फीलीप्पी सेहेराअ मोंडोळाल पावुलाअ कागलों
ईया कागलाअ बाबोताम बेन गोठ्या
फीलीप्पी सेहेर रोम राज्याअ माकेदोनीया नांवांअ वीस्ताराम आथों। मालीखाअ खास चेला पावुलुंह युरोप खोंडुम पेअलोंअ उबों केअलों मोंडोळ ईंज आथों। पावुल जेलाम आथो तांहांअ तीयांय फीलीप्पी सेहेराअ मोंडोळाअ लोकाहांन ईं कागलों लेख्यों। जांहांअ सोताल ख्रीस्ती सेवोक आखावनारा थोळाक लोकाहीं तींहीं पावुलाअ वीरुद केअलो आने फीलीप्पी सेहेराअ मोंडोळाम ओमुक खोटों सीक्सोण फेलाअलों, एंहडा दुखाअ वोखत पावुलुंह ईं कागलों लेख्यों। तेबी, पावुलाअ खुसी आने तीयाल सोतापेअ भोरुचो आथो तों ईया कागलाम देखाय आवेह। तीयाअ एकुज कारोण आथों का, पावुलुल ईसु ख्रीस्तुपेअ पुरो भोरुचो आथो।
ईं कागलों लेखांअ तुरत्योंअ कारोण ईं आथों का, पावुलुल हाकळी आलली तीया सोमोयाम फीलीप्पी मोंडोळाअ लोकाहीं तीयाल पोयसाहांअ मोदोत मोकली देदली तीयाअ लीदे तो तीयाहांअ आभार मानांअ मागत्लो। ईया मोकाअ लाब लीईन पावुल फीलीप्पी मोंडोळाम फेलाअला खोटा सीक्सोणुअ लीदे गुचवोणाम पोळला वीसवास्यांहन ईया कागलाकींअ होमजावेह, आने पावुलाअ दुखाहांअ बाबोताम उनायन दुखी वेअला लोकाहांन उफ देहे, आने ईसुपेर्याअ वीसवासाम तीयाहांन मोजबुत बोंणावेह। तो मोंडोळाअ लोकाहांन कालावाला केअहे का, ते मोतलोबुअ लालोचुम पोळ्या वोगुर ने ओभीमान राख्या वोगुर ईसु ख्रीस्तुअ होच गोरीबळा सोबावाअ बोंणे। पावुल तीया लोकाहांन ईत केरावेह का, ईसु ख्रीस्तुअरी तीयाहांअ जोळाण वीयोंह तों ता तीयाहां नीयोम पाल्या तीयाकींअ नांह वीयों पेन तीयाहां ख्रीस्तुल मान्यो तीयाकींअ पोरमेहेराअ मेरबानीअ दानु तोरीके वीयोंह। पावुल ईया कागलाम ईं बी लेखेह का, ईसु ख्रीस्तुअरी जोळाअला रेनारांहन पोरमेहेर सांती आने खुसी देहे।
ख्रीस्तुल मानीन ने ख्रीस्ती जीवोन जीवीन जे खुसी मीलेह, आने सोतापेअ जो भोरुचो पेदा वेअहे, आने एक-बीहराअरी ईली-मीलीन रांअ मोन आवेह, आने उंह मीलेह, ते बाबोत्या पावुल ईया कागलाम खास कीईन लेखेह। आने फीलीप्पी मोंडोळाअ खातुर पावुलाअ मोनाम जे खुब लागणी आथी, ते बी ईया कागलाम देखाय आवेह।
ईया कागलामेरीअ बाबोतीहींअ रुपरेखा
आगली गोठ ने सालाम १:१-११
पावुलाअ खान्गी सोंजोग १:१२-२६
ख्रीस्तुअ आर्याअ जोळाणुअ लीदे मीलनारों जीवोन १:२७-२:१८
तीमोथी ने एपाफीरोदीतुअ खातुर आयोजोन २:१९-३०
दुसमोन आने जोखोमुंअ बाबोताम चेतवोण्या ३:१-४:९
पावुल आने फीलीप्पी सेहेराअ तीयाअ दोस्दार ४:१०-२०
सेल्या गोठ्या ४:२१-२३