5
मोंडोळाअ लोकाहांअरी वोरतांअ बाबोताम सालाह
1 मोंडोळाअ डाया मांहांअल ठोपको मां देतो। पेन जेंहकींअ सोताअ बाहकाल होमजावतो वीअ तेंहकींअ तीयाल होमजावजे! आने जेंहकींअ सोताअ पावाहांन होमजावतो वीअ तेंहकींअ मोंडोळाअ जुवान पोयराहांन होमजावजे! 2 आने सोताअ याहकील होमजावतो वीअ तेंहकींअ तुं मोडी उंमोरुअ बायाहांन होमजावजे! बोंअयुंहन होमजावतो वीअ तेंहकींअ पुरा पोवीतोर रीते, मोंडोळाअ जुवान पोयरींय न होमजावजे!
मोंडोळाअ रोंडेअ बायाहांअ बाबोताम सालाह
3 मोंडोळाअ जे रोंडेअ बाया खोरेखोर काय बी आदारु वोगुराअ एखल्याज रेत्याह, तीयुहुंअ जोरुलीहींअ चींता मोंडोळाअ राखांअ जोजे। 4 पेन जो रोंडेअ बायाअ पोयरें का पोयराहांअ पोयरें वीअ ता, तें पोयरें पेअलांअ सोताअ कोर्यांअ जोरुल्या पुर्या केअ, आने एंहकींअ तीयाहांअ खातुर सोताअ धारमीक फोरोज पुरी केअता हीके आने एंहकींअ कीईन तीयाहांन पोहनारा याहकी-बाहकाअ आने डायाहांअ बोदलो वाले। काहाका, एंहकींअ बोदलो वाले तों पोरमेहेराल पोसोंद हाय। 5 जे रोंडेअ बाय खोरेखोर काय बी आदारु वोगुराअ आने एखलीज रेहे, तीयुल सोताअ जोरुलीहींअ खातुर पोरमेहेरापेअ आस्या राखांअ पोळेह, आने ते रात-दीह तीयाल कालावाला आने ओरुज केअया केअहे। 6 पेन जे ख्रीस्ती रोंडेअ बाय मोज-सोकुम गुथाअली रेहे, ते ता जीवती हाय तेबी, खोरेखोर मोअलीज हाय। 7 ए हीकामोण मोंडोळाअ लोकाहांन देजे, ईयाअ खातुर का, उपेअ लेखली गोठी पोरमाणे ते जीवे आने एंहकींअ कीईन केडों बी तीयु बाबोतींहम भुल नांय काडे। 8 पेन जो केल्लो बी वीसवासी सोताअ जातुलांअ जोरुल्या, खास कीईन सोताअ कोर्यांअ जोरुल्या पुर्या नांय पाळे ता, तीयाअ ओर्थो ओ हाय का, तीयांय सोताअ वीसवास सोळी देदोह। आने तो ख्रीस्तुपेअ वीसवास नांय केअनारा मांहांअ केअता बी वादारे खाराब हाय।
9-10 जीयु रोंडेअ बायाअ उंमोर सांहींट वोरसांअ केअता ओसी नांय वीअ, आने जे सोताअ कोअवालाअरी ईमानदार रीयी वीअ, आने हारें कामें केरांअ बाबोताम जीयुंह हारों नांव कामाव्यों वीअ, मोंजे का जीयुंह सोताअ पोयराहांन हारकींअ पोहयें वीअ, आने मांहांहांन गोवारें राख्यें वीअ, आने गोरीबळो सोबाव राखीन पोरमेहेराअ लोकाहांअ सेवा केअयी वीअ, आने दुखी मांहांहांन मोदोत केअयी वीअ, आने जे बादी जातीअ हारा कामुंहम गुथाअली रीयी वीअ, एंहडी रोंडेअ बायाहांअ नांवुज मोंडोळाअ रोंडेअ बायाहांअ ईयादीम नोंदजे आने मोंडोळ तीयुहुंअ जोरुलीहींअ चींता राखे। 11 पेन जुवान रोंडेअ बायाहांअ नांवें तीयु ईयादीम नोंदतो मां। काहाका, नांवें नोंदावीन हातींअ तीयुहुंन आदमीअरी सोबोंद राखांअ वीचार आवे तांहांअ ते ख्रीस्तुअ वीरुद बोंणीन बीहरी वोखत वोराळ केरांअ मागत्याह। 12 एंहकींअ कीईन ते ख्रीस्तुल तीयुहुं देदलों पेअलों वोचोन तोळी टाकीन गुनाल्या बोंणत्याह। 13 आने ते कोअ-कोअ फीरीन आल्याह बोंणांअ हीकत्याह। ओतोंअज नांय, पेन जों तीयुहुंअ गोगांअ लायोक नांह, तों गोगता-गोगता ते गोपाटा मारता आने बीहराहांअ कामाम माथों मारता बी हीकत्याह। 14 तीयाअ लीदे मांअ एंहडी मोर्जी हाय का, जुवान रोंडेअ बाया बीहरी वोखत वोराळें केअ, पोयराल्या बोंणे, सोताअ कुटुंबुअ कारभारो हारकींअ चालवे, आने एंहकींअ कीईन आपुअ दुस्मोनुंहन पोरमेहेराअ नींदा केरांअ मोको नांय दे। 15 मांअ एंहकींअ आखांअ कारोण ईं हाय का, आमी लोगुंअ थोळ्याक जुवान रोंडेअ बाया वीसवास सोळीन सेतानाअ वाटे जात्या रीयाह। 16 जो एक वीसवासी बायाअ जातुलांहम काय बी आदारु वोगुराअ रोंडेअ बाया वीअ ता, ते सोतेज तीयुहुंअ जोरुल्या पुर्या पाळे। तीयुहुंअ वोजो ते मोंडोळुपेअ नांय टाके, ईयाअ खातुर का, जे रोंडेअ बाया खोरेखोर आदारु वोगुराअ आने एखल्याज रेत्याह, तीयुहुंअ जोरुल्या मोंडोळ पुर्या पाळे।
मोंडोळाअ वोळीलुंअ बाबोताम सालाह
17 मोंडोळाम हारकींअ आगेवानी केअनारा वोळीलुंहन, खास कीईन जे पोरमेहेराअ गोठ जाहेर केरांअ आने बोद दांअ सोखोत मेहनोत केअताह तीयाहांन, पुरतों मान आने पुरतो पागार मीलांअ जोजे। 18 काहाका, पोवीतोर लेखाणाहांम एंहकींअ लेखलों हाय का, “मोलतीअ वोखत डोगरांअ मुंयांअरी गोळवों मा बांदतो!” आने तींहमें एंहकींअ बी लेखलों हाय का, “मोजुर सोताअ मोजरी मीलवांअ होकदार हाय।”
19 बेन का तीन साक्सीहींअ आदारु वोगुर वोळीलुअ बाबोताअ फोरीयाद मां मानतो, 20 पाप केअनारा वोळीलुंहन मोंडोळाअ बादा लोकाहांअ आगलांअ ठोपको दे, ईयाअ खातुर का, बीहरा वोळील पाप केअता बीये।
21 पोरमेहेराल आने ईसु ख्रीस्तुल आने पोरमेहेरांय पोसोंद केअला होरगाअ दुताहांन साक्सी राखीन आंय तुल हुकोम कीअहुं का, एक वोळीलुअ बाबोताम पुरी होकीकोत जांअता पेअलांअ, काय बी नोक्कीज मानी लेया वोगुर, आने केडाअ बी वेल-तांअया वोगुर, मांअ ओ हुकोम पालजे! 22 मुनकापेअ आथ थोवीन केडाल बी मोंडोळाअ सेवाम लांअ बाबोताम उतवाल मां केअतो! आने एंहकींअ उतवाल कीईन बीहरा लोकाहीं अ पापाम तुं बी गोंवांदी मां बोंणतो! उलटों, तुं सोताल पापुंहमनेअ चोख्खो राखजे!
23 (ओ तीमोथी, तुं एखलों पांय ओतोंअज मां पीतो। पेन तोअ डेडीअ आजार्येंीअ लीदे आने तुं तातो-मांदो रेया कीअहो तीयाअ लीदे थोळोक दाराख्साअ रोह बी पीजे!)
24 थोळाक लोकाहांअ पाप बीहराहांन तुरुतुज खोबुर पोळी जाताह आने ते, पाप केअनाराहांन तीयाअ सीक्सा मीलवी देताह। पेन बीहरा थोळाकुंअ पाप ता तापास कीईन तांहांअज जाहेर वेअताह। 25 तेंहकींअज कीईन थोळाक लोकाहांअ हारें कामें बी तुरुतुज बीहराहांन खोबुर पोळी जातेंह। आने जें कामें बीहराहांन खोबुर नांह पोळतें, तें बी वादारे वोखत लोगुंअ सुपें नांह रीअ सेकतें। तीयाअ लीदे, मांयुं एंहकींअ आखलों, “मांहांहांन मोंडोळाअ सेवाम नीमता पेअलांअ तीयाहांन बोराबोर पारखुअजे!”