2
पोरमेहेर लोकाहांन तीयाहांअ पापाहांअ सीक्सामेनेअ वाचावेह ते कोतीअ मोडी गोठ हाय!
1 एंहडा उचाम-उचा होददावाला पोयराअ मारफोते ए गोठ आपनेंह मीलीह तीयाअ लीदे, आपुअ पापाहांअ सीक्सामेनेअ वाचायांअ बाबोताम तीयापेनेअ जे गोठ्या आपुंह उनाअयाह, तीयुहुंपेअ आपुअ खुब धीयान राखांअ जोजे, ईयाअ खातुर का, आपुंह तीयु गोठीहींअ पोरमाणे चालांअ वीहराय नांय जाजी। 2 दुतांय जाहेर केअलो पोरमेहेराअ नीयोम भोरुचो राखी सेकाय एंहडो आथो। आने तो नीयोम तोळनारांहन आने तीयाअ पोरमाणे नांय चालनारांहन बादाहांन पोरमेहेरांय नीयायी रीते सीक्सा केअयी। 3 तीयाअ लीदे, ईत केरा का, पोरमेहेर लोकाहांन तीयाहांअ पापाहांअ सीक्सामेनेअ केंहकींअ वाचावेह तीयु बाबोताअ गोठीपेअ जो आपुंह धीयान नांय देजी ता, तीयु सीक्सामेनेअ आपुंह नांयज वाचाअहुं! ए गोठ पेअलांअ मालीख ईसुंय सोतेज आखी आने हातींअ ते गोठ उनाअनाराहां आपनेंह साबीत कीअ देखावीह का ते गोठ हाचीज हाय। 4 आने पोरमेहेरांय बी खुब जातीअ चोमोत्काराअ कामाहांकींअ आने तीयाअ मोर्जी पोरमाणे पोवीतोर आत्मांय वीसवास्यांहन जें वोरदानें देदलें तीया वोरदानुंहकींअ ते गोठ हाची हाय तीयाअ साबीती देतो रीयोह।
पापाहांअ सीक्सामेनेअ आपनेंह वाचावनारो
5 पोरमेहेर जे नोवी दुन्या बोंणावांअ हाय आने जीयुअ बाबोताम आंय लेखुंह, तीयु दुन्यापेअ ता होरगाअ दुत नांय पेन ख्रीस्तज राज कीअ एंहडों तीयांय नोक्की केअयोंह। 6 ईयु बाबोताम एक मांहांअल पोवीतोर लेखाणाहांम पोरमेहेराल एंहकींअ आखता नोंदलों हाय का, “केडों बी एंहडों लायोक नांह का, तुं तीयाअ वीचार क्योव! आने केल्लों बी मांहुंअ एंहडों लायोक नांह का, तुं तीयाअ कालजी राखो!
7 आने मांहांअल तुंयुं होददाम दुताहांअ केअता थोळोंकुज उतुअतों केअयों, पेन हातींअ तुंयुं तीयाल मोडाय आने मान देदों।
8 आने तुंयुं तीयाअ आथाम बादों होप्योंह।” ईंहीं लेखलों हाय का, पोरमेहेरांय “मांहांअ आथाम बादों होप्योंह।” ईयाकींअ होमजाअहे का, पोरमेहेरांय काय बी बाकी राख्या वोगुर बादोंज मांहांअ आथाम होप्योंह। पेन आपुंह जांअतेंह का, आमीर्याअ वोखताम बादा मांहांअ आथाम होप्यों वीअ एंहडों नांह जाणाअतों।
9 पेन आपुंह नोक्कीज जांअतेंह का, ईसुल ता बादी वोस्ताहांपेअ आदीकार हाय।
तीयाल पोरमेहेरांय थोळाक वोखताअ खातुर होददाम दुताहांअ केअता उतुअतो केअयो, ईयाअ खातुर का, पोरमेहेराअ मोदोताकींअ तो दोरेक मांहांअ खातुर सोताअ जीव दे। तो दुख वेठीन मोअयो तीयाअ लीदे, पोरमेहेरांय तीयाल खुब मोडाय आने मान देदों।
10 पोरमेहेरांय, जीयाअ खातुर आने जीयाअ मारफोते बादया वोस्तु हायाताम हाय, तीयांयज ईसुल तीयांय वेठला दुखुंहकींअ खामी वोगुराअ बोंणाव्यो। तीयांय एंहडों केअयों तों बोराबोरुज हाय, ईयाअ खातुर का, ईसुज खुब लोकाहांन तीयाहांअ पापाहांअ सीक्सामेनेअ वाचावनारो वेअ आने तीयाहांन पोरमेहेराअ मोडायाअ गोंवांदी बोंणावनारो वेअ।
11 मांहांहांन तीयाहांअ पापुंहमनेअ चोख्खें केअनारो ईसु आने जीयाहांन तो चोख्खें केअहे तें मांहेंअ बेनुंअ एकुज पोरमेहेर बाहको हाय। तीयाअ लीदे, ख्रीस्त तीयाहांन राजी-खुसी तीयाअ पावुह आने बोंअयांह आखेह।
12 ईयु बाबोताम पोवीतोर लेखाणाहांम ख्रीस्तुल पोरमेहेराल एंहकींअ आखता नोंदलों हाय का,
“मांअ पावुह आने बोंअयुंहन तोअ बाबोताम आखेंह; आने तीयाहांअ आगलांअ आंय तोअ गुणगान केअहें।”
13 आने पोरमेहेराअ बाबोताम ईसुंय जों आख्योंह तों पोवीतोर लेखाणाहांम बीहरी जागे एंहकींअ लेखलों हाय:
“मांअ पावुह आने बोंअयुंअ होच, आंय बी तीयापेअ भोरुचो राखेंह।”
ख्रीस्तुल, तीयाअ पावुह आने बोंअयुंअ बाबोताम एंहकींअ आखता पोवीतोर लेखाणाहांम बीहरी जागे एंहकींअ नोंदलो हाय:
“हेअ! आंय, पोरमेहेरांय मांन होपला पोयराहांअरी हाय।”
14 पोरमेहेराअ पोयरें आखाअनारें आपुंह ता मांहेंअ हाय। तीयाअ लीदे, ईसु बी आपुअ होच मांहुंअ बोंण्यों। तो ईयाअ खातुर मांहुंअ बोंण्यो का, मांहांहांन मोत देवावांअ जीयाल ताकोत हाय एंहडा सेतानाल, तो सोताअ मोतुकींअ ताकोतु वोगुराअ बोंणावे, 15 आने मोताअ बीखुअ लीदे सोताअ आखी जीनगीम गुलामुंअ होच आथें तीया मांहांहांन एंहकींअ कीईन सोळवे। 16 आपुंह बोराबोर जांअतेंह का, होरगाअ दुताहांन मोदोत केरांअ नांय पेन आत्मीक रीते आबराहामाअ वोसुलामेर्याअ आपनेंह मोदोत केरांअज ईसु मांहुंअ बोंण्यों। 17 तीयाअ लीदे, तीयाअ बादी बाबोतींहम तीयाअ पावुह आने बोंअयुंअ होच, मोंजे का, आपुअ होच बोंणांअ जोजत्लों, ईयाअ खातुर का, तो बादा लोकाहांअरी दायालु रीते वोरतुअनारो आने पोरमेहेराअ बाबोतींहम ईमानदारी रीते वोरतुअनारो मोडांम-मोडो पुंजारो रे, आने एंहकींअ कीईन तो लोकाहांन तीयाहांअ पापाहांअ माफी दे। 18 आने आमी, तो पाप केरांअ लालचाअनारा केडाल बी तीयु लालोचुमनेअ वाचायांअ मोदोत कीअ सेकेह। काहाका, पाप केरांअ तो जांहांअ लालचाअयो तांहांअ तीयांय सोते बी दुख वेठयों, पेन तीयांय पाप नांय केअयो।