कोलोसे सेहेराअ मोंडोळाल पावुलाअ कागलों
ईया कागलाअ बाबोताम बेन गोठ्या
कोलोसे सेहेर ‘हानोअ आसीया’ नांवांअ वीस्ताराम एफेसु सेहेराअ दीह उगताअ वेल आथों। तीया कोलोसे सेहेराअ मोंडोळाल पावुलुंह ईं कागलों लेख्यों। ईं मोंडोळ पावुलुंह नांह उबों केअयों। पेन जीया वीस्ताराम ईं मोंडोळ आथों तीया वीस्ताराअ आत्मीक जोवाबदारी सोताअ हाय एंहडों पावुलुल लागत्लों। तीयाअ लीदे, एफेसु सेहेरनेअ थोळाक सेवोकुंहन तीयांय तींहीं मोकलुअला। पावुलुल एंहडी खोबुर पोळली का, कोलोसे सेहेराम ने तीया वीस्ताराम ओमुक मांहेंअ खोटों-खोटों हीकवुअतेंह। खास कीईन तें एंहकींअ हीकवुअत्लें का, पोरमेहेराल ओअखांअ खातुर आने पापाहांअ सीक्सामेनेअ पुरी रीते वाचायांअ खातुर पुतळाहांअ राजा ंअ ने तीयाहांअ ओमोलदाराहांअ भोकती केरांअ जोजे। आने तें एंहकींअ बी हीकवुअत्लें का, सुन्नोत बी केरावांअ जोजे आने एंहड्या बीजया वीदया बी पालांअ जोजे आने खांअ बाबोताम आने बीहरी बाबोतींहम बी कोळोक रीते नीयोम पालांअ जोजे।
मोंजे, एंहडा खोटा सीकसोणुंअ वीरुद केरांअ खातुर पावुल हाचा ख्रीस्ती बोद लेखी मोकलेह। ईया कागलाम तीयांय लेखला बोदाहांअ खास मुददा ए हाय: लोकाहांन तीयाहांअ पापाहांअ सीक्सामेनेअ सुटकारो ता ईसु ख्रीस्त ओतोअज दीअ सेकेह। तीयाअ खातुर ईसु तींहमेंनेअ सुटकारो दीअ सेके एंहडो तीयापेअ वीसवास केरांअ ओतीअज जोरुल हाय। पुतळाहांअ तीया उपरींहन आने ओमोलदाराहांन मांहेंअ मानतेंह तों ने जे वीदया तें पालतेंह ते ता लोकाहांन ईसु ख्रीस्तुअ से सेटे लीअ जात्याह। पोरमेहेरांय ख्रीस्तुअ मारफोतेज जुग-तोरती बोंणावी आने तीयाअज मारफोते तो बादाल ख्रीस्तुअ आदीकारुम फाचो लावेह। ख्रीस्तुअरी जोळायनुंज दुन्याअ लोकाहांन सोताअ पापाहांअ सीक्सामेनेअ वाचायांअ आस्या मीलेह। हातींअ पावुल, वीसवास्यांअ जीवोनाहांम ईया खुब हारा सीक्सोणुअ केंहडी ओसोर वेरांअ जोजे तों होमजावेह।
खास धीयानाम आवे एंहडी बाबोत ए हाय का, ईं कागलों कोलोसे सेहेर लीअ जानारा तुखीकुअरी ओनेसीमुल पावुल मोकलेह। ईया ओनेसीमुअ खातुर भोलामोण केरांअज पावुलुंह फीलेमोनुपेअ बीहरों कागलों लेख्यों।
ईया कागलामेरीअ बाबोतीहींअ रुपरेखा
आगली गोठ १:१-८
ख्रीस्तुअ गुणगान आने तीयाअ काम १:९-२:१९
ख्रीस्तुअ आर्याअ जोळाणुअ लीदे मीलनारों जीवोन २:२०-४:६
सेल्या गोठ्या ४:७-१८