13
पोरमेहेराल केंहकींअ राजी राखुलोंअ?
1 ख्रीस्ती पावु-बोंअयुंअ तोरीके तुमां एक-बीहरापेअ माया राखतें रेजा! 2 पारका मांहांहांन बी तुमां गोवारें राखजा! एंहकींअ केअनारा ओमुकुंह ओजाणतामुज होरगाअ दुताहांन बी गोवारा राख्याह। 3 जें जेलाम कोंडाअलें हाय तीयाहांअरी तुमां सोते बी जेलाम कोंडाअलें वीअ तेंहडों धारीन तीयाहांअ चींता राखजा आने तीयाहांन मोदोत केअजा! आने जें मांहेंअ दुखें वेठतेंह तीयाहांअ होच तुमां सोते बी दुखें वेठतें वीअ तेंहडों धारीन तीयाहांअ चींता राखजा आने तीयाहांन मोदोत केअजा!
4 बादें मांहेंअ वोराळुल पुरे-पुरों मान दांअ जोजे! खोरेखोर कोअवालाहांअ ने कोअवालींअ एक-बीहराल ईमानदार रांअ जोजे। जें मांहेंअ सीनालों केअतेंह, तीयाहांन पोरमेहेर नीयाय कीईन सीक्सा कीअ।
5 तुमांअ जीवोनाहांम माल-मीलकोताअ लालोच नांय आवे तीयाअ कालजी राखजा आने तुमाहांपेअ जों काय हाय तींहमेंज राजी रेजा। काहाका, पोरमेहेरांय आख्योंह, “आंय कीदीह बी तोअहींनेअ जातो नांय र्युंव। आंय कीदीह बी तुल सोळी नांय द्युंव।” 6 पोरमेहेरांय एंहकींअ आख्योंह तीयाअ लीदे आपुंह खातरी राखीन आखी सेकतेंह का, “मालीख सोतेज मांअ मोदोत केअनारो हाय। तीयाअ लीदे, आंय केडाल बी बीनारो नांह। मांहेंअ मांन काय कीअ तीयाअ मांन काय बी बीख नांह।”
ईमानदार रेजा!
7 जीया आत्मीक वोळीलाहीं तुमनेंह पोरमेहेराअ गोठ आखली, तीयाहांन ईत केरा। ते केंहकींअ जीवत्ला ने केंहकींअ तुमाहांपेअ माया राखत्ला तीयाअ वीचार कीईन, पोरमेहेरापेअ तीयाहां जेंहडो वीसवास राखलो तेंहडो वीसवास तुमां बी राखतें रा।
8 आने ईं बी ईत राखजा: ईसु ख्रीस्त कीदीह बी नांह बोदलाअतो। तो गीया जोमानाम बी नांह बोदलाअयो, आमीर्याअ जोमानाम बी नांह बोदलाअतो, आने आवनारा जोमानाम बी नांय बोदलाय। 9 तीयाअ लीदे, हारी गोठीहींअ केअता जुदों हीकवे तेंहडा जाती-जातीअ बोद मां मानतें। पोरमेहेर मेरबानी कीईन आपनेंह जे आत्मीक गोती देहे, तीयाकींअज आपनेंह आत्मीक फायदो मीलेह। खांअ बाबोताम जे नीयोम हाय ते पालजी तीयाकींअ आपनेंह काय बी आत्मीक फायदो नांह मीलतो। जें ते नीयोम पालतेंह, तीयाहांन तीयाकींअ आत्मीक फायदो नांह मीलतो।
10 आपुअ आत्मीक मांडाहांअ खातुर आपुंह ख्रीस्तुंह देदला तीयाअ भोगुपेअ भोरुचो राखतेंह। तो भोग वेदीअ होच हाय। जे आजी जोनावोराहांअ भोगुंहपेअ भोरुचो राखीन मोंदीराम सेवा देताह ते, जे आत्मीक गोती आपुंह मीलवुअतेंह ते गोती मीलवी नांह सेकता। 11 दोर वोरसे मोडांम-मोडो पुंजारो मोंदीराअ एकदोम माजर्याअ भागाम जोनावोराहांअ रोगुत लीअ जाहलो, ईयाअ खातुर का, तो तीया रोगुतुल लोकाहांअ पापाहांअ माफीअ खातुर पोरमेहेराल चोळवे। पेन तीया माअला जोनावोराहांअ सोरीलें ता, मांहांहांअ पोळावुअहींनेअ सेटे बाली टाकत्लें। 12 तेंहकींअज कीईन ईसु बी सेहेराअ बारे कुरुसापेअ मोअयो, ईयाअ खातुर का, तीयाअ रोगुतुकींअ पापी लोक पोवीतोर बोंणे। 13 तांहांअ चाला आपुंह बी येहुदी धोरमाअरीअ आपुअ सोबोंद पुरी रीते तोळी टाकीन तीयाहांअहीं जाजी आने तीयांय जों ओपमान वेठलों तों आपुंह बी वेठजी! 14 काहाका, ईयु तोरतीपेअ आपुअ रांअ खातुर कायोम टीके एंहडों सेहेर हायज नांह। आपुंह ता भोवीस्यांम आवनारा सेहेराअ वाट जोवतें रेतेंह। 15 तीयाअ लीदे, चाला आपुंह आपुअ भोगु तोरीके ईसुअ मारफोते कायोम पोरमेहेराअ गुणगान केअतें रेजी! मोंजे का, “तो आपुअ मालीख हाय” एंहकींअ आपुंह कोबुल केअतेंह तांहांअ जे सोब्दा आपुंह आखतेंह, तेज तो भोग हाय। 16 एक-बीहराल मोदोत केरांअ ईत राखजा आने एंहकींअ कीईन बीहराहांअ भोलों केअजा। काहाका, एंहडा भोगुंहपेअ पोरमेहेर राजी हाय।
17 तुमांअ आगेवानाहांअ आदीकाराअ आदीनुम रा आने एंहकींअ कीईन तीयाहांअ आखलों माना। ते होर-होमीसा तुमांअ आत्मीक जीवोनाहांअ चोकी केअताह। काहाका, पोरमेहेराल तीयाहांअ सोताअ सेवाअ हीसाब देवुलोंअ हाय। जो तुमां तीयाहांअ आखलों मानाह ता, ते सोताअ सेवा राजी खुसी कीअ। जो तुमां तीयाहांअ आखलों नांय मानाह ता, ते सोताअ काम दुखी वीईन कीअ, आने तीयु सेवाकींअ तुमनेंह काय बी फायदो नांय मीले।
18 आमांअ खातुर पोरमेहेराल ओरुज केअतें रेजा। आमनेंह खातरी हाय का, आमांअ मोनें चोख्खें हाय। बादा सोंजोगाहांम आमां हाची रीते जीवांअ खुब मोर्जी राखताह। 19 आंय तुमनेंह खुब कालावाला कीअहुं का, पोरमेहेर मांन तुमांअहीं माहरीज फाचो मोकले एंहडी तुमां तीयाल ओरुज केरा।
कागलों लेखनाराअ सेल्या गोठ्या
20-21 आने आमी, सांती देनारो पोरमेहेर तीयाअ मोर्जी पुरी केरांअ खातुर जीयाअ बी जोरुल वेअ ते तुमनेंह दे! तीयांयज आपुअ मालीख ईसुल मोअलांमेनेअ फाचो जीवतो केअयोह। जो ईसु सोताअ घेटाहांन हाचवुअनारा भारवाळाअ होच आपनेंह हाचवेह, तीयाअ मोतुकींअ पोरमेहेर कायोम टीकनारा नोवा काराराल ओमोलुम लालोह। पोरमेहेर तीयाल जों गोंवेंह तों आपुअ जीवोनाम ईसु ख्रीस्तुअ मारफोते केअ! तीयाल होर-होमीसा मोडाय मीलती रे! आमेन!
22 मांअ ख्रीस्ती पावु-बोंअयुहुं, आंय तुमनेंह कालावाला कीअहुं का, तुमनेंह उंह चोळवुअनारी ईयु गोठील तुमां धीरोज राखीन उनाअजा! काहाका, मांयुं तुमाहांपेअ ईं टुकोंज कागलों लेख्योंह।
23 आपुअ ख्रीस्ती पावुह तीमोथील ओमोलदाराहां जेलाम नेअ सोळी देदोह तों तुमां जांणां एंहडी मांअ मोर्जी हाय। जो तो माहरी मांअहीं आवे ता, आंय तुमनेंह मीलांअ आवेंह तांहांअ तीयाल बी मांअरी लीअ आवेंह।
24 तुमांअ बादा आगेवानाहांन आने पोरमेहेराअ बीहरा बादा लोकाहांन मांअ सालाम देजा। ईटाली देसामेर्येंअ ख्रीस्ती पावुह-बोंअयांह बी तुमनेंह सोताअ सालाम मोकलुअतेंह।
25 पोरमेहेर तुमांअ बादाहां पेअ मेरबानी केअतो रे!