१ तीमोथी 4

झुटा बोद देनाराहांअ बाबोताम

¹ पोवीतोर आत्मांय चोख्‍खोंज आख्योंह, आवनारा दीहाहांम थोळेंक मांहेंअ पुतळाहांअ गोठ्या उनाय आने पुतळाहांअ मोदोताकींअ झुटा बोद देनारा लोकाहांअ गोठ जे खोटी वाटे लीअ जानारा हाय ते मानीअ। आने एंहकींअ कीईन तें मांहेंअ हाचा बोदा पेर्योअ सोताअ वीसवास सोळी दीअ। ² ते बोद ता ढोंगी आने झुटों गोगनारा लोक देताह। तीया लोकाहांअ खेरा-खोटाअ जाण केअनारा आत्मा, तोपवीन लाल-चोळ केअला नोळाकींअ डांब्या वीअ तेंहडा बेरजाय गेहला हाय। ³ ते लोक एंहडा बोद दीअ का, वोराळें नांय केरुलोंअ, आने ओमुक-ओमुक मांडो नांय खावुलोंअ। खेरी रीते ता, तो मांडो, पोरमेहेरांय तीयापेअ वीसवास राखनारें आने तीयाअ बाबोताअ हाचाय जांअनारें मांहेंअ आभार मानीन खाय तीयाअ खातुरुज बोंणाव्योह। ⁴ काहाका, पोरमेहेरांय बोंणावलों बादों हारोंज हाय। आने तीयाअ आभार मानीन आपुंह खाजी ता, केल्‍लो बी मांडो पोरमेहेराअ नोजराम खाराब नांह। ⁵ काहाका, पोरमेहेराअ आसीरवादुअ सोब्‍दांहकींअ आने ओरुजुकींअ तो मांडो पोरमेहेराल पोसोंद पोळे तेंहडो बोंणी जाहे। ⁶ ए बाबोत्या मोंडोळाअ वीसवास्यांहन हीकवुअजे, ईयाअ खातुर का, तुं ख्रीस्त ईसुअ हारो सेवोक बोंणी सेको, आने जीया वीसवासाअ गोठीहींअ पोरमाणे आने हारा बोदा पोरमाणे तुं आज लोगुंअ चालतो आलोह तीयाकींअ तुल गोती मीलती रे। ⁷ धोरमी जीवोनाअरी जीयुंअ लागतों-वीअगुअतों नांह, आने जे आखांअ लायोक नांह, तेंहडी उबजावी काडली गांअयुंअ से तुं सेटे रेजे! आने धोरमी जीवोन जीवांअ खातुर सोखोत मेहनोतु रुपी कोसरोत केअजे! ⁸ काहाका, सोरीलाअ कोसरोतुकींअ ता थोळोकुज फायदो हाय। पेन धोरमी जीवोना कींअ ता, खुब फायदो हाय। काहाका, तों आमीर्याअ आने भोवीस्याअ जीवोनाम आपनेंह फायदो दांअ खातरी देहे। ⁹ ए गोठ हाची हाय आने पुरी रीते मानांअ लायोक हाय। ¹⁰ ईयाज कारोणे आपुंह सोखोत मेहनोत केअताह। काहाका, बादा लोकाहांन, आने खास कीईन तीयापेअ वीसवास केअनाराहांन तीयाहांअ पापाहांअ सीक्सामेनेअ वाचावनारा खुब गोतीवाला पोरमेहेरापेअ आपुंह आस्या राखीह। ¹¹ मांयुं ईया कागलाम लेखल्या बाबोत्या तोअ मोंडोळाअ लोकाहांन हीकवुअतो रेजे आने तीयु बाबोतीहींअ पोरमाणे चालांअ तीयाहांन हुकोम केअजे!

¹² तोअ मोंडोळाअ खुब लोकाहांअ केअता तुं ओसी उंमोरुअ हाय तीयाअ लीदे, तुल ओलको गोंणांअ तीयाहांन मोको मीले एंहडों काय बी तुं मां केअतो! पेन उलटों, बीहराहांअरी गोठ्या केरांअ आने वोरतांअ बाबोताम, बीहराहांपेअ माया राखांअ बाबोताम, आने पोवीतोर रीते रांअ बाबोताम, तुं बादा वीसवास्यांअ आगलांअ नोमुनो बोंणजे! ¹³ आंय तोअहीं आवुं तांव लोगुंअ, पोवीतोर लेखाण जाहेराम वाचांअ, वीसवास्यांहन उफ दांअ, आने तीयाहांन पोरमेहेराअ गोठ्या हीकवांअ कामुंहम तुं गुथाअलो रेजे!

¹⁴ मोंडोळाअ सेवाअ खातुर तुल नीमलो तांहांअ पोवीतोर आत्मांय जाणावली गोठ जाहेर केअनारांय तोअ बाबोताम जों आखलों तीयाकींअ आने मोंडोळाअ वोळीलाहीं तोअ मुनकापेअ आथ थोव्या तीयाकींअ तुल जों वोरदान मीललों आने जों आमी बी तोअपेअ हाय, तीया वोरदानुल मोंडोळाअ सेवाम वापरांअ कालजी राखजे! ¹⁵ आने तुं पोरमेहेराअ सेवाम आगलांअ वादोह तों बादाहांन खोबुर पोळे तीयाअ खातुर, तुं ईयु गोठीहींअ पोरमाणे चालजे आने तीयुहुंमुज गुथाअलो रेजे! ¹⁶ तुं सोताअ जीवोनाअ बाबोताम आने जो बोद तुं दीहो तीया बाबोताम कालजी राखजे, आने ईयु बाबोतींहम गुथाअलो रेजे! काहाका, एंहकींअ कीईन तुं सोते बी सोताअ पापाहांअ सीक्सामेनेअ वाचाय जाहो, आने तोअ गोठ उनाअनाराहांन बी वाचावांअ मोदोत कीअहो।