तीमोथील पावुलुंह लेखलों बीहरों कागलों
1
सालामाअ गोठ
1-2 मांअ मेराला पोयरा तीमोथी, आंय पावुल तुल ईं कागलों लेखुंह। आंय पोरमेहेराअ मोर्जी पुरी केरांअ खातुर ख्रीस्त ईसुअ खास चेलो हाय। तीयांय मांन ईयाअ खातुर पोसोंद केअयोह का, ‘मांहेंअ ख्रीस्त ईसुअ आर्याअ तीयाहांअ जोळाणुकींअ कायोमाअ खातुर जीवीअ’ एंहकींअ पोरमेहेरांय जों वोचोन देदोंह, तों आंय तीयाहांन आखुं। पोरमेहेर आपुअ बाहको आने आपुअ मालीख ईसु ख्रीस्त तोअपेअ मेरबानी ने दाया केअतो रे आने तुल सांती देतो रे!
पावुल तीमोथील ईमानदार रांअ उफ देहे
3 ओ तीमोथी! तोअ खातुर आंय पोरमेहेराअ आभार मानुंह। आंय मांअ आगलाअ डायाहांअ होच चोख्खा मोने तीयाअ सेवा कीअहुं। आने आंय ईत कीईन तोअ खातुर तीयाल रात-दीह ओरुज बी कीअहुं। 4 तुल मीलांअ मांअ खुबुज मोर्जी हाय। काहाका, आपुंह सुटा पोळत्ला तांहांअ तुं कोतोअ रोळलो, तों मांन ईत हाय। आपुंह फाचा मीलुंह तांहांअ खुब आनोंद वीअ।
5 तुं मालीखापेअ हाचाम-हाचो वीसवास राखोह, तों मांन ईत आवेह। तोअ पेअलांअ तोअ याहकीअ याहकी लोईंह आने तोअ याहकी युनीकेंह तीयापेअ वीसवास राखलो। मांन खातरी हाय का, आमी तुं बी तीयापेअ वीसवास राखोह।
6 तीयाअ लीदे, आंय तुल ईत केरावुंह का, मांयुं तोअ मुनकापेअ आथ थोवीन तुल पोवीतोर सेवाअ खातुर नीमलो तांहांअ पोरमेहेरांय जों खास आत्मीक वोरदान तुल देदलों, तों तुं बोराबोर वापरुअतो रेजे! 7 ईत राखजे का, पोरमेहेरांय आपनेंह तीयाअ पोवीतोर आत्मा देदोह। तो आत्मा आपनेंह बीखर्यें नांह बोंणावतो। उलटों, तो आपनेंह ताकोतावालें बोंणावेह, आने बीहराहांपेअ माया राखांअ आने सोताल काबाम राखांअ बी तो आपनेंह मोदोत केअहे।
8 तीयाअ लीदे, आपुअ मालीखाअ बाबोताम आपुंह जे गोठ आखताह तीया बाबोताम नाजवाअतो मां! आने तीया मालीखाअ बाबोताअ गोठ आंय जाहेर कीअहुं तीयाअ लीदे आंय जेलाम कोंडाअयोह तेबी, मांअ बाबोताम नाजवाअतो मा! उलटों, हारी गोठ जाहेर केअता जेंहकींअ आंय दुखें वेठुंह तेंहकींअ तुं बी दुखें वेठांअ तीयार रेजे! पोरमेहेर सोतेज तें दुखें वेठांअ खातुर तुल ताकोत दे! 9 पोरमेहेरांय आपनेंह आपुअ पापाअ सीक्सामेनेअ वाचाव्येंह, आने पोवीतोर जीवोन जीवांअ आपनेंह पोसोंद केअयेंह। आपुंह केअला हारा कामाहांअ लीदे पोरमेहेरांय आपुंहपेअ मेरबानी केअयीह एंहडों नांह। पेन, ख्रीस्त ईसुअ मारफोते आपुंहपेअ एंहडी मेरबानी केरांअ तीयांय खुब-खुब वोखत पेअलांअज नोक्की केअलों। 10 आने आमी आपनेंह वाचावनारो ख्रीस्त ईसु आलोह तीयाकींअ तीयांय देखाव्योंह का, तो आपुंहपेअ मेरबानी केअहे। खास कीईन, ख्रीस्त ईसुंय जाहेर केअयोंह का, आपुंह मोय जाहुं तेबी आपुंह कायोम मोअलेंज नांय रीहुं। तीयांय ईं बी जाहेर केअयोंह का, आपुंह तीयाअ बाबोताअ हारी गोठ उनायन तीयुपेअ वीसवास केअयोह तीयाअ पोरीणामे, आपुंह होळी नांय जाय एंहडा सोरीलुंहम कायोमाअ खातुर जीवुंह।
11 आने एज हारी गोठ खुब जागे जाहेर केअनारा तोरीके, ने खास चेला तोरीके, ने बोद देनारा तोरीके ख्रीस्तुंह मांन नीम्योह। 12 ईयाअ लीदेज आंय जेलाम ईं दुखें बी वेठुंह। ईया दुखाहांअ लीदे आंय नाजवाअतो नांह। काहाका, जीया ख्रीस्त ईसुपेअ मांयुं वीसवास केअयोह तीयाल आंय हारकींअ ओअखुंह; आने मांन पुरी खातरी हाय का, मांयुं तीयाल होपली वोस्तुंहन तो हाचवी सेकेह, आने तो फाचो आवीअ तांहांअ मांन ईनाम दीअ।
13 मांअपेनेअ तुंयुं जे गोठ उनाअयीह तेज गोठ तुं बीहराहांन आखजे! आने ख्रीस्त ईसुअरी जोळाअनारा तोरीके तुं तीयापेअ वीसवास राखतो रेजे आने बीहराहांपेअ माया राखतो रेजे! 14 आपुअ मोनाम वोहती केअनारा पोवीतोर आत्माअ मोदोताकींअ तुं, पोरमेहेरांय तुल जे खुब कींमती हारी गोठ होपीह तीयुल केडों बी बोदली टाके एंहडों वेरांअ मां देतो!
15 तुल ता खोबुरुज हाय का, आसीया वीस्ताराअ लोग-भोग बादाज वीसवासी लोकाहीं मांअरी वेहवारुज सोळी देदोह। तीयाहांम फुगीलु आने हेरमोगेने बी हाय। 16 ओनेसीफोराअ कोर्यांहपेअ मालीख दाया केअ! तीयांय खुब वोखत मांन उफ देदोह। आंय जेलाम कोंडाअलो हाय तेबी तो मांअ दोस्दार हाय एंहकींअ आखांअ तो जाराक बी नाजवाअयो नांह। 17 उलटो, रोम सेहेराम तो आललो तांहांअ तीयांय पुरा मोनाकींअ मांअ होदणी केअली आने मांन होदी काडीनुंज रेहलो। 18 मालीख ईसु फाचो आवे तीदीह तो ओनेसीफोरुल खास आसीरवाद दे! एफेसु सेहेराम तीयांय मांअ कोतीअ बादी सेवा केअली तों तुल खोबुर हाय।