6
ख्रीस्ती चाकोराहांन सालाह
1 बादा ख्रीस्ती चाकोर ख्रीस्तुपेअ वीसवास नांय केअनारा तीयाहांअ सेटांयन बादी रीते मान दांअ लायोक गोंएं, ईयाअ खातुर का, केडों बी पोरमेहेराअ बाबोताम आने आपुअ बोदाअ बाबोताम खोटों नांय गोगे। 2 जीया चाकोराहांअ सेट ख्रीस्तुपेअ वीसवास राखनारा हाय, तीया सेटांयन, ते ख्रीस्ती पावुह हाय तीयाअ लीदे ते चाकोर ओलका नांय गोंएं। उलटों, ते तीयाहांअ सेवा-चाकरी वादारे हारकींअ केअ। काहाका, तीया चाकोराहांअ सेवा-चाकरीअ लाब लेनारा ता ख्रीस्तुपेअ वीसवास राखनारा आने पोरमेहेराल मेराला हाय।
झुटा बोद आने माल-मीलकोतुपेरीअ माया
ए बाबोत्या तोअ मोंडोळाम हीकवुअजे आने होमजावजे:
3 जोंबी झुटो बोद देहे आने आपुअ मालीख ईसु ख्रीस्तुअ बाबोताअ हाच्या गोठ्या आने धोरमी जीवोनाअ बाबोताअ बोद नांह मानतों, 4-5 तों खुब ओभीमानी मांहुंअ हाय। तों जों हीकवांअ दावो केअहे, तीया बाबोताम तों काय बी नांह होमजुअतों। आने तों गांडाअ होच धोरमाअ गोठीहींअ बाबोताअ वाद-वीवाद ने चारचांअ फाचलांअ पोळी जाहे। ईया वाद-वीवादुंहकींअ ता लोकाहांम आळा-झोळी, आदराय, भानगुळ, नींदा, बोला-चाली, आने खोटा वेम, एंहड्या बाबोत्याज पेदा वेअत्याह। काहाका, तीया लोकाहांअ मोने बेरजाय गीयेंह, आने तीयाहां हाचो बोद गोमावी देदोह। आने तीयाअ पोरीणामे तें एंहकींअ मानतेंह का, पोरमेहेराअ सेवा केरुलोंअ तों ता पोयसा कामावांअ एक सादोन हाय।
6 पेन जो एक ख्रीस्ती मांहुंअ सोतापेअ जों वीअ तों पुरतों हाय एंहकींअ मानीन राजी रे ता, पोरमेहेराअ सेवाकींअ तीयाल खुब लाब हाय। 7 काहाका, आपुंह ईयु दुन्याम खाली आथुज आललें आने खाली आथुज ईयु दुन्यामनेअ जाहुं बी। 8 तीयाअ लीदे, आपुंहपेअ जो खांअ मांडो आने पोवांअ पोतळें वीअ, तों आपुअ खातुर पुरतों हाय एंहकींअ मानीन खुस रेजी! 9 जें मांहेंअ मालदार बोंणांअ मागतेंह, तें पारखांहम आने ओकली वोगुराअ आने नुकसान केअनारी मोर्जींअ फांदांम पोळतेंह। ए मोरज्या मांहांहांअ नास केअत्याह। 10 काहाका, माल-मीलकोताअ लोब बादी जातीअ खोटायुअ मुल हाय। ते मीलवांअ खुब मोर्जी राखीन थोळेंक ख्रीस्ती मांहेंअ सोताअ वीसवास सोळीन खोटा मारगे जातें रीयेंह आने तीयाअ लीदे तीयाहां सोताअ मोनुंहन खुब दुखी केअयेंह।
तीमोथीअ खातुर सालाह
11 पेन ओ, पोरमेहेराअ सेवोक, तुं ईयु बाबोतींहम मां पोळतो। पेन हाचें कामें केरांअ, धोरमी जीवोन जीवांअ, पोरमेहेरापेअ भोरुचो राखांअ, पोरमेहेरापेअ आने बादा लोकाहांपेअ माया राखांअ, दुखाहांअ वोखत धीरोज राखांअ, आने दायालु सोबाव राखीन लोकाहांअरी वोरतांअ कोसीस केअजे! 12 तोअ वीसवासाअ लीदे खोटायुअ वीरुद लोळांअ सोखोत मेहनोत केअजे! तों ता होरीफायुअ होच हाय। आने ईनामु तोरीके कायोमाअ खातुर रांअ खातरी राखीन रेजे। काहाका, खुब साक्सीहींअ हाजरीम तुंयुं ईसुपेर्योअ सोताअ वीसवास हारकींअ कोबुल केअलो तांहांअ पोरमेहेरांय तुल एंहकींअ कायोमाअ खातुर जीवांअज हादलो। 13 बादी वोस्ताहांन जीवोन देनारा पोरमेहेराल आने पोंतीयु पीलाताअ आगलांअ सोताअ बाबोताम हाची गोठ आखली तीया ख्रीस्त ईसुल साक्सी राखीन आंय तुल हुकोम कीअहुं का, 14 आपुअ मालीख ईसु ख्रीस्त दुन्याम फाचो पोरगोट वीअ तांव लोगुंअ, पापाअ डागु वोगुर आने केडों बी तोअपेअ केल्लो बी गुनो नांय थोवी सेके तेंहडों जीवीन हारी गोठीअ हुकोम पालजे! 15 बादें मांहेंअ जीयाअ गुणगान केरांअ जोजे, आने जीयाल बादाहां पेअ आदीकार हाय, आने जो राजांअ बी राजा हाय ने मालीखुंअ बी मालीख हाय, तीया पोरमेहेरांय नोक्की केअला सोमोये मालीख ईसु ख्रीस्त फाचो पोरगोट वीअ। 16 तो पोरमेहेर एखलोज कीदीह बी मोअनारो नांह। केडों बी पाही जाय नांय सेके ओताअ खुब उजवोळावाला जागे तो रेहे। केडांय बी तीयाल कीदीह बी नांह देख्यो आने केडों देखी सेकतों बी नांह। तीया पोरमेहेराल कायोम मान मीलतों रे आने राज केरांअ आदीकार तीयापेअज कायोम रे! आमेन!
17 ईया जोमानाअ ख्रीस्ती मालदाराहांन तुं एंहडो बोद देजे का, ते सोताअ माल-मीलकोताअ लीदे ओभीमान नांय राखे आने जे मीलकोत्या कायोम एक हारकया नांह रेत्या तीयुहुंपेअ नांय, पेन आपनेंह वापरांअ खातुर सुटा आथे बादों देनारा पोरमेहेरापेअ ते भोरुचो राखे 18 ते भोलों केअ, आने हारें कामें खुब केअ, आने जों सोतापेअ हाय तों बीहराहांन भोला मोनाकींअ दे। 19 ते एंहकींअ कीअ तांहांअ, ते सोताअ भोवीस्याअ लीदे भोरुचो राखांअ खातुर आदार देनारी मीलकोत टोलवीअ, ईयाअ खातुर का, जों खोरेखोर खेरों जीवोन हाय तों ते मीलवी सेके।
20 ओ तीमोथी, जो हाचो बोद पोरमेहेरांय तुल होप्योह, तो तुं हाचवी राखजे! आने पोवीतोर नांह एंहडा ओकली वोगुराअ लोवारांहम आने जीयाल थोळेंक मांहेंअ खोटी रीते “खास गीयान” आखतेंह तीया ओकली वोगुराअ वाद-वीवादुंहम तुं मां पोळतो! 21 काहाका, “तों गीयान” सोतापेअ हाय एंहकींअ आखावीन थोळेंक मांहेंअ वीसवासाअ वाट चुकी गीयेंह।
पोरमेहेर तुमांअ बादाहां पेअ मेरबानी केअतो रे!