3
मोसेअ केअता ईसु वादारे चोळीयातो हाय
1 तीयाअ लीदे, पोरमेहेराअ पोवीतोर लोक वेरांअ तीयांय नोतरुअला मांअ ख्रीस्ती पावु-बोंअयुहुं, ईसुअ वीचार केरा! ईया ईसुल आपुंह एंहकींअ मानतेंह का, तो पोरमेहेरांय आपुअ खातुर मोकलुअलों खास मांहुंअ आने तीयांय आपुअ खातुर नीमलो मोडांम-मोडो पुंजारो हाय।
2 जेंहकींअ मोसेंय पोरमेहेराअ कोअ रुपी मोंडोळाअ लोकाहांअ सेवा ईमानदारीकींअ केअयी, तेंहकींअ ईसुंय बी तीयाल नीमनारा पोरमेहेराअ सेवा ईमानदारीकींअ केअयी। 3 जेंहकींअ कोअ केअता कोअ बांदनाराल मांहेंअ वादारे मान देतेंह, तेंहकींअ पोरमेहेरांय मोसेअ केअता ईसुल वादारे मानुअ लायोक गोंअयोह। 4 काहाका, जेंहकींअ गोंवें तों कोअ वीअ तीयाल बांदनारों केल्लों बी मांहुंअ वीअ, तेंहकींअज बादाल बोंणावनारो एक हाय आने तो पोरमेहेरुज हाय। 5 मोसे पोरमेहेराअ कोअ रुपी मोंडोळाम सेवोकु तोरीके ईमानदार आथो। आने जीयु बाबोतीहींअ ओर्थो पोरमेहेर भोवीस्यांम जाहेर केअनारो आथो, ते बाबोत्या लोकाहांन आखांअ तीयाअ काम आथों।
6 पेन ख्रीस्त ता, पोरमेहेराअ मोंडोळाअ कारभार चालवुअनारा पोयरा तोरीके ईमानदार हाय। जो आपुंह हींमोत राखीन ख्रीस्तुपेअ वीसवास केअतें रेजी आने पोरमेहेर आपुअ खातुर केरांअ हाय तीयापेअ आस्या राखतें रेजी ता, आपुंह पोरमेहेराअ कोअ रुपी मोंडोळ हाय।
7 तीयाअ लीदे, पोवीतोर लेखाणाहांम पोवीतोर आत्मांय जेंहकींअ आख्योंह तेंहकींअ,
“पोरमेहेर आमी तुमनेंह जों आखेह तों तुमां उनायन तों मानजा! 8 उजाळाम जेंहकींअ तुमांअ आगलाअ डायाहां पोरमेहेराअ वीरुद बोळवो केअलो आने तीयाअ धीरोजुअ पारखों केअलों, तेंहकींअ तुमां पोरमेहेराअ गोठीपेअ वीसवास नांय राखांअ टीणी मां तेअतें!”
9 पोरमेहेर आखेह का, “चालीस वोरसें लोगुंअ, मांयुं केअलें कामें तुमांअ आगलाअ डायाहां देख्यें। तेबी तीयाहां मांअ ताकोतुपेअ वेम राखीन तीया उजाळाम तीयाहां मांअ पारखों केअयों।
10 तीयाअ लीदे, तीया लोकाहांपेअ मांन रोग चोळी, आने मांयुं आख्यों, ‘ते लोक मांन कीदीह बी ईमानदार नांह रेता, आने मांअ नीयोम पालांअ ना पाळताह।’
11 तीयाअ पोरीणामे, मांन तीयाहांपेअ रोग चोळी, आने मांयुं एंहडो होम खादो: ‘जीया कानान देसाम आंय तीयाहांन आराम केरांअ देनारो आथो, तीया देसाम ते कीदीह बी नांय वीहे।’”
12 मांअ ख्रीस्ती पावु-बोंअयुहुं, हेअजा का, तुमाहांमेनेअ केडाअ बी मोन एंहडों खाराब आने वीसवास नांय केअनारों नांय वेअ का, तों जीवता-जागता पोरमेहेराल नोफरोत केअ। 13 उलटों, तुमांअमेर्याअ केडाल बी तीयाअ सोताअ पापी सोबाव नांय ठोगे आने तो टीणीवालो नांय बोंणे तीयाअ खातुर, पोरमेहेराअ गोठीपेअ वीसवास केरांअ आजी तोक हाय तांव, तुमां रोददीह एक-बीहराल होमजावतें रेजा! 14 काहाका, जो आपुंह पेअलांअ ख्रीस्तुपेअ राखलो वीसवास आपुअ जीनगीअ सेवोट लोगुंअ राखतें रेजी तांहांअज, आपुंह ख्रीस्तुअ होददाम गोंवांदी बोंणुंह।
15 पोवीतोर लेखाणाहांम लेखलों हाय का, “पोरमेहेर आमी तुमनेंह जों आखेह तों तुमां उनायन मानजा! आने तुमांअ आगलाअ डायाहां तीयाअ वीरुद बोळवो केअलो तांहांअ तीयाहां जेंहकींअ केअलों, तेंहकींअ तुमां तीयाअ गोठ नांय मानांअ टीणी तीअ मां राखतें!” ईया लेखाणु पोरमाणे चालीन आपुंह ख्रीस्तुअ होददाम गोंवांदी बोंणी सेकतेंह।
16 पोरमेहेराअ आवाज उनाअलें तेबी, केडांय तीयाअ वीरुद बोळवो केअलो? जें मांहेंअ मोसेअ आगेवानीम मीसोर देसामेनेअ नींगी आललें, तीयाहां बादाहां ज पोरमेहेराअ वीरुद बोळवो केअलो। 17 आने चालीस वोरसें लोगुंअ पोरमेहेराल केडापेअ रोग चोळली? तीया लोकाहांपेअज तीयाल रोग चोळली का जीयाहां पाप केअलो आने तीयाअ पोरीणामे तीयाहांअ मुरदें उजाळाम पोळी रेहलें। 18 आने “जीया कानान देसाम आंय तीयाहांन आराम केरांअ देनारो आथो, तीया देसाम तें कीदीह बी नांय वीहे” एंहडो पोरमेहेरांय केडाअ बाबोताम होम खादो? तीया ईसरायेल लोकाहांअ बाबोतामुज तीयांय एंहडो होम खादो का जीयाहां तीयाअ आखलों नांह मान्यों। 19 एंहकींअ कीईन आपुंह हीअ सेकतेंह का, तीयाहां पोरमेहेराअ आखलों नांय मान्यों तीयाअ लीदे ते लोक आरामाअ खातुर जीया देसाम जांअ आथा तींहीं देसाम पोची नांय सेक्या।