3
मोंडोळामेर्याअ आगेवान
1 जो केडो बी मोंडोळाअ वोळील * बोंणांअ मोर्जी राखतो वीअ ता तीयाअ ओर्थो ओ हाय का, तो हाराम-हारों काम केरांअ मोर्जी राखेह। ए गोठ मानांअ लायोक हाय। 2 तांहांअ वोळील ता एंहडो वेरांअ जोजे: लोक तीयापेअ काय बी गुनो नांय थोवी सेके एंहडो, सोताअ कोअवालील ईमानदार रेनारो, सोताअ चाल-चोलगोतींअ बाबोताम कालजी राखनारो, चोख्खा मोनाकींअ वीचारनारो, लोक तीयाल मान दीअ सेके एंहडो, पारकांहन बी गोवारें राखनारो, हारकींअ बोद दीअ सेके एंहडो, 3 साकटो नांय वीअ एंहडो, तुरुतुज रोगवाय जायन ठोकनारो नांय, पेन उलटों ठावको सोबाव राखनारो, लोकाहांअरी ईली-मीलीन रेनारो, पोयसाहांअ लोब नांय राखनारो वेरांअ जोजे। 4 तो सोताअ कुटुंबुअ कारभारो हारकींअ चालवुअनारो, आने तीयाअ पोयरें तीयाल बादी रीते मान दीईन तीयाअ आखलों माने तेंहकींअ कीईन तीयाहांन राखनारो वेरांअ जोजे। 5 काहाका, जो एक आदमील सोताअ कुटुंबुअ कारभारो चालवुअता नांय आवळुअतों वीअ ता, तो मोंडोळु रुपी कुटुंबुअ कालजी केंहकींअ राखी सेके? 6 मोंडोळाअ वोळील नोवो वीसवासी नांय वेरांअ जोजे। काहाका, तीयाल ओतोअ माहरी वोळीलुअ होददो मीली गीयोह तीयाअ लीदे कादास तीयाल ओभीमान चोळे, आने ओभीमानुअ लीदे सेतानाल पोरमेहेरांय जे सीक्सा देदली ते सीक्सा तीयाल बी मीले। 7 आने लोक वोळीलुअ नींदा नांय कीअ सेके आने एंहकींअ कीईन ते सेतानांय गोठवुअला फांदांम नांय पोळे तीयाअ खातुर, ख्रीस्ती नांय वीअ तें मांहेंअ बी तीया बाबोताम हारों गोगे एंहडो वेरांअ जोजे।
मोंडोळुंअ सेवाम मोदोत केअनारांअ बाबोताम
8 तेंहकींअज कीईन मोंडोळाम मोदोत केअनारा बी, लोक मान दीअ सेके एंहडा वेरांअ जोजे। आने मोनाम काय बी दोबावी राख्या वोगुर जों वीअ तों खेरों आखी देनारा वेरांअ जोजे। आने साकल्या, का पोयसाहांअ लोब राखनारा नांय वेरांअ जोजे। 9 आने ते पोरमेहेरांय जाहेर केअली वीसवासाअ गोठीपेअ खेरा-खोटाअ जाण केअनारा चोख्खा आत्माकींअ वीसवास राखी रेनारा वेरांअ जोजे। 10 आने मोंडोळाम सेवा होपता पेअलांअ तीयाहांन बी पारखांअ जोजे। आने तींहमें जो ते सोताल गुना वोगुराअ साबीत केअ ता, ते मोदोत केरांअ सेवा केअ। 11 तेंहकींअज कीईन, तीयाहांअ कोअवाल्या * बी लोक तीयुहुंन मान दीअ सेके एंहड्या वेरांअ जोजे। आने बीहराहांअ नींदा केअनार्या नांय, आने सोताअ चाल-चोलगोतींअ कालजी राखनार्या, आने बादी बाबोतींहम खातरीअ वेरांअ जोजे। 12 आने मोंडोळुंहम मोदोत केअनारो सोताअ कोअवालीअरी ईमानदार रेनारो, सोताअ पोयराहांन सोताअ काबाम राखनारो, आने सोताअ कुटुंबुअ कारभारो हारकींअ चालवुअनारो वेरांअ जोजे। 13 काहाका, मोंडोळुंहम मोदोत केरांअ सेवा जे हारकींअ केअताह, ते सोताअ खातुर हारो होददो मीलवुअताह, आने ते ईसु ख्रीस्तुपेर्याअ तीयाहांअ वीसवासाअ बाबोताम बीहराहांन हींमोत राखीन आखी सेकताह।
14 ईं कागलों लेखतीअ वोखत आंय तोअहीं माहरीज आवेंह एंहडी आस्या राखुंह। तेबी ए बाबोत तुल ईयाअ खातुर लेखुंह का, 15 कादास मांन आवता वाअ लागे ता, पोरमेहेराअ कुटुंबुम लोकाहांअ केंहकींअ वोरतुलोंअ तों तुल खोबुर पोळे। ईं कुटुंब ता, खुब गोतीवाला पोरमेहेराअ मोंडोळ हाय आने हाचा बोदा ल आदार देनारा खांबुअ होच हाय।
16 आपुअ भोकतीअ भेद खोरेखोर खुब मोडो हाय तीयाअ केडों बी ना नांय पाळी सेके। तो भेद ओ हाय का, ख्रीस्त मांहांअ रुप लीईन दुन्याम आलो। आने तो हाचो हाय तीयाअ साबीती पोवीतोर आत्मा दीअ। तो मोअलामेनेअ जीवतो वीयो हातींअ होरगाअ दुताहीं तीयाल देख्यो। आने तीया बाबोताम हारी गोठ पोरमेहेराअ सेवोकुहुं जुदा जुदा जातीअ लोकाहांन जाहेर केअयीह। आने दुन्यामेर्याअ खुब लोकाहीं तीयापेअ वीसवास राख्यो। आने पोरमेहेरांय तीयाल होरगाम लीअ लेदो।