तीमोथील पावुलुंह लेखलों पेअलोंअ कागलों
ईया कागलाअ बाबोताम बेन गोठ्या
तीमोथी ‘हानोअ आसीया’ आखाअत्लो तीया वीस्ताराअ एक जुवान ख्रीस्ती आथो। तीयाअ याहकी येहुदी आथी, पेन तीयाअ बाहको गीरीक जातीअ आथो। हारी गोठ आखांअ पावुल मुसाफोरी केअत्लो तांहांअ, तीमोथी तीयाअ हेंगात्यो आने मोदोत केअनारो आथो। तीमोथील लेखला ईया कागलाम पावुल खास तीन बाबोत्या देखावेह।
पेअलांअ ता, मोंडोळाम जों खोटों सीकसोण आवांअ टेकलों तों देखावेह। तों खोटों सीकसोण येहुदी ने येहुदी जातीअ नांह तेंहडा लोकाहांअ वीचारुंहन चेळ-भेळ कीईन देवाअत्लों। तों झुटों सीकसोण एंहकींअ आथों: देखाअनारी ए दुन्या पापी हाय, आने तींहमेंनेअ सुटकारो मीलवांअ वीअ ता, भेदुवालों गीयान मीलवांअ जोजे, आने ओमुक-ओमुक रीवाज पालांअ जोजे। दाखला तोरीके, ओमुक-ओमुक मांडो नांय खावुलोंअ, वोराळें नांय केरुलोंअ। एंहडों खोटों सीकसोण फेलाअतों ओटकावांअ पावुल तीमोथील ईया कागलाम आखेह। आने ईया कागलाम आजी वादाराम पावुलुंह मोंडोळाअ कारभारो चालवांअ बाबोताम आने जाहेर आरादना रीतसोर चालवांअ बाबोताम सीकसोण देदोंह। आने तींहमें तीयांय मोंडोळाअ वोळीलुंअ ने सेवोकुंअ जीवोनें ने वोरतोनें केंहडें वेरांअ जोजे तों बी देखाव्योंह। सेल्ले, तीयांय तीमोथी ईसु ख्रीस्तुअ हारो सेवोक केंहकींअ बोंणी सेके तीया बाबोताम हीकामोण देदीह। आने वीसवास्यांअ जुदी-जुदी टुकळींअ आर्याअ सोबोंदुम तीमोथीअ केंहड्या-केंहड्या जोवाबदार्या हाय तों बी पावुल तीयाल होमजावेह।
ईया कागलामेरीअ बाबोतीहींअ रुपरेखा
आगली गोठ १:१-२
मोंडोळ आने मोंडोळाअ वोळीलुंअ बाबोताम सीक्सोण १:३-३:१६
तीमोथीअ सेवाअ बाबोताम तीयाल सीक्सोण ४:१-६:२१