तीमोथील पावुलुंह लेखलों पेअलोंअ कागलों
1
सालामाअ गोठ
1-2 आपनेंह वाचावनारा पोरमेहेराअ हुकोमाअ लीदे आने भोवीस्यांम आपनेंह मीलनारा बादा आसीरवादुंअ खातुर जीयापेअ आपुंह आस्या राखतेंह तीया ख्रीस्त ईसुअ हुकोमाअ लीदे ख्रीस्त ईसुअ चेलो बोंणलो आंय पावुल, मांअ मारफोते ख्रीस्ती बोंणला आने मांअ खेरा पोयराअ होच हाय एंहडा ओ तीमोथी, तुल ईं कागलों लेखुंह।
पोरमेहेर बाहको आने आपुअ मालीख ख्रीस्त ईसु तोअपेअ मेरबानी केअ, दाया केअ, आने तुल सुख-सांती दे!
झुटा बोद देनाराहांअ बाबोताम चेतवोंणी
3 आंय माकेदोनीया जील्लाम जाहलो तांहांअ मांयु तुल ओरुज केअली तेंहकींअ आमी बी कीअहुं का, “एफेसु सेहेराम आजी वादारे रोकाय जाजे,” ईयाअ खातुर का, झुटा बोद देनारा तींहींर्याअ ओमुक लोकाहांन तुं हुकोम क्योव का, तेंहडो बोद दांअ ते बोंद केअ, 4 आने उबजावी काडली गांअयुंहपेअ आने आगलाअ डायाहांअ नांवांअ होद वोगुराअ ईयादींहपेअ ते धीयान नांय दे। ईयु ईयादींहकींअ आने गांअयुंहकींअ ता लोकाहांम वाद-वीवादुज पेदा वेअताह। 5 ईया हुकोमाअ ईरादो ओ हाय का, मांहेंअ चोख्खा मोनाकींअ, आने खेरा-खोटाअ जाण केअनारा हारा आत्माकींअ, आने हाचा बोदा पेअ खेरी रीते वीसवास राखीन बीहराहांन मेर केअ। 6 तीया लोकाहांमेर्याअ थोळाकाहीं एंहकींअ नांह केअयों तीयाअ लीदे, ते नोक्कामी चारचांहम उतीन सोताअ आत्मीक वाट चुकी गीयाह। 7 ते पोरमेहेराअ नीयोम हीकवुअनारा बोंणांअ मोर्जी राखताह, पेन ते सोतेज सोताअ गोठ नांह होमजुअता। 8-10 पोरमेहेराअ नीयोम हाचा लोकाहांअ खातुर नांह देवाअया। पेन ते ता नीयोम तोळनारांहन, पोरमेहेराअ आखलों नांय माननाराहांन, पोरमेहेराअ भोकती नांय केअनाराहांन, बीहरा पापींहन, जें पोवीतोर नांह तीयाहांन, आत्मीक बाबोतीहींअ मोस्कुरी केअनाराहांन, सोताअ याहकी-बाहकाल माय टाकनारांहन, बीहराहांअ खुन केअनाराहांन, सीनालों आने तीयाअ होच बीहरों खोटों काम केअनाराहांन, गुलामु तोरीके वेची दांअ खातुर मांहांहांन उठावी जानारांहन, झुटों गोगनारांहन, झुटी साक्सी पुरनारांहन, आने पोरमेहेराअ बाबोताअ हाचा बोदाअ वीरुद काय बी केअनारांअ खातुरुज देवाअयाह। ईं बादों ईत कीईन जोंबी मांहुंअ, जीयाअ खातुर ते नीयोम देवाअयाह तीयाअज खातुर तीयाहांन वापरे ता, आपुंह जांअतेंह का, पोरमेहेराअ नीयोम हाराज हाय। 11 ओ हाचो बोद, गुणगानुअ लायोकुअ पोरमेहेराअहींनेअ आलली मोडायुवाली हारी गोठी पोरमाणे हाय। लोकाहांन जाहेर केरांअ खातुर मालीखांय एज हारी गोठ मांन होपीह।
पोरमेहेराअ दायाअ खातुर आभार
12 ए हारी गोठ जाहेर केरांअ मांन गोती देनारा आपुअ मालीख ख्रीस्त ईसुअ आंय आभार मानुंह। काहाका, आंय खातरीअ मांहुंअ रेहें एंहकींअ गोंईन तीयांय सोताअ सेवा केरांअ मांन नीम्योह। 13 ख्रीस्तुअ वीसवास केअया पेअलांअ, आंय तीयाअ वीरुद गोगनारो, तीयापेअ वीसवास केअनाराहांन दुखें पाळनारो, आने तीयाहांन खाराब-खाराब गाय देनारो आथो। तेबी मालीखांय मांअपेअ दाया केअयी। काहाका, मांयुं तों बादों होमज्या वोगुर केअलों। तीयु वोखत मांयुं तीयापेअ वीसवास नांह केअयो। 14 आने आपुअ मालीखांय मांअपेअ खुब मेरबानी केअयी तीयाअ लीदे, आंय ख्रीस्त ईसुपेअ वीसवास कीअहुं, आने तीयापेअ ने बीहरा लोकाहीं पेअ माया राखुंह। 15 “ख्रीस्त ईसु पापी लोकाहांन तीयाहांअ पापाहांअ सीक्सामेनेअ वाचावांअ खातुर ईयु दुन्याम आलो” ए गोठ वीसवास केरांअ आने पुरी रीते मानी लांअ लायोक हाय। तीया पापींहम आंय खाराबुम-खाराब पापी हाय। 16 तेबी ईया कारोणाअ लीदेज मालीखांय मांअपेअ दाया केअयी, ईयाअ खातुर का, ख्रीस्त ईसु मांअ जेंहडा खाराबुम-खाराब पापीअरी पुरी धीरोज राखीन वोरतेह तों, मांअ हातींअ जें मांहेंअ कायोम जीवांअ खातुर ख्रीस्तुपेअ वीसवास कीअ, तीयाहांन नोमुना तोरीके तों देखावे। 17 जो कायोमाअ खातुर राजा हाय, जो कीदीह बी नास वेअनारो नांह, आने जीयाल केडों बी हीअ नांह सेकतों, आने जो एखलोज पोरमेहेर हाय, तीयाल बादें मांहेंअ कायोम मान देतें रे आने खुब मोडो मानतें रे! आमेन!
18 बेटा तीमोथी, एक वोखत तोअ बाबोताम जे भोवीसवाणी अ गोठ्या आखाअल्या, तीयुहुंअ पोरमाणे आंय तुल ए हीकामोण दीहुं, ईयाअ खातुर का, तीयु भोवीसवाणी अ गोठीहींकींअ तुल उंह आवे, आने तुं खोटायुअ वीरुद सेवा रुपी हाराम-हारी लोळाय लोळो, 19 आने हाचा बोदा पेर्योअ तोअ वीसवास जालवी राखो, आने खेरा-खोटाअ जाण केअनारा तोअ आत्माल डागु वोगुराअ जालवी राखो। ओमुक मांहेंअ खेरा-खोटाअ जाण केअनारा सोताअ आत्माअ गोठ्या नांह मान्यें। एंहकींअ कीईन तीयाहां हाचा बोदा पेर्योअ सोताअ वीसवास सोळी देदोह। 20 तेंहडा मांहांयम एफेसु सेहेरामेर्याअ हुमनायु आने आलेकसांदेर हाय। “पोरमेहेराअ बाबोताम खोटों नांय गोगांअ जोजे!” तों ते हीके तीयाअ खातुर, मांयु तीयाहांन सेतानाअ आथाम होपी देदाह।