थेस्सालोनीका सेहेराअ मोंडोळाल पावुलाअ पेअलोंअ कागलों
ईया कागलाअ बाबोताम बेन गोठ्या
थेस्सालोनीका सेहेर रोम राज्याअ माकेदोनीया वीस्ताराअ राजधानीअ सेहेर आथों। फीलीप्पी सेहेरामेनेअ नींगीन हातींअ पावुलुंह थेस्सालोनीका सेहेराम मोंडोळ उबों केअलों। पावुलाअ गोठ उनायन थोळाकुज वोखताम येहुदी नांह तेंहडा लोकाहीं ख्रीस्ती वीसवासाम आवांअ मोर्जी देखावली आने तीयाहांमेर्याअ खुब ख्रीस्ती बोंण्या बी। मोंजे, आदरायाअ लीदे तींहींर्याअ खुब येहुदीहीं पावुलाअ खुब वीरुद केअलो। तीयाअ लीदे, पावुलुल थेस्सालोनीका सेहेर सोळीन बेरेया सेहेर जातों रांअ पोळ्यों। थोळाक वोखत हातींअ पावुल कोरींथ सेहेर आलो तांहांअ, तीयाअ आर्याअ सेवोक तीमोथींह थेस्सालोनीका मोंडोळाअ हालोताअ बाबोताम तीयाल खानगी खोबुर देदी।
तीयाअ लीदे, पावुलुंह ईया मोंडोळाअ लोकाहांन उफ दांअ आने ते ख्रीस्ती बोदा ंहपेअ पाको वीसवास राखे तीयाअ खातुर ईं कागलों लेख्यों। पावुल थेस्सालोनीका मोंडोळाअ लोकाहांअ मायाअ खातुर आने ईसुपेर्याअ तीयाहांअ वीसवासाअ खातुर तीयाहांअ आभार मानेह, आने तो सोते तीयाहांअरी आथो तांहांअ केंहकींअ जीवत्लो तों तीयाहांन ईत केरावेह। आने हातींअ पावुल मालीख ईसु फाचो आवांअ हाय तीया बाबोताम मोंडोळाम थोळाक लोक जुदा-जुदा सावाल उबा केअत्ला तीयाअ जोवाब देहे। ते लोक एंहडा सावाल फुचत्ला! “ईसु ख्रीस्त फाचो आवे तीयाअ पेअलांअ जे ख्रीस्ती मोय जाय, ते ईसु ख्रीस्त वीसवास्यांहन कायोमाअ खातुर जीवावे तीयाअ ओनुभोव कीअ सेकीअ का नांय?” आने “ख्रीस्त फाचो केंहडीवेल आवीअ?” पावुल ईयुज बाबोतीहींन लीईन तींहींर्याअ लोकाहांन आखेह का, “मालीख ईसु फाचो आवे तीयाअ धीरोज राखीन वाट जोवतें रा आने सांती राखीन हुची-हुचीम काम केअतें रा!”
ईया कागलामेरीअ बाबोतीहींअ रुपरेखा
साबासी १:१
आभार आने वोखाण १:२-३:१३
ख्रीस्ती वोरतोनुअ बाबोताम बोद ४:१-१२
ख्रीस्त फाचो आवीअ तीया बाबोताम सीक्सोण ४:१३-५:११
सेल्या हीकामोण्या ५:१२-२२
सेल्या गोठ्या ५:२३-२८