोताम एंहकींअ आख्योंह, “जीया कानान देसाम आंय तीयाहांन आराम केरांअ देनारो आथो, तीया देसाम ते कीदीह बी नांय वीहे।” 6 पोरमेहेरांय देदला वोचोनाअ ते हारी गोठ पेअलांअ जे ईसरायेल लोक उनाअला, तीयाहां पोरमेहेराअ आखलों नांय मान्यों। तीयाअ लीदे, ते तीया आरामाअ जागे जाय नांय सेक्या। पेन बीहरें मांहेंअ ता तीयु जागे जाय ते होकीकोतुज हाय। 7 आपनेंह तीयाअ खोबुर हाय। काहाका, आपुंह तीयु जागे जाय सेकजी एंहडो तीयांय बीहरो एक सोमोय नोक्की केअयोह। आने तो सोमोय आमीज हाय। ईसरायेल लोकाहीं पोरमेहेराअ वीरुद बोळवो केअलो तीयाअ खुब वोरसांअ फाचलांअ दावीदाअ मारफोते तीयांय जों लेखाव्योंह, तों मांयुं पेअलांअ नोंदयोंह:
“पोरमेहेर आमी तुमनेंह जों आखेह तों तुमां उनायन मानजा! आने तुमांअ आगलाअ डायाहां तीयाअ वीरुद बोळवो केअलो तांहांअ जेंहकींअ तीयाहां केअलों, तेंहकींअ तुमां तीयाअ गोठ नांय मानांअ टीणी तीअ मां राखतें!”
8 जो योसुवा ईसरायेल लोकाहांन आरामाअ जागे खोरेखोर लीअ गीयो वीअ ता पोरमेहेर बीहरा एक आरामाअ दीहाअ बाबोताम फाचलांअ नेअ नांयज आखतो। 9 तीयाअ लीदे, आपुंह एंहकींअ आखी सेकजी का, पोरमेहेराअ लोकाहांन आराम दांअ तोक आजी हाय। 10 पोरमेहेरांय जीया आरामाअ वोचोन देदलों तीया आरामाअ जोंबी ओनुभोव केअहे, तों जेंहकींअ पोरमेहेरांय सोताअ बादा कामुंहमनेअ आराम लेदलो, तेंहकींअ सोताअ बादा कामुंहमनेअ आराम लीअ।
11 तीयाअ लीदे, तो आराम मीलवांअ आपुंह खुब कोसीस केअजी, ईयाअ खातुर का, पोरमेहेराअ गोठीपेअ वीसवास नांय केरांअ कारोणे तीया ईसरायेल लोकाहांअ जेंहकींअ नास वेअलो, तेंहकींअ आपुंहमेर्याअ केडाअ बी नास नांय वेअ। 12 काहाका, पोरमेहेराअ गोठ ता जीवती-जागती हाय, आने बेनुं वेल धारवाली तारवायुअ केअता बी वादारे चींदली हाय। ते जीव ने आत्माल, आने हांदांहन आने नोसींहन वाडीन सीरकी नींगे एंहडी हाय। आने ते मोनुअ वीचारुंहन ने मोर्जींहन बी पारखी काडनारी हाय। 13 पोरमेहेराअ आगलांअ केल्ली बी वोस्तु दोबली नांह। तीयाअ आगलांअ बादया वोस्तु एकदोम उगाळ्याज हाय। एंहडों बादोंज जांअनारा पोरमेहेराअ आगलांअ आपुअ हीसाब दांअ हाय। 14 तांहांअ ईसुपेअ आपुअ वीसवास आपुंह जालवी राखजी! काहाका, पोरमेहेराअ पोयरो ईसु, जो जुगुंहम रीईन ठेठ होरगाम गीयोह तो, पोरमेहेराअ हाजरीम आपुअ मोडांम-मोडा पुंजारा तोरीके सेवा केअहे। 15 आपुअ मोडांम-मोडो पुंजारो एंहडो हाय का, जो पाप केरांअ लालचाय जाय एंहडा आपुअ जेंहडा मांहांहांअरी मायालु रीते वोरती सेकेह। काहाका, सेतानांय तीयाल बी पाप केरावांअ बादी रीते लालचावी हेअलो, पेन तीयांय पाप नांह केअयो। 16 तीयाअ लीदे, चाला आपुंह हींमोतुवालें बोंणीन पोरमेहेराअहीं जाजी! तो मेरबानीवालो राजा हाय। तींहीं, जांहांअ बी आपनेंह तीयाअ दायाअ जोरुल वेअ, तांहांअ आपनेंह तीयाअ दाया मीलीअ आने तो आपुंहपेअ मेरबानी राखीन आपनेंह मोदोत केअहे, तीयाअ आपुंह ओनुभोव बी कीअहुं।