2
ख्रीस्त ईसुअ हाचो सोयनीक
1 बेटा तीमोथी, ख्रीस्त ईसुअ आर्याअ तोअ जोळाणुअ लीदे पोरमेहेरांय तोअपेअ जे मेरबानी केअयीह, तीयु मेरबानीकींअ तुं आत्मीक रीते मोजबुत बोंणजे! 2 तुंयुं मांअपेनेअ जे गोठ्या हीक्याह ते तुं ईत केअजे! तेज गोठ्या तुं बीहरा खुब लोकाहांपेनेअ बी उनाअयोह। ते गोठ्या एंहडा ईमानदार लोकाहांन हीकवुअजे का जे बीहराहांन बी ते हीकवी सेके।
3 ख्रीस्त ईसुअ एक हाचा सोयनीकु तोरीके तुं बी मांअरी दुखें वेठजे! 4 तुं जांअहो का, लोळायुम गेहलो सोयनीक सोताअ उपरी ओमोलदाराल खुस राखांअ खातुर सोताअ केल्ला बी खानगी कामुंहम नांह पोळतो। 5 तुं ईंबी जांअहों का, होरीफायुम भाग लेनारा, होरीफायुअ नीयोमाहांअ पोरमाणे नांय रोवे ता, तीयाल ईनाम नांय मीले। 6 तुं ईंबी जांअहों का, खुब मेहनोत केअनारा खेळुतुल खेतीअ पाकुअ पेअलो होक मीलांअ जोजे। 7 मांयुं आमी जों लेख्योंह तीयापेअ तुं वीचार केअजे! जो तुं तेंहकींअ कीअहो ता, जीयु बाबोतीहींन तोअ जांणांअ जोरुल हाय, ते जांणांअ मालीख तुल मोदोत कीअ।
8 ईत राखजे का, दावीदाअ वोसुलामेर्याअ ईसु ख्रीस्ताल पोरमेहेरांय मोअलामेनेअ फाचो जीवतो उठव्यो। एज गोठ आंय, जांहांअ लोकाहांन हारी गोठ आखुंह, तांहांअ तीयाहांन आखुंह। 9 जे हारी गोठ आंय आखुंह तीयाअ थोळाक लोक वीरुद केअताह तीयाअ लीदे, आंय ईंहीं जेलाम दुखें वेठुंह। गुनेगाराल केअताह तेंहकींअ तीयाहां हाकलीहींकींअ मांअ पाग बी बांदया। तेबी, पोरमेहेराअहींनेअ आवनारी तीयु गोठील जाहेर केअता बीहरा सेवोकुंहन केडों बी नांह ओटकावी सेकतों। 10 तीयाअ लीदे, पोरमेहेरांय पोसोंद केअला लोकाहांअ हाराअ खातुर ईं बादों आंय राजी-खुसी वेठी लीहुं, ईयाअ खातुर का, तीयाहांन बी ख्रीस्त तीयाहांअ पापाहांअ सीक्सामेनेअ वाचावे, आने जीया मोडायावाला जागे तो हाय, तींहीं ते बी तीयाअरी कायोमाअ खातुर रे।
11 जीयु गोठीहींन मानांअ लायोक हाय एंहकींअ आपुंह बादें आखतेंह, ते गोठ्या ईत कीईन दुखें वेठजे! ते गोठ्या ए हाय:
ख्रीस्त मोअयो तांहांअ, आपुंह बी तीयाअरी मोय गीयें वीअ तेंहकींअ आपुअ पेअलुर्योंअ वोरतोन आपुंह सोळी देदोंह तीयाअ लीदे, आपुंह तीयाअरी जीवुंह बी।
12 आपुंह धीरोज राखीन दुखें बी वेठतेंह तीयाअ लीदे, आपुंह तीयाअरी राज बी कीअहुं। पेन, जो आपुंह तीयाल ओअखांअ ना पाळजी ता, तो बी आपनेंह ओअखांअ ना पाळीअ।
13 आपुंह तीयाल ईमानदार नांय रेजी तेबी, तो ता आपनेंह तीयांय देदला वोचोनु पोरमाणेज आपुअरी वोरतीअ। काहाका, तो सोताअ सोबावाअ वीरुद वोरती नांह सेकतो।
पोरमेहेराल पोसोंद पोळे एंहडो सेवोक
14 बीहराहांन बोद दांअ तुंयुं नीम्याह तीयाहांन, मांयुं तुल आखली ईयु गोठीहींअ बाबोताम ईत केराव्या केअजे! तीयाहांन कोळोक रीते आखजे का, ते जों केअताह तों पोरमेहेर जांअहे तीयाअ लीदे, सोब्दांअ बाबोताम ते भानगुळ नांय केअ। काहाका, बोद देनारा भानगुळ केअ तांहांअ, तीयाकींअ काय बी फायदो नांह वेअतो। पेन उलटों, तीयु भानगुळीकींअ ते उनाअनारांअ आत्मीक नास केअताह।
15 पोरमेहेराअ आगलांअ पार उत्लो सेवोक बोंणांअ तुं खुब मेहनोत केअजे! ईमानदार कामदारुअ होच बोंणीन पोरमेहेराअ हाची गोठील ते जेंहडी हाय तेंहडीज हीकवुअजे! 16 जींहमें पोरमेहेराल मान नांय मीले एंहडी ओकली वोगुराअ चारचांहम तुं मां पोळतो! काहाका, एंहड्या चारचा उनायन उनाअनारें पोरमेहेराअ पाही आवांअ बोदले उलटों सेटे जातेंह। 17 जेंहकींअ चेपी चांदों आखा सोरीलाम फेलायन सोरीलाअ बीहरा हारा भागुंहन होळवी टाकेह, तेंहकींअ ए खोटा बोद वीसवास्यांहम फेलाय जाताह आने तीयाहांअ जीवोना ंहन बीगाळी टाकताह। हुमनेयुंह आने फीलेतुंह ए खोटा बोद देदाह। 18 “पोरमेहेरांय मोअला मांहांहांन एगुहवार्येंअ फाचें जीवतें उठवी देदेंह।” एंहकींअ आखीन ते सोते हाची वाट चुकी गीयाह, आने थोळाक वीसवास्यांहन बी वीसवासामनेअ पाळी टाक्येंह। 19 पेन पोरमेहेराअ मोंडोळ ता आत्मीक रीते मोजबुत हाय। तों ता पायाअ होच हाय। तीया पायापेअ लेखाण कोतराअलों हाय का, “होकीकोतुम जे सोताअ लोक हाय तीयाहांन मालीख बोराबोर ओअखेह,” आने “‘आमां मालीखाअ लोक हाय’ एंहकींअ आखनारा बादाहांअ खोटों केरांअ सोळी दांअ जोजे।”
20 मालदार मांहांअ कोअमें होना-चांदीअ कींमती बासनें बी रेतेंह, आने कादुअ ने लाकळाअ बासनें बी रेतेंह। होना-चांदीअ तें कींमती बासनें ता खास कामाम वापराअतेंह। पेन जें कींमती नांह तें कादुअ ने लाकळाअ बासनें ता ना जेंहडा कामाम वापराअतेंह। 21 मोंजे, जो तुं बादी खाराब बाबोतींहमनेअ सोताल चोख्खो राखो ता, तुं पोरमेहेर सोताअ खास कामुअ खातुर वापरी सेके एंहडो सेवोक वीअहो। तोअ जीवोन चोख्खों रीअ आने तुं ओलोग राखी थोवला ने एक मोडा पोंगाअ मालीखाअ खास कामाम वापराअनारा कींमती बासनाअ होच वीअहो, आने तों दोरेक हारों काम केरांअ तीयार रीहो।
22 एंहडों हाय तीयाअ लीदे, जुवान मांहांहांन पापाम पाळनारी मोर्जींहम तुं फासाअतो मां। आने चोख्खा मोने मालीखाअ भोकती केअनारांअरी तुं बी जों खेरों हाय तोंज केअजे! ख्रीस्तुपेअ वीसवास राखतो रेजे, बीहराहांपेअ माया राखतो रेजे, आने बीहराहांअरी होप कीईन रेजे!
23 ओकली वोगुराअ आने नोक्कामी चारचांहम तुं मां पोळतो। तुल ता खोबुरुज हाय का, तीयाकींअ भानगुळ्याज पेदा वेअत्याह। 24 मालीखाअ सेवोक बाथवाळ्या नांय वेरांअ जोजे। पेन उलटों, ते बादाहांअरी दायालु सोबावे वोरतुअनारा, बोद दांअ आवळोतावाला, धीरोज राखनारा, 25 आने पोरमेहेराअ हाचायुअ वीरुद केअनाराहांन मीठी बोलीम हुदारनारा वेरांअ जोजे। काहाका, कादास पोरमेहेर तीयाहांअ मोनुंहन बोदली टाके, ने ते हाची गोठील माने, 26 आने तीयाहांन ओकुल आवे, आने एंहकींअ कीईन ते सेतानाअ फांदांमनेअ वाचाय जाय। सेतानांय तीयाहांन तीयाअ मोर्जी पोरमाणे केरावांअ कोब्जे कीअ राख्याह।