2
मोंडोळाम आरादना
1-2 पेअलांम पेअलांअ आंय ओ बोद दीहुं का, मोंडोळाम मांहेंअ बादा लोकाहांअ खातुर पोरमेहेराल ओरुज आने कालावाला केअ, आने तीयाअ आभार माने। आने आपुंह सांतीअ रीते धोरमी आने बादी रीते आबरुदार जीवोन जीवी सेकजी तीयाअ खातुर, ते राज केअनारांअ खातुर बी ओरुज केअ। 3 मोंडोळाअ मांहेंअ एंहकींअ केअ तों हारों हाय आने आपनेंह वाचावनारा पोरमेहेराल पोसोंद हाय। 4 काहाका, पोरमेहेराअ एंहडी मोर्जी हाय का, बादें मांहेंअ हाचा बोदाअ गोठ जांयन ख्रीस्तुपेअ वीसवास केअ, आने तीयाअ आदारे पोरमेहेर तीयाहांअ पापाहांअ सीक्सामेनेअ तीयाहांन वाचावे। 5 काहाका, पोरमेहेर एकुज हाय आने पोरमेहेराअरी मांहांहांअ मेल-मीलाप केरावनारो बी एकुज हाय, मोंजे का, ख्रीस्त ईसु जो मांहुंअ बोंणलो तो। 6 तीयांय बादा मांहांअल सोळवांअ खातुर सोताअ जीवुअ भोग देदो। बादा लोकाहांन तीयाहांअ पापाहांअ सीक्सामेनेअ वाचावांअ पोरमेहेराअ मोर्जी हाय, आने तीयाअ ए खेरा सोमोये देवाअली साबीती हाय। 7 तीयाअ लीदे, तीयांय मांन वीसवासाअ आने हाचा बोदाअ गोठ येहुदी जातीअ नांह तेंहडा लोकाहांन जाहेर केअनारा तोरीके, आने मालीखाअ खास चेला तोरीके, आने बोद देनारा तोरीके नीम्योह। आंय ईयु बाबोताम झुटों नांह गोगतो, पेन खेरोंज गोगुंह।
8 मांअ एंहडी मोर्जी हाय का, पोरमेहेराल पुरी रीते होपाअला ख्रीस्ती आदमी पोरमेहेराअ भोकती केअतीअ वोखत बादी जागे मोनाम रोग का सोंका राख्या वोगुर सोताअ आथ उचा कीईन पोरमेहेराल ओरुज केअ। 9 तेंहकींअज कीईन वीसवासी बाया बी मोरीयादा आने ठावको सोबाव राखीन ने सोबती रीते पोतळें पोवीन सोताल सोबाल्या केअ। जुदी-जुदी रीते ओखवुअला चोट्यांहकींअ, का होनाअ नेता मोतीअ दागीनांहकींअ, ने मोगा पोतळांहकींअ ते सोताल सोबाल्या नांय केअ। 10 पेन उलटों, ‘आंय पोरमेहेराअ भोकती केअनारी बाय हाय’ एंहडो वीचार राखीन काम केअनारी बायाहांन सोबे एंहकींअ हारा कामाहांकींअ सोताल सोबाल्या केअ। 11 मोंडोळाम बाया सांती जालवीन, बोद देनाराहांअ आगलांअ गोरीबळो सोबाव राखीन, आने बादी रीते तीयाहांअ गोठ्या मानीन ख्रीस्ती बोद हीके। 12 आने तींहीं आदमीहींन बोद दांअ, * का तीयाहांन सोताअ दाबोणुम राखांअ आंय ख्रीस्ती बायाहांन सुट नांह देतो। उलटों, ते बाया सांती जालवे। 13 काहाका, पोरमेहेरांय मांहांयम आदामुलुज पेअलोअ बोंणावलो, आने तांहांअज आदामाअ कोअवाली हाव्वाल बोंणावली। 14 आने सेतानांय आदामुल नांह ठोग्यो, पेन उलटों बायुलुज, मोंजे, हाव्वालुज ठोगली। एंहकींअ कीईन पोरमेहेरांय देदलो नीयोम बायुंयज तोळलो। 15 तेबी जो बाया मोरीयादा राखीन, ख्रीस्तुपेअ वीसवास राखांअ ने बीहराहांपेअ माया राखांअ आने पोवीतोर रीते रांअ चालु राखे ता, पोयराअ जोन्माअ मारफोते ते बी सोताअ पापाहांअ सीक्सामेनेअ वाचाय जाय।