3
पोरमेहेराल ओरुज केरांअ खातुर कालावाला
1-2 सेल्ले पावु-बोंअयुहुं, आमांअ खातुर पोरमेहेराल ओरुज केअजा का, जांय-जोवीन हाची गोठ नांय माननारा खाराब लोकाहांअ से तो आमनेंह सोळवे। काहाका, बादेंज मांहेंअ हाची गोठीपेअ वीसवास कीअ लेतेंह एंहकींअ नांह। आने तीयाल ओरुज केअजा का, जेंहकींअ तुमांअहीं वेअहे तेंहकींअ बीहरी जागर्येंअ वादारे ने वादारे मांहेंअ बी माहरी-माहरी मालीखाअ बाबोताअ गोठ उनाय आने तीयुपेअ वीसवास केअ। 3 पेन मालीख ईसु ईमानदार हाय। तो तुमनेंह वीसवासाम पाकें कीअ आने सेतानाअ से तुमनेंह हाचवीअ। 4 तुमां मालीख ईसुपेअ वीसवास राखतेंह तीयाअ लीदे तुमांअ बाबोताम आमनेंह खातरी हाय का, जे हुकोम आमां तुमनेंह देदाह तीयाहांअ पोरमाणे तुमां चालतें रेतेंह, आने आमी जे हुकोम आमां तुमनेंह देताह तीयाहांअ पोरमाणे बी चालाह। 5 मालीख ईसु तुमनेंह एंहडी दोरवोणी दे का, पोरमेहेर तुमाहांपेअ माया राखेह तों तुमां जांअतें रा, आने ख्रीस्त जेंहकींअ धीरोज राखत्लो तेंहकींअ तुमां बी धीरोज राखतें रा।
आल्येंह मां वेअतें!
6 आमी पावु-बोंअयुहुं, मालीख ईसुंय आमनेंह देदला आदीकाराकींअ आमां तुमनेंह हुकोम केअताह का, जों ख्रीस्ती मांहुंअ काम केरांअ ना पाळेह आने आमां जे बोद देदला तीयाअ पोरमाणे नांह चालतों, तीयाअरी केल्ली बी जातीअ वेहवार मा राखतें। 7 काहाका, तुमां सोतेज जांअतेंह का, आमां जेंहकींअ कीईन जीवत्ला तेंहकींअज तुमांअ बी जीवांअ जोजे। आमां तुमांअरी आथा तांहांअ आमां केल्ली बी वोखत आलाहया नांय आथा। 8 आने पोयसा देया वोगुर आमां केडाअ बी नांह खादों। पेन, आमांअ जोरुलीहींअ लीदे तुमांअमेर्याअ केडापेअ बी आदार राखांअ नांय पोळे तीयाअ खातुर आमां खोरेखोर रात-दीह खुब मेहनोत-मोजरी केअत्ला। 9 “आमनेंह खावावजा” एंहकींअ तुमनेंह आखांअ आमनेंह होक नांय आथो तीयाअ लीदे आमां एंहकींअ केअत्ला एंहडों नांह। पेन आमां तुमनेंह नोमुनो दांअ मागत्ला, ईयाअ खातुर का, आमांअ होच तुमां बी मेहनोत-मोजरी कीईन जीवा। 10 आमां तुमांअरी आथा तांहांअ बी आमां तुमनेंह हुकोम केअलो का, जो केल्लों बी ख्रीस्ती मांहुंअ मेहनोत-मोजरी केरांअ ना पाळे ता तीयाल मांडो मां देतें।
11 एंहडा मांहांअरीअ सोबोंद तोळी टाकांअ तुमनेंह हुकोम केरांअ कारोण ईं हाय: आमनेंह एंहडी खोबुर पोळीह का, तुमाहांमेनेअ थोळेंक मांहेंअ आल्येंह बोंणी गीयेंह आने काय बी मेहनोत-मोजरी केअया वोगुर बीहराहांअ कामाम माथों मारीन खाली रोखळ्या केअतेंह। 12 एंहडा मांहांहांन आमां मालीख ईसु ख्रीस्तुअ आर्याअ आपुअ जोळाणुअ लीदे एंहडो हुकोम केअताह आने एंहडी सालाह देताह का, तें सांती राखीन मेहनोत-मोजरी केअ आने सोताअ जीवांअ पुरतों मीलवे।
13 पेन बीहरा बादा पावु-बोंअयुहुं, तुमां जीव पाळ्या वोगुर बीहराहांअ भोलों केअतेंज रेजा! 14 ईया कागलाम आमां जों लेख्योंह तों जो थोळाक लोक नांय मानता वीअ ता, तीयाहांअ बाबोताम मोंडोळाम जाहेरात केअजा आने तीयाहांअ आर्योअ वेहवार बोंद कीअ देजा, ईयाअ खातुर का, तीयाहांन नाज आवे। 15 तेबी तीयाहांन दुसमोनुं तोरीके मां गोंअतें, पेन जेंहकींअ सोताअ पावाहांन चेतवोंणी देतें वीअ, तेंहकींअ तीयाहांन चेतवोंणी देजा।
सेल्या गोठ्या
16 सांती देनारो मालीख ईसु सोते बादा सोमोयुंहम आने बादी रीते तुमनेंह सांती दे! मालीख तुमांअ बादाहांअरी रे!
17 आंय पावुल तुमनेंह सालाम आखुंह। ईं आंय सोतेज लेखुंह, ईयाअ खातुर का, ईं कागलों मोकलुअनारो आंय सोतेज हाय तों तुमां जांआं। कागलें लेखांअ मांअ एज रीत हाय।
18 आपुअ मालीख ईसु ख्रीस्त बादाहां पेअ मेरबानी केअतो रे!